Iscriviti ai Feed Aggiungimi su Facebook Seguimi su Twitter Aggiungimi su Google+ Segui il Canale di Youtube Seguimi su Pinterest

sabato 24 maggio 2014

Clanfe a 4 zampe a Trieste


- Te son 'ndà a cior o no?
- Cosa Bruna?
- No te dovevi andar a cior la schedina de memoria? quala per la machina fotografica..
- Si ah, go ciolto due, cusì semo comodi.
- Due? Cosa coreva due?
- Ara che dura tuto e giorno le gare.. va ben che i tuffi xe solo ale tre, ma prima xe tute le gare de nuoto e sarà sicuro bel de veder e anche bel per far foto.. tuti sti cagneti che nuda.. cusì fazo anche video, no?
- Ah bon si, alora te ga fato ben! Te sa se vien anche Lina e Fedi?
- Si, go parlà con Fedi stamatina e el ga dito che i vien.. el brontolava perchè Lina ghe ga fato preparar tuto.
- Tuto cosa?
- Sa come che xe Lina, no? Tuta organizada.. sedie, sdraio, tavolin.. e porta de magnar.. e porta de bever.. e se dopo piovi? alora portite le ombrele, i chi-uei.. te la conosi, no? xe tua amica pò.
- Si si, la me ga fato una testa su che dolce far per portar..
- Bon si, quel va ben.. i dolci che fa ela xe insuperabili.
- E cosa i miei no te piasi?
- Ma noooo, sta bona, no intendevo dir quel, i tuoi xe speciali, no se pol paragonar, xe fuoriserie..
- Si ah.. refa deso.. come se no te conosesi!
- Ara, te sa che no imbroio.. i tui xe quei che me piasi de più!
- Bon bon.. lasa star.. za la veciaia te ga scurtà e te sta più gobo, se ancora te se scurta anche le gambe stemo freschi!
- Uff.. no se pol dir gnente con ti che te parti subito in quarta! Comunque, parlando de robe serie, ara che go za meso in auto le schede per votar e i moduli per darghe in seggio e esercitar el non-voto. Go fato anche per Lina e Fedi perchè no ghe funzia la stampante.
- De novo rota?
- Mah.. secondo mi xe lui che no xe bon de doprar.. tropi botoni e ga anche el schermo tatile, tuta digitale.. ghe disevo mi "ciolte una semplice, normale".. e lui "ara sta qua xe figona, la fa tuto".. e deso nol la sa doprar!
- Ah, mi no stame dir ste robe, che anche col telefono fazo casin. Te ga vardà le previsioni per doman? Speremo ben, xe la prima volta che i fa ste robe qua a Trieste e iera ora, sarìa sai cocolo se vien anche bel tempo e tuti se diverti.
- Si si, go vardà, xe bel, doman anzi farà caldon!
- Ma cosa te disi Enio, portemo alora l'ombrelon?
- Ma te son mata? L'ombrelon? Te prego, ne manca solo l'ombrelonn.. xe miga una gita, andemo a veder le gare e le clanfe e pò bon. Se piovi, che no pioverà, ciaperemo acqua e se sarà sol ciaperemo sol! L'ombrelon! Ma cossa go fato de mal?
- Ma anche el sindaco se buta?
- Ma no ah, xe solo pei cagneti.. a meno che nol se gabi fato imprestar Dudù..

___

Link utili



Gita in Italia e Elezioni Europee


- Enio, movite che femo tardi.
- Come tardi? Xe apena le nove..
- Apunto, a Villesse i verzi alle dieci, semo tardi.
- Ma vara che xe verto fin de sera, sa?
- Cosa c'entra? no se sa mai, meti che dopo no rivemo a cior tuto..
- Ma cosa.. no te se sognerà miga de star ore là dentro? No te dovevi cior solo l'armadieto pel gabineto?
- Si, ma Lina ga de cior anche due robete e pò lori va là subito co verzi, cusì ghe go dito che se trovemo là fora alle dieci.
- Con Lina? Noo, ma no te me gavevi dito, no val.. te sa che quela co ga de cior una roba la perdi ore.. mi no go miga la pazienza de Fedi.. pò lui se la ga scelta e sposada e ghe toca, mi perchè devo patir con lui, che no c'entro un boro?
- Ti te c'entri eccome.. no te me ga pur sposado e scelto a mi? e mi te digo andemo, movite!
- Che giornada ara.. meno mal che xe anche Fedi, almeno gaverò de ciacolar qualcosa.. ciogherò in edicola el primo numero de Trieste Libera News.. almeno gaveremo cosa leger..
- Ah.. cosa? xe za fora? No me ricordavo..
- Ma come.. te go tanto dito! Desso che pasemo davanti lo ciogo al volo, son sai curioso de leger.
- Si, anche mi. Lo legerò in auto, intanto che te guidi.
- Ara che dopo te ciapa mal, za l'altra volta te ga avù nausea tuto el giorno..
- Ma cossa mai! te vederà che no me fa gnente..
- Bon alora te legerà forte, no val che ti te legi e mi me toca guidar, anche mi son curioso.
- Va ben, basta che no te zuchi, che ormai te ga pochi punti ancora, manca solo che i te cavi la patente, cosa femo dopo? Andemo co la filovia, come i Belich, che lui se ga fato portar via la patente andando in superstrada controman?
- Ma si dei, sta bona, no state procupar. El Belich xe un caso unico, mi no fazo ste robe, al massimo zuco un poco.. co servi però! Pò xe colpa tua, te me fa sempre furia ti.. co sta storia che ogni volta no te son mai pronta e te se devi far bela come se te dovesi andar de la regina de Inghilterra, femo sempre tardi. E mi recupero, ah.. E comunque l'altra volta, za che salta fora, gnanche no corevo.. per mi, te go dito, i mati.. bon lasemo perder, che me vien nervoso!
- Alora? no te se cambi? cos'te speti?
- E cosa me devo cambiar? Son pronto.
- No te vegnerà miga cusì, no? Metite un per de jeans, te son fora moda oramai, sempre serio, sembra che te vadi a messa o a un funeral.
- Ma cossa jeans, miga andemo in prà.. son ben cusì, e no frizerme.. te digo forsi mi che cotola meterