La canzon del triestin de oggi - Bella ciau!

Una matina, me go sveiado,
o bella ciau, bella ciau, bella ciau, ciau, ciau!
Una matina, me go inacorto,
chi che xe'l vero invasor!

O triestini, mandemolo via,
o bella ciau, bella ciau, bella ciau, ciau, ciau!
O triestini, mandemolo via,
mi son stufo de patir.

Piutosto moro, ma triestin,
o bella ciau, bella ciau, bella ciau, ciau, ciau!
piutosto moro, ma triestin,
con Miramar sempre nel cuor!

Te me porterà, sul prà in Carso,
o bella ciau, bella ciau, bella ciau, ciau, ciau!
te me porterà, sul prà in Carso,
a sburtar un ciclamin!

E tuti quei, che paserà,
o bella ciau, bella ciau, bella ciau, ciau, ciau!
e tuti quei, che paserà,
i dirà: "Ma che bel fior!"

"Xe questo el fior, del triestin"
o bella ciau, bella ciau, bella ciau, ciau, ciau!
"Xe questo el fior, del triestin
morto per la libertà!"

Pulcini a Trieste in Carso

Un ricco e distinto lord inglese, vien in vacanza a Trieste. El ga sentì sai bele robe sul mar, su l'Austria, le osterie, el sincrotrone, Miramar.. e anche sul Carso triestin. Alora, dopo un per de giorni che el iera qua, stufo de farse scarozar in auto de l'autista, el decidi de menar lui steso la sua Rolls Royce e farse un gireto solo, per goderse la pase dei paeseti del Carso e le bele campagnete che ghe xe tra una dolina e l'altra, vardarse i fiorelini pena spuntai e nasar, insoma, i profumi dela primavera.

Tuto fila liso fin che a un certo punto, dal ciglio dela strada, salta fora un pulcin. Co una bela frenada, de quele che te riva el cuor in gola, el riva a schivarlo, el smonta zò e con tenereza el lo ciol su e el ghe disi: "Oh! What a nice baby! Did you get lost?" ("Che picio che ti xe, che cocolo! te se ga perso?")
El se acorzi però che el xe un poco sporco, el nasa e el capisi che xe merda. Alora el tira fora un fazoleto, el lo neta ben con cura e pò el ghe fà: "Go back to your mom, that will be looking for you!" ("va picio, torna dela tua mamina, che la te starà zercando!")

Sodisfato dela bona azion, el se risenta in auto tuto soridente, cò de colpo vien fora un altro pulcin del bordo dela strada. De novo el smonta, lo ingruma su con tenereza e el ghe disi: "Oh! What a nice baby! Did you get lost too?" ("che picio che te son, che cocolo! anche ti te se ga perso?") 
Anche questo, però, xe tuto smerdà, e alora con calma el tira fora un altro fazoleto e con cura el lo forbi tuto, come l'altro, prima de rimandarlo per la sua strada. 

Ancora più sodisfato, a posto co la coscienza per le bone azioni, el se rimeti in auto. Ma proprio quando che el sta per ripartir, salta fora de novo un altro pulcin.. e pò un altro e un altro ancora.. tuti smerdai. De novo el smonta per ingrumarli tuti e netarli ben anche lori, cò de colpo però, proprio col sta per cior el primo, vien fora de un cespuglio la man de un omo che ziga: "Ou! Te gavesi forsi un fazoleto, che go finì i pulcini?"

El tram de Opcina e un armeron

- Enio! Anche ti che te ciapi la 4?

- Si, vado a farme un giro in Napoleonica.. ti? Te vien con mi?

- Ara, quasi quasi.. Volevo andar a trovar Berto a Opcina, ma co sta giornada, serarse in casa, xe de cofe..

- E dighe anche a lui che el vegni, no?

- Ma coss te vol che el vegni! No te lo conossi? Lui fora de casa nol va mai, el xe agorafobico.. se disi cussì pò?

- Booo, me par de si! E bon.. e te ghe va dopo allora, a trovarlo, no te pol? Cussì dopo la passeggiata andemo a ciorse una pasta crema e pò bon, te ciol anche per lui e te ghe porti!

- Orca, te me tenti sai!.. fame pensar.. ma si dai, chi se ciava? Andemo dei!

- Bravo, omo, cussì se fà, ciapar e ndar, e pò bon!

