Povera Italia

Fedi e Enio si incontrano dal panettiere, come quasi tutte le mattine..

- Ciao Enio, come xe?

- Ciau! Lassa star che no go dormì un boro.. mal de schena che no te conto.. no savevo de che parte voltarme, fin che me son alzà e me go messo a vardar tivù.

- Che bruto, ara! So ben perchè anche mi me ciapa ogni tanto, mi alla cervicale.. robe che no te digo! un mal de testa lucinante me vien..

- Meno mal che xe Bruna, che me ga messo arnica e un poco ga funzionà!

- Anche mi dopro, si, funzia ben! Ste bone donne che gavemo le sa tuti i rimedi.. un più del diavolo.. meno mal! E scolta, coss te ga vardà de bel a quele ore?

- Ah, coss te vol.. cercavo qualcossa che me distrai.. ma invece iera tuti che parlava de sto klinz de governo Letta.. robe de mal de panza! Povera Italia!

- Mamamia, si, te prego.. de vergognarse a esser italiani.. bon che noi no semo! Viva Trieste e el TLT!

- Ara, propio de vergognarse! Infati, te vol saver? Xe dò giorni che finalmente no sentimo più rumori de quei mone del quarto pian che fa sempre un tàl scandàl..! Quei.. come se ciama? No me ricordo mai el nome.. bon, insoma pò, quei! te ga capì quai, no? I triestiliani pò..

- Come no! So chi.. ma cossa i se vergogna?

- Apunto! per quel no se li senti più.. forsi che stavolta i capissi che i li ciol pel cul.. e un poco i se vergogna de farse veder in giro dopo che i ga tanto dito che l'Italia xe la loro madrepatria, che no li abandonerà mai e via cussì.. invece no la abandona solo lori, povereti de Trieste in mezo a tuti sti "indipendentisti", come i ne ciama.. li abandona tuti, ma tuti quanti i taliani e li lassa a remengo!

- Per mi no i capissi! E se anche i capirìa, no i ameterìa mai, tropo orgogliosi per ameter! Però almeno che i cominci a vergognarse xe un poco bon!

- Mi propio no capisso come se pol ostinarse in sto modo.. capisso chi, a ragion veduta, sposa un'idea.. un credo.. ma lori che rifiuta a priori senza gnanche leger e documentarse e co te ghe disi "legi qua" e te ghe fa veder un trattato internazionale, i te rispondi "cossa c'entra?".. "no xe le carte che fa la storia".. "xe roba de sessanta anni fà".. e monade simili! I dovessi dir "te ga ragion a solevar un dubio, vardemo se le carte xe valide.. e se cussì xe, mi che voio esser comunque talian perchè la sento la mia terra, o vado via, apunto in Italia, opur me batto per chieder l'annession de Trieste all'Italia", per inciso, come no xe stà mai fato dal '47! Che per inciso, se i domandassi desso sarìa propio una barzelletta, chi te vol che aspiri a passar sotto l'Italia.. solo un.. bon, bon, te ga capì, no? semo in logo publico, che ancora no ofendemo qualchidun!

- No so cossa risponderte, gnanche mi no li capisso.. anche mi go provà a spiegarghe qualche volta, ma xe impossibile.. specie a certi che in teoria dovessi saver ste robe, anche gente in alto, studiada, che fà politica.. xe che lori ga tuti i interessi a restar cussì.. e i pensa che se no i te dà bada dopo un poco te se dimentichi e resta tutto cussì..

- Povereti, secondo mi i xe talmente cagai che i se la conta soli e co riverà la sveia sarà come un scopeloto!

- Bon, bon.. comunque te vederà che tra un poco sc'iopa tuto e vegnerà un ribalton!

- Si, ah.. la gente no ga più schei per pianzer, la crescita no cressi.. e lori cossa fa? I ne aumenta l'iva! Volponi! Chi ghe la cazza!?! Te digo mi.. te vederà che robe che vegnerà..

- Speremo solo che ste Nazioni Unite se movi a vignir a meter in chiaro che qua a Trieste no xe Italia!

- Prima che i ne ciuci altri bori! Maledeta quela barca!

- Ara che toca ti, movite!

- Urca, si.. Bongiorno bella! Le solite quattro sc'iopete bianche a nome "Bruna" e pò un krapfen.. quel là de drio, el più s'gionfo, che magno subito. Grazie.

- Ma Enio.. e col colesterolo?

- Tasi! Per quel magno subito.. no dirghe a Bruna che sinò la me ziga!

Povero Michelin

- Fedi, cossa te me ga portado? Te go dito che volevo bianco crema.. orca, ma no te capissi un boro!

- E quel cossa xe secondo ti? No xe forsi bianco crema?

- No ah. No te vedi? Cossa ga de crema? Sto qua xe bianco sporco. Insoma, no posso fidarme.. tre volte te son zà andà a cambiar. Crema te go dito, bianco crema! Ma te ghe ga dito pò, bianco crema, al banconier?

- Cossa te vol che ghe domando, cossa no son bon forsi? Pò xe za quatro volte che son andà, te vol che me fazo mandar in mona dal comeso? Va ti ah, za che te son esperta! Cossa te vol che te digo? Inveze de ringraziar.. Bona te son, a dar comissioni.. va ti e pò bon!

- Eh si ah? Me manca quel, come se no gavessi robe de far qua a casa.. te stiri ti le camise dopo? te fa ti de magnar, che no te sarìa bon de far gnanca un oveto?

- Cossa te parli? So cusinar e anca ben, se voio! Comunque, quel xe bianco crema, te son ti che no te distingui i colori, cossa te credi? Go oci boni, sa?

- E se vedi! Bon, bon, no stemo bazilar, faremo andar ben e basta!

- Scolta inveze, piutosto che parlar de colori a vanvera, te vol saver l'ultima? Xe de morir de rider..

- Conta, si.

- Sa Michelin? El mulo biondo che gira con quel motorin che fa un scandal compagno, el cugin de Piston e Loli?

- Quel che xe anca lù triestilian? quel alto?

- No, quel se su fradel picio, no me ricordo el nome, mi parlo del fradel grando, Michelin se ciama, Michele in realtà, ma i lo ciama Michelin perchè el xe picio de statura, altro che alto!

- Go capì, si, alora de chi che te parli, si.. però el se ciama Michelin perchè col xe nato, sicome el iera ciccetto come l'omin della Miscelen i lo ga ciamà uguale, però nissun saveva pronunciar e tutti lo ciamava Michelin, dopo xe sta un caso che el xe rimasto picio. Bon, indiferente, contime, contime, cossa xe nato?

- Sa che iera de quando che el iera picio che el voleva far el soldà, no?

- E chi no sa? Però me par che no i lo ga mai ciolto, almeno me sembra.

- Infati, tululù come che el xe, chi te vol che lo cioghi, e pò, darghe un'arma in man.. semo mati?

- Si, si, go ben presente desso. Povero picio, no xe gnanche colpa sua, povereto, co i te insempia cussì de una vita, de co te son picio.. che speranze te pol aver?

- Bon, insoma, indiferente.. el ga provà a far domanda per entrar nei elecoteristi dei carabinieri!

- Cossa? Ma te sta scherzando? Lù? E lora? I lo ga ciolto? Facile anche de si.. i caramba forsi che no i se acorzi che pampel che el xe, forsi che i se ga trovado..

- No, no, figurite.. i conta barzelete su de lori, ma ala fine xe gente normal, una volta forsi.. ma desso xe bravi muli. E infati gnanca là no i lo ga volesto!

- E bon, meno mal, sa che danni dopo! Ma, scolta, tuto qua? E cossa ghe xe de tanto divertente, fa tristezza, ara, inveze!

- Nooo, speta, desso riva el bel. El bel xe la storia de come che xe andada. In pratica, el ga fato i esami medici, tuti, e quei, bon, xe andai ben. Pò el ga fato quei test de ingresso, quei che ga tute quele domande, che te devi scriver la risposta bona co una ics, e quei, nissun sa come, xe andai anche ben, apena suficenti in realtà, ma sicome un pochi de quei che gaveva fato meio de lui, dopo, se ga ritirà, alora i lo ga ripescà.

- Sa che pesca!

- Si, anche mi go dito propio cussì! Bon, insoma, ala fine el iera in zogo, e robe quindi che se lo trovemo che el svola qua intorno.. robe de tocarse ogni volta che te va fora de casa, sperando che nol te caschi in testa! Comunque, insoma, iera quasi sicuro oramai che i lo cioghi.. pensite che el xe andà anche in bar de Rudi e el ga butà giro a chi che iera, tanto felice che el iera.

- E quindi el xe un elicoterista ormai? Santa Madona, ma come se pol? Xe longhi desso alora, maledeta barca e chi che li ga portai, se iera Franz Josef, col klinz che i lo cioleva!