- Però che bale sta 4 ara.. te sa qualcossa ti del tram? Andar in bus no me garba sai.. iera cussì bel in tram, cussì cocolo e rilassante! e un fià romantico soprattutto, co te vedi sti panorami de Trieste dalle alte, sentà su le panchette de legno.. ara, me vien quasi una lacrima e i brividi, mi che no son gnanche per ste robe pò! I lo rimetterà in funzion, si o no?

- Mah.. chìssadìo! Qua a Trieste gavemo solo tandui che ne governa!

- No solo a Trieste, vara, in tutta Italia! TLT subito, ghe volessi.. e piade in tel de drìo a chi so mi!

- A proposito del tram, te se ricordi che ridade, proprio con Berto, che se gavemo fatto? Forsi che per quel nol va mai fora de casa!

- No me ricordo ben, ma forsi no iero mi.. te me confondi con qualchidun altro!

- E cossa, no te ieri ti quela volta che el ne ga contà la storia del falegname che lo ga remenà e dopo lo voleva anche denunciar? Orca, iera una bela tiritera, proprio strano che no te se ricordi! Ma ghe scaza contar in giro, quela volta ghe xe scampà de contar perchè el gaveva bevù un bicier de troppo!

- No, ara che te se confondi, te go dito, no iero, o almeno mi no me ricordo. Contime dei, che forsi me vien inamente.

- Bon, in pratica un giro el xe andà in città a far qualcossa che desso no ga importanza. Intanto su moglie bisogna dir che iera mesi che ghe diseva de giustarghe l'armeron perchè ogni volta che passava el tram, che lori abita in piazza Dalmazia propio sora le rotaie, sto armeron ballava e fazeva casin, e a ela a son de sentirlo ogni do per tre, ghe urtava sai e ghe fazeva vignir un diavolo per cavel. La ghe diseva ogni giorno, "Ciama el falegname", "Ciama el falegname", "Ciama el falegname".. ogni santo giorno! E lui ghe entrava de una parte e ghe andava fora de l'altra, "Domani Uccia", "Domani ciamo", "Domani fazo".. Fin che un giorno, appunto sto giorno famoso che el xe andà in città a no so far cossa, ela se ga stufà e lo ga ciamà ela, el falegname. Tutto ciaro, no, fin qua?

- Si, si, va avanti.

- Bon, insomma, riva sto toco de omo de falegname, e la ghe conta "Scolti sior falegname, qua mi no posso più.. ogni volta che passa sto benedettissimo tram, sto armeron comincia a ballar e me trema tutto, fina i bicieri in cusina. La fazi qualcossa per favor!" Sto povero omo comincia a vardar prima le gambe, de sto catafalco de armeron, per veder che no fossi una più longa e una più curta e dopo eventualmente livellar.. insomma, come che ghe sembrassi ovvio a tutti de dover controllar. El varda de qua, el varda de là, el varda de sotto, de sora, de drìo.. sembra tutto a posto.. Allora el ghe disi "Siora, mi me par che qua xe tutto dritto, no se pol far sai, secondo mi no xe l'armeron che balla", ma ela insisti "La vardi sior mio, son sicura, xe sai tempo che qua ogni volta che passa el tram me balla tutto, go vardà ben e xe proprio sto armeron qua, che scantina e se movi. Cossa la vol dirme, che xe tutto normale? Che me invento? Alora vol dir che no la capissi un ostia del suo mestier!" Ciò, el falegname no ghe andava de passar per mona e, ciapà de l'orgoglio, el varda de novo tutto, ben e meio. Pò, a un certo punto, visto che de fora iera tutto perfetto e nol rivava a trovar gnente che no ndassi, el ghe disi a Uccia "Qua me sembra tutto a posto, dovessimo veder de dentro, che no sia qualcosa che vibra o qualche vida mola". "Bon la vardi ah, qua bisogna trovar cossa che xe!" ghe rispondi ela. "La fazi una roba, la vadi dentro e la scolti ben co passa sto tram, cussì se cavemo sto mistero! Desso a momenti dovessi passar el tram e cussì la vedi e la senti anche lei".

- E si ah.. no xe che restava tanto de far.. e cossa el ga trovà?

- Spetaaa.. desso vien el bel. In quel torna a casa Berto, che gaveva inaspettatamente fatto presto quel che'l doveva far. Ovviamente nol saveva gnente del falegname e col riva el trova su moglie in camera de letto co sto toco de falegname in armeron. No te digo e no te conto.. "Cossa la fa lei qua, nel mio armeron?" el ghe domanda incazzà nero e verde de gelosia, e sto altro candidamente in bona fede "Mi? Mi speto el tram".

- Uuuuhhh me immagino el putiferio!

- Si perchè Berto xe bon ma xe testa calda, ma sto falegname iera un toco de omo e xe finì che Berto le ga anche ciapade e in più, co la baruffa, i ga anche disfà l'armeron!

- Desso capisso perchè no ghe va sai de ndar fora de casa..

Tram in lavor

- Fedi, studime el fogo che se brusa.

- Orca, no son gnanche entrà e za te dà i ordini..

- Se te legi el giornal e no te fa gnente.. almeno iuta!

- Legevo del tram.. che tristeza, ancora fermo el xe, dopo i ga voia de dir che Trieste torna granda!

- E cossa i scrivi?

- Gnente.. el sindaco ga dito che i sta individuando le risorse, e tra un poco i comincerà i lavori.

- Sarìa ora! Vederemo.

- Si ma.. speremo che no i sbai de novo le misure, come col ponte curto! ..e se propio i ga de sbaiar, che i sbai in più, sto giro, almeno no se starà tuti strucai!

El tempo missia

- Lina, varda in pergolo e dime come xe el tempo, per favor.

- Cossa no te son bon de vardar ti?

- No rivo, son sul compiuter in ciat con Enio, xe urgente, el me ga chiesto de dirghe, za che del nostro pergolo se vedi tuto el golfo.

- Bon speta.. Eco, gnente de novo, tuto missià, nuvoloni e sol.

- Che nuvoli el domanda.

- Come che nuvoli? Nuvoli pò ah..

- Ma bassi, alti, bianchi, neri, a pecorelle? Xe tanti tipi.. sa che el se ga insempià co la meterologia desso, no?

- Si che so, cossa te vol che no sapio? Me conta, sa, Bruna, che el ghe frizi tuto el giorno col baromentro e tuto l'ambaradan che el ga ciolto. Che pò el ga speso un mucio de bori, par.

- Eh.. quela roba costa, se te ciol bona. Bon, sti nuvoli come xe? dime dai.

- Bon, xe neri e densi, però drìo xe sol, pò de una parte verso la jugo, sul mar, sembra bel ciaro, inveze de Monfalcon sembra rivar temporal, forsi piovi. Te capissi ti qualcossa?

- No che no capisso, nissun capissi qua, una volta iera fazile, ma desso, in giugno che te neviga e in dicembre che xe giornade che te va in maieta.. cossa te vol capir?

- Xe una loteria co te va fora de casa! Comunque se el te domanda dighe che missia e pò bon!

Povero Michelin

- Fedi, cossa te me ga portado? Te go dito che volevo bianco crema.. orca, ma no te capissi un boro!

- E quel cossa xe secondo ti? No xe forsi bianco crema?

- No ah. No te vedi? Cossa ga de crema? Sto qua xe bianco sporco. Insoma, no posso fidarme.. tre volte te son zà andà a cambiar. Crema te go dito, bianco crema! Ma te ghe ga dito pò, bianco crema, al banconier?

- Cossa te vol che ghe domando, cossa no son bon forsi? Pò xe za quatro volte che son andà, te vol che me fazo mandar in mona dal comeso? Va ti ah, za che te son esperta! Cossa te vol che te digo? Inveze de ringraziar.. Bona te son, a dar comissioni.. va ti e pò bon!

- Eh si ah? Me manca quel, come se no gavessi robe de far qua a casa.. te stiri ti le camise dopo? te fa ti de magnar, che no te sarìa bon de far gnanca un oveto?

- Cossa te parli? So cusinar e anca ben, se voio! Comunque, quel xe bianco crema, te son ti che no te distingui i colori, cossa te credi? Go oci boni, sa?

- E se vedi! Bon, bon, no stemo bazilar, faremo andar ben e basta!

- Scolta inveze, piutosto che parlar de colori a vanvera, te vol saver l'ultima? Xe de morir de rider..

- Conta, si.