- Nooo, sta bona, te go dito che no i lo ga ciolto, speta, gabi pazienza che finisso. Insoma, passa una setimana che el ga festegià de qua e de là, fin che toca el giorno de l'esame pratico, che per inciso, in teoria, uno se aspetasi che xe più facile de quel teorico, almeno per lui che no xe propio una zima.. No te crederà, come no credù mi, che lo ga fato quasi ben. Insoma, no iera propio perfeto, ma sicome iera pochi de lori che podeva farlo i ga serà un ocio e sicome no iera ala fine tanto tanto mal, i lo gavessi anca fato passar.

- Ma alora el xe passà, no te ga dito de no? No stame far bazilar, dime dei, Fedi.

- No, nol xe passà, te go dito, orca! Lori iera un pocheto in dubio perchè bravo nol iera stado, tanto, ma gnanche propio scarso, e come te go za dito, i gaveva bisogno de nove leve. Sa, lori devi cior ogni ano un pochi, se no i fa bruta figura perchè dopo tuti pensa che nissun vol far, e inveze lori, ambìti, ga de esser! Forsi quindi se pol presumer che i gavessi anche serà un ocio. Ma propio col ga finì tuto, sul più bel, el ga dà prova de lù!
El capo esaminator, quel che comandava tuto l'esame, ghe ga chiesto, propio prima de esprimerse, credo con parer favorevole, con far scherzoso, quasi per dirghe "se propio te piasi, visto che te son sai motivà, te ciolemo lo stesso".. bon, el ghe ga domandà, testuali parole: "Allora ci dica, caro il nostro aspirante elicotterista, le piace proprio volare, vero?" e propio se capiva che oramai la iera fata!

- Si ah, mi capirìa cussì, che iera propio fatta oramai..

- Tuti capirìa cussì e salterìa de gioia, ma lù.. lù invece ga risposto serio "Sior capitano, se propio devo essere sincero, e devo rispondergli ciò io ciò lei come stanno le robe, alora le dirò che invece di "Volare"preferisco "Vita Spericola" di Vasco rossi, è il mio idolo". E el ghe conza quel suo soriso ebete.

- No stame dir, mama che figura! El ga capì "Volare" la canzon de Modugno? Mama mia, no poso creder!

- Fortuna gavemo, Lina, fortuna! Xe un Dio lassù, te se imagini se quel podeva guidar un elicotero?

- Meno mal, varda. Za el xe un pericolo con quela motozapa de motorin, te se imagini in aria.. Se vedi che gnanca Cristo no lo voleva in ciel che el svoli!

Piston va de Irma Bocadolce

I conta che un giorno Piston, che de nome vero el fà Piero, ma che tuti ciama lo stesso Piston, dela famiglia dei Triestiliani, ga volù ndar co una dona de mondo, quele.. un poco cussì insoma, che te fa divertir per qualche lira, quele che te fà l'ociolin co te passi per strada, se gavemo capì? indiferente, un putanon, per parlar schieto! E in quel periodo iera sai famosa una certa Irma, Irma "Bocadolce" i la ciamava, tanto che anche Piston iera vignù a saver dele sue performans, perchè in bar, se sa, tuti i parlava e le vosi, co una xe brava, gira sai veloci. Bon, alora, tuto incuriosido de provar anche lui, el se ciapa convinto, el ghe domanda i schei a su mama disendoghe che ghe serviva per andar a comprar no so cossa e qual ordegno, e zito zito el va in Cavana, el ciapa el vicoleto, quel che tuti sa, ma fa finta de no conosser, el entra in un portonzin che xe sempre sochiuso, el fà le scale, e in secondo pian el bussa una portisina, un poco logora e consumada del viavai de gente che ghe xe passada giorno dopo giorno nei ani. "Irma" iera scrito sula porta, su de una targheta de oton, e soto iera scrito a biro "bocadolce", che se vedeva che qualchidun gaveva zontà, sai contento dela prestazion! Una bela baba, de quele beleze che xe più fascinanti che bele per davero, fàssino dovù sopratuto al'esperienza piutosto che a la natura, ghe verzi e lo saluda. Lù, che impacià el xe za de natura, essendo un poco lole dela nassita, con quela là davanti, lù, che una mula no la gaveva quasi gnanca mai vista del vivo cussì de vizin a tu per tu, no ghe vien quasi le parole fora, tanto che el riva pena a saludar! Sta baba che iera sai sgamada, se ga inacorto subito de quanto lole el iera e per no perder tempo e rivar al dunque la fà, sparada: "Cento euri xe, se te vol.." 