- Sa Michelin? El mulo biondo che gira con quel motorin che fa un scandal compagno, el cugin de Piston e Loli?

- Quel che xe anca lù triestilian? quel alto?

- No, quel se su fradel picio, no me ricordo el nome, mi parlo del fradel grando, Michelin se ciama, Michele in realtà, ma i lo ciama Michelin perchè el xe picio de statura, altro che alto!

- Go capì, si, alora de chi che te parli, si.. però el se ciama Michelin perchè col xe nato, sicome el iera ciccetto come l'omin della Miscelen i lo ga ciamà uguale, però nissun saveva pronunciar e tutti lo ciamava Michelin, dopo xe sta un caso che el xe rimasto picio. Bon, indiferente, contime, contime, cossa xe nato?

- Sa che iera de quando che el iera picio che el voleva far el soldà, no?

- E chi no sa? Però me par che no i lo ga mai ciolto, almeno me sembra.

- Infati, tululù come che el xe, chi te vol che lo cioghi, e pò, darghe un'arma in man.. semo mati?

- Si, si, go ben presente desso. Povero picio, no xe gnanche colpa sua, povereto, co i te insempia cussì de una vita, de co te son picio.. che speranze te pol aver?

- Bon, insoma, indiferente.. el ga provà a far domanda per entrar nei elecoteristi dei carabinieri!

- Cossa? Ma te sta scherzando? Lù? E lora? I lo ga ciolto? Facile anche de si.. i caramba forsi che no i se acorzi che pampel che el xe, forsi che i se ga trovado..

- No, no, figurite.. i conta barzelete su de lori, ma ala fine xe gente normal, una volta forsi.. ma desso xe bravi muli. E infati gnanca là no i lo ga volesto!

- E bon, meno mal, sa che danni dopo! Ma, scolta, tuto qua? E cossa ghe xe de tanto divertente, fa tristezza, ara, inveze!

- Nooo, speta, desso riva el bel. El bel xe la storia de come che xe andada. In pratica, el ga fato i esami medici, tuti, e quei, bon, xe andai ben. Pò el ga fato quei test de ingresso, quei che ga tute quele domande, che te devi scriver la risposta bona co una ics, e quei, nissun sa come, xe andai anche ben, apena suficenti in realtà, ma sicome un pochi de quei che gaveva fato meio de lui, dopo, se ga ritirà, alora i lo ga ripescà.

- Sa che pesca!

- Si, anche mi go dito propio cussì! Bon, insoma, ala fine el iera in zogo, e robe quindi che se lo trovemo che el svola qua intorno.. robe de tocarse ogni volta che te va fora de casa, sperando che nol te caschi in testa! Comunque, insoma, iera quasi sicuro oramai che i lo cioghi.. pensite che el xe andà anche in bar de Rudi e el ga butà giro a chi che iera, tanto felice che el iera.

- E quindi el xe un elicoterista ormai? Santa Madona, ma come se pol? Xe longhi desso alora, maledeta barca e chi che li ga portai, se iera Franz Josef, col klinz che i lo cioleva!

- Nooo, sta bona, te go dito che no i lo ga ciolto, speta, gabi pazienza che finisso. Insoma, passa una setimana che el ga festegià de qua e de là, fin che toca el giorno de l'esame pratico, che per inciso, in teoria, uno se aspetasi che xe più facile de quel teorico, almeno per lui che no xe propio una zima.. No te crederà, come no credù mi, che lo ga fato quasi ben. Insoma, no iera propio perfeto, ma sicome iera pochi de lori che podeva farlo i ga serà un ocio e sicome no iera ala fine tanto tanto mal, i lo gavessi anca fato passar.

- Ma alora el xe passà, no te ga dito de no? No stame far bazilar, dime dei, Fedi.

- No, nol xe passà, te go dito, orca! Lori iera un pocheto in dubio perchè bravo nol iera stado, tanto, ma gnanche propio scarso, e come te go za dito, i gaveva bisogno de nove leve. Sa, lori devi cior ogni ano un pochi, se no i fa bruta figura perchè dopo tuti pensa che nissun vol far, e inveze lori, ambìti, ga de esser! Forsi quindi se pol presumer che i gavessi anche serà un ocio. Ma propio col ga finì tuto, sul più bel, el ga dà prova de lù!
El capo esaminator, quel che comandava tuto l'esame, ghe ga chiesto, propio prima de esprimerse, credo con parer favorevole, con far scherzoso, quasi per dirghe "se propio te piasi, visto che te son sai motivà, te ciolemo lo stesso".. bon, el ghe ga domandà, testuali parole: "Allora ci dica, caro il nostro aspirante elicotterista, le piace proprio volare, vero?" e propio se capiva che oramai la iera fata!

- Si ah, mi capirìa cussì, che iera propio fatta oramai..

- Tuti capirìa cussì e salterìa de gioia, ma lù.. lù invece ga risposto serio "Sior capitano, se propio devo essere sincero, e devo rispondergli ciò io ciò lei come stanno le robe, alora le dirò che invece di "Volare"preferisco "Vita Spericola" di Vasco rossi, è il mio idolo". E el ghe conza quel suo soriso ebete.

- No stame dir, mama che figura! El ga capì "Volare" la canzon de Modugno? Mama mia, no poso creder!

- Fortuna gavemo, Lina, fortuna! Xe un Dio lassù, te se imagini se quel podeva guidar un elicotero?

- Meno mal, varda. Za el xe un pericolo con quela motozapa de motorin, te se imagini in aria.. Se vedi che gnanca Cristo no lo voleva in ciel che el svoli!

Damelo grando

- Damelo te go dito! Son tuta bagnada! Te go dito che lo voio grando!

- Cossa te son mata a zigar cussì, per strada, ara xe tuti che se volta..

- E ti damelo alora, e pò, cossa te bazili, tanto xe cinesi qua, no i capissi una parola. Damelo te go dito, no farme spetar se no te vol che zigo ancora. No te vedi che son tuta un'acqua? Cossa te lo ga a far grando se pò te lo dopri de solo? Dei che son bagnada!

- Sa cossa che te digo? Za che te usi sti toni, te va dei cinesi, oramai tuti ne varda, e te se lo fa dar de lori che no speta altro. Te entri dentro, tric, trac, e finida la paura! E se caso vol che no i capissi a vose, te se fa capir a gesti, te vederà che i capissi al volo!

- Te son el solito arogante! Facile far la boba qua dei cinesi.. te sa che lori li ga tuti pici e che no funzia! Voio el tuo che xe più grando e fato meio, per cossa te lo ga grando alora, per vederme a mi con quel de un cinesin?

- Voio xe morto in guera me diseva mia nona, forsi se almeno te domandassi "per piazer"..

- Ahhhh.. ecolo perchè el se la tira tanto! Bon vaben, te fazo contento, ma solo perchè xe mez'ora che son bagnada e no ghe la fazo più, arime, fradicia son, fin le mudande go tutte bagnade! Bon bon, come che te vol. "Caro amor mio, sicome mi son sprovista, te me prestassi el tuo, per favor, che te lo ga più grande e resistente, e sopratuto nol se sera sul più bel, come quei che ga i cinesi. Basta ciaparlo in man per inacorzerse dela diferenza, ma anche i oci bastassi! Grazie."

- Bon bon, ciapà qua, tien forte che xe più pesante dei altri, e se te va la punta in un ocio te ris'ci de farte mal. Però, pati chiari eh? xe mio e comando mi, cossa far, come far, quando fermarse, quando ripartir..!

- Si vaben vaben, però se te me lo davi prima, no me bagnavo cussì tanto, ara, son tuta slavazada desso, colpa tua e de sto ombrel che guai chi te lo toca!

El motto de Giro

- Ara che strico, Enio, varda el giogo.

- No val parlar gavemo dito Fedi, orca! Se Enio no varda rangeve, ma dovè star ziti!

- Tranquilo Giorgeto, no go sentì, anca perchè go sbassà el volume del'auricolar.

- Si, si, sordo te son, ma solo co te comoda.. come te ga sentì cossa che go dito, lora?

- Scolta Giorgeto, no ga importanza, indiferente, tanto ciapè comunque bastonade, de noi e de tuti. No se ricorda nissun de l'ultima volta che gavè vinto..

- Cossa te parli monade Fedi, che anca l'altro giorno gavemo remenà quei dò che iera qua! Domandighe al nostro caro oste Rudi la remenada che ghe gavemo sonà.

- Vardè che ve sento, xe vero, propio una bela tranvada i ghe ga dà a quei due triestiliani..