Bon, no me crederè, ma come che el ga sentì tuti quei bori ghe xe tornada subito la parola e el se ga messo a contrattar.. no per furbizia, magari! ma perchè veramente nol gaveva tuti quei bori. "zinquanta" la fà ela, e lui gnente, "no rivo" el disi. "venticinque, una robeta legera" disi ela, per darghe el contentin zà che el xe là. Lui però, zinque euri contai el se gaveva fato dar de su mare, gavemo dito pò che no'l iera una gran zima! Cussì avanti a contratar, fin che la perdi la pazienza e la ghe fà "Scolta cocolo, con zinque euro solo una sega sul pianerotolo te se pol far, de solo!" la ciapa e la ghe sera la porta in facia. 

Bon, no crederè se no lo gavè conossù per bon! Cossa xe successo? Xe successo che passai diese minuti el ghe bussa de novo la porta e co la verzi sorpresa, la lo vedi tuto sudà, col fiaton e paonazo, con quel facion de ebete sodisfato, che el ghe da i zinque euri e "grazie de tuto, arivederci signorina".

Due gatini triestini sfigai

Una sera che la Bora sufiava forte Gino, dito "Loli", e Piero, dito "Piston", i dò fradei dela famiglia dei Triestiliani, che abita in quarto pian sora Bruna e Enio, co iera in giro in Cavana, i trova dò gatini per tera, tuti iazai e afamai. Se sa che no xe dò cime tuti dò, no xe Triestiliani per gnente, ma se sa anche che no i xe cativi, povereti, Gesù ghe ga dà poco, ma almeno un poca de pietà e compassion si! Cossa i fà e cossa no i fà, ala fine i decidi de tignirli un per omo e sicome un, disgrazià, gaveva un'orecia taiada, Loli, che iera el più compasionevole, disi de volerlo lui.

Dopo un per de giorni che i ghe sta drìo però i se corzi che anche quel de Piston se ga fato un taio e dopo un giorno el perdi anche lui quel toco de orecia, propio come quel de Loli. Cossa i fà e cossa no i fà, Piston ghe vien un lampo de genio, el ciapa el povero gatin e el ghe taia un toco de l'altra orecia, quela bona. Ghe dispiasi, perchè el gaveva compassion, ma el fà lo stesso, altri modi nol vedeva. Bon, passa qualche altro giorno e sti gatini cressi, magna, zoga insieme e lori sempre li ciol de sera e i li porta ognidun in camera sua a dormir. Fin che un giorno, de sera,  co i torna, anche el gatin de Loli ga la seconda orecia taiada: cossa xe nato no se sa, ma zogando in qualche modo el se devi gaver taià. I lo cura e ala fine el sta ben, però dopo aver cavà le bende i se corzi che xe de novo come prima, tuti dò senza orecie! Alora Piston, che de solito tra i due iera quel che brilava de più, anche se brilar xe una parola forte in sto caso, el ciapa de novo el gatin e el ghe taia un toco de coda, altro modo nol vedeva.. ghe dispiasi sai che quasi el pianzi, ma co toca, toca, zachete e via la coda! Passa ancora un poco de tempo e i gatini sta ben, vispi più che mai, senza orecie tuti dò e senza coda un, ma i sta sai, sai ben, perchè Loli e Piston xe un poco lole ma ala fine xe boni muli, come se disi, muli de cuor, più che de zervel. Insoma tuto fila lisso fin che de novo, un giorno, el gatin de Loli se fa mal.. porconi e bestemioni! propio in te la coda! cossa femo e cossa no femo, ala fine ghe toca taiarla perchè se no fà infezion! No ghe par vero de coss che ghe toca, co la sfiga ciama, ciama forte e anche zigando! I gatini ga tuti dò le orecie taiade uguali e le code anche. "Come femo?" domanda Loli quasi disperà, e Piston sta volta propio no sa cossa far, idee ghe vien ma no se pol: "se ghe taio le zate nol camina più, se ghe taio la testa el mori, se ghe taio l'usel.. meo alora che ghe taio la testa! cossa fazo?" cussì el pensava, caminando su e zo per la corte, do' che i li gaveva ingrumai. Ma intanto che el se danava a zercar una soluzion e Loli pianzeva, per fortuna xe passà de là nona Nera che dopo averse fato contar tuto la ghe disi tranquila: "No fè prima a ciorve un, quel nero, e l'altro, quel bianco?"