- Ma chi iera? no gaverè miga zogà contro Loli e Piston, povereti?

- No, dei, figurite.. lori che zoga a tresette! al massimo i zoga a scopa co le napoletane!

- E chi xe le napoletane?

- Mona de Giro, no le babe napoletane, le carte! intendevo dir.. ma cossa te digo a far!

- Ciò, Giro se ga sveià! Buta de bever dei!

- Bon, indiferente, volè saver alora o no volè saver? Tanto che contè che se i unici a vinzer..

- Ostregheta se volemo saver! Se i ga rivà a perder con voi devi meritar propio, de scoltar!

- Mona!

- Bon, conta, dai Giorgeto, movite.

- Alora, semo che zoghemo qua, in due, mi e Giro, tanto che spetemo qualchidun per farse una bela partida in quatro e vinzer qualche bevuda, e che sorsegemo un poco de quel bon che Rudi ne ga portà de provar. In quel vien dentro due de lori e, dopo che i ga bevù dò bicieri, i ne domanda se volemo zogar. Noi oviamnete.. chi se tira indrìo?! E gavemo zogà. Bon, no te conto e no te digo, no i gaveva alba, ma no del zogo, quel anche i saveva, le regole, macome che i stricava e bussava! ala vanvera! mi no so con che logica, te giuro, sembrava propio casual. Ah, Enio, xe vero?

- Si, de no creder, se un no vedi coi sui oci no riva a imaginar. No gavemo miga capì, sa, el criterio. Ma el bel xe che tuta la partida i ga discusso che Trieste xe italiana, che "i morti dela guera", che "la madre patria".. el solito dei, robe de triestiliani, pò! Tanto i disi de volerghe ben a Trieste e pò..

- E voi? Povereti ara, propio qua i doveva capitar! Gavessi volù veder, che rider, ara!

- Cossa te vol, noi te sa come la pensemo, come voi, e no se gavemo risparmià, e intanto li bastonavimo coi punti. Giro pò, che zà de normale, col se impunta, xe una disgrazia per tuti, quel giorno el gaveva anca bevù un fià de tropo, e dovevi veder che robe.. discorsoni, nomi, fati, date, robe de comizio.. el ghe ga fato la testa come un balon, che anca mi e Rudi no podevimo più!

- Forsi xe per quel che gavè vinto, li gavè insempiai talmente tanto..

- Che mona che te son! Te dovevi sentir, altrochè!

- Pecà che no ierimo, ara. E dopo? Ghe gavè fato anche butar el giro?

- Si, ah, logico. "Chi perde paga il giro" xe anca scito int'ela tabela.. i ga pagà ziti e boni!

- La roba più de rider xe stà co i xe ndai via. I ne fà "Ricordeve che comunque Trieste xe sempre stada italiana e sempre lo sarà!" Ah Giorgeto, te se ricordi? Ti te son s'ciopà a rider, e Rudi robe che ghe ciapi un colpo, co le lagrime el iera, tuto paonazo co la vena sula fronte che sembrava che staghi per s'cioparghe, mai visto rider cussì tanto!

- Si, e Giro xe diventà quasi viola in facia, e serio el ghe fà "Ignoranti siete, leggetevi i libri di storia." tuto in italian forbito, pò incazà "Se i pezo nemici, quei che se lassa inzinganar dale volpi che pò ghe incula la merenda!" sa che Giro no ga pei, no? e dopo el ghe disi el suo motto personal, a vose alta, con quel tono che se capissi che el ga fato teatro,  "Triestini, fatti non foste per esser italiani, ma per seguire virtute e conoscenza!"

Piston va de Irma Bocadolce

I conta che un giorno Piston, che de nome vero el fà Piero, ma che tuti ciama lo stesso Piston, dela famiglia dei Triestiliani, ga volù ndar co una dona de mondo, quele.. un poco cussì insoma, che te fa divertir per qualche lira, quele che te fà l'ociolin co te passi per strada, se gavemo capì? indiferente, un putanon, per parlar schieto! E in quel periodo iera sai famosa una certa Irma, Irma "Bocadolce" i la ciamava, tanto che anche Piston iera vignù a saver dele sue performans, perchè in bar, se sa, tuti i parlava e le vosi, co una xe brava, gira sai veloci. Bon, alora, tuto incuriosido de provar anche lui, el se ciapa convinto, el ghe domanda i schei a su mama disendoghe che ghe serviva per andar a comprar no so cossa e qual ordegno, e zito zito el va in Cavana, el ciapa el vicoleto, quel che tuti sa, ma fa finta de no conosser, el entra in un portonzin che xe sempre sochiuso, el fà le scale, e in secondo pian el bussa una portisina, un poco logora e consumada del viavai de gente che ghe xe passada giorno dopo giorno nei ani. "Irma" iera scrito sula porta, su de una targheta de oton, e soto iera scrito a biro "bocadolce", che se vedeva che qualchidun gaveva zontà, sai contento dela prestazion! Una bela baba, de quele beleze che xe più fascinanti che bele per davero, fàssino dovù sopratuto al'esperienza piutosto che a la natura, ghe verzi e lo saluda. Lù, che impacià el xe za de natura, essendo un poco lole dela nassita, con quela là davanti, lù, che una mula no la gaveva quasi gnanca mai vista del vivo cussì de vizin a tu per tu, no ghe vien quasi le parole fora, tanto che el riva pena a saludar! Sta baba che iera sai sgamada, se ga inacorto subito de quanto lole el iera e per no perder tempo e rivar al dunque la fà, sparada: "Cento euri xe, se te vol.." 

Bon, no me crederè, ma come che el ga sentì tuti quei bori ghe xe tornada subito la parola e el se ga messo a contrattar.. no per furbizia, magari! ma perchè veramente nol gaveva tuti quei bori. "zinquanta" la fà ela, e lui gnente, "no rivo" el disi. "venticinque, una robeta legera" disi ela, per darghe el contentin zà che el xe là. Lui però, zinque euri contai el se gaveva fato dar de su mare, gavemo dito pò che no'l iera una gran zima! Cussì avanti a contratar, fin che la perdi la pazienza e la ghe fà "Scolta cocolo, con zinque euro solo una sega sul pianerotolo te se pol far, de solo!" la ciapa e la ghe sera la porta in facia. 

Bon, no crederè se no lo gavè conossù per bon! Cossa xe successo? Xe successo che passai diese minuti el ghe bussa de novo la porta e co la verzi sorpresa, la lo vedi tuto sudà, col fiaton e paonazo, con quel facion de ebete sodisfato, che el ghe da i zinque euri e "grazie de tuto, arivederci signorina".

Due gatini triestini sfigai

Una sera che la Bora sufiava forte Gino, dito "Loli", e Piero, dito "Piston", i dò fradei dela famiglia dei Triestiliani, che abita in quarto pian sora Bruna e Enio, co iera in giro in Cavana, i trova dò gatini per tera, tuti iazai e afamai. Se sa che no xe dò cime tuti dò, no xe Triestiliani per gnente, ma se sa anche che no i xe cativi, povereti, Gesù ghe ga dà poco, ma almeno un poca de pietà e compassion si! Cossa i fà e cossa no i fà, ala fine i decidi de tignirli un per omo e sicome un, disgrazià, gaveva un'orecia taiada, Loli, che iera el più compasionevole, disi de volerlo lui.

Dopo un per de giorni che i ghe sta drìo però i se corzi che anche quel de Piston se ga fato un taio e dopo un giorno el perdi anche lui quel toco de orecia, propio come quel de Loli. Cossa i fà e cossa no i fà, Piston ghe vien un lampo de genio, el ciapa el povero gatin e el ghe taia un toco de l'altra orecia, quela bona. Ghe dispiasi, perchè el gaveva compassion, ma el fà lo stesso, altri modi nol vedeva. Bon, passa qualche altro giorno e sti gatini cressi, magna, zoga insieme e lori sempre li ciol de sera e i li porta ognidun in camera sua a dormir. Fin che un giorno, de sera,  co i torna, anche el gatin de Loli ga la seconda orecia taiada: cossa xe nato no se sa, ma zogando in qualche modo el se devi gaver taià. I lo cura e ala fine el sta ben, però dopo aver cavà le bende i se corzi che xe de novo come prima, tuti dò senza orecie! Alora Piston, che de solito tra i due iera quel che brilava de più, anche se brilar xe una parola forte in sto caso, el ciapa de novo el gatin e el ghe taia un toco de coda, altro modo nol vedeva.. ghe dispiasi sai che quasi el pianzi, ma co toca, toca, zachete e via la coda! Passa ancora un poco de tempo e i gatini sta ben, vispi più che mai, senza orecie tuti dò e senza coda un, ma i sta sai, sai ben, perchè Loli e Piston xe un poco lole ma ala fine xe boni muli, come se disi, muli de cuor, più che de zervel. Insoma tuto fila lisso fin che de novo, un giorno, el gatin de Loli se fa mal.. porconi e bestemioni! propio in te la coda! cossa femo e cossa no femo, ala fine ghe toca taiarla perchè se no fà infezion! No ghe par vero de coss che ghe toca, co la sfiga ciama, ciama forte e anche zigando! I gatini ga tuti dò le orecie taiade uguali e le code anche. "Come femo?" domanda Loli quasi disperà, e Piston sta volta propio no sa cossa far, idee ghe vien ma no se pol: "se ghe taio le zate nol camina più, se ghe taio la testa el mori, se ghe taio l'usel.. meo alora che ghe taio la testa! cossa fazo?" cussì el pensava, caminando su e zo per la corte, do' che i li gaveva ingrumai. Ma intanto che el se danava a zercar una soluzion e Loli pianzeva, per fortuna xe passà de là nona Nera che dopo averse fato contar tuto la ghe disi tranquila: "No fè prima a ciorve un, quel nero, e l'altro, quel bianco?"

Spesa e musina

Bruna - Cos te fa con quela cassa de vin in man? No te volerà miga cior, no? Te sa che semo cisti in sto periodo, e dovemo far musina, Enio!

Enio - Ma orca.. dò botiglie cos te vol che sia?

Bruna - Te go dito: no! Se gavemo dito l'altro giorno de far musina, che sinò no rivemo a ndar in vacanza sto estate.. meti via, dai, femose sto favor.

Enio - Eh bon ah, però alora, scusime, quela crema che te ga in man cossa xe?

Bruna - Questa no c'entra, xe crema de beleza, servi per la pele, ringiovanisi, xe quela che me diseva la Ilde!

Enio - Ma scolta.. e el discorso de far musina alora? Dove xe finì? Te me ga pena dito de meter via dò fiasche de vin per sparagnar..

Bruna - Ma questa xe per farme bela per ti, amor!

Enio - Scolta amor mio, premesso che te son bela come una putela e mi son e sarò sempre inamorà de ti, se propio te volesi sembrar ncora più incantevole de quel che te son, con dò fiasche de vin, che costa sai de meno dela crema, sa che più bela che te me sembrerìa?

El funeral de Marieta

Siora Lina ghe telefona a siora Bruna. Dopo un poche de ciacole sul come xe e come no xe, sul tempo e do ricette, le pasa finalmente ala cronaca dei gosip triestini..

Lina - E te sa l'altro giorno Toni che gaveva el funeral de quela povera disgraziada de Marieta?

Bruna - Chi Maria, quela de la pescheria?

Lina - No, no.. Marieta de Toni, quela che nove ani fa i la credeva morta, mesa in bara, messa del vescovo in catedral de San Giusto e tuto el resto, e in tel funeral, co i la portava, un mona de quei che la gaveva in spala xe inciampà, la bara xe cascada e sta qua la se ga sveià de colpo.. e bon che i se ga corto perchè la se lamentava, sinò i continuava el funeral e i la sepeliva viva!

Bruna - Ah si me ricordo deso, come no? E chi no se ricorda! Iera sul Picolo un mese, che no i parlava de altro, interviste e robe cusì, anche quei de rai uno xe vignui, me ricordo si.. e beh cosa xe nato? la xe morta deso, no? l'altra setimana me par.. e do giorni fà iera el funeral, quel vero.. cosa la se ga sveià de novo?

Lina - No, no, stavolta i la ga sepelida per bon, ma xe ndà Fedi che conoseva el cugin de Toni, su marì, e el me ga contà che el iera proprio vizin dele scale fora dela cesa coi la portava in spala.. e quel mona de marì ghe ga dito pian ai muli, ma Fedi ga sentì lo stesso, "Ocio ai scalini muli!"

Ghe xe andà mal el primo giro, ma el secondo nol voleva risciar!

Bruna - Povera Marieta ara, ela morta e el marì che deso farà festini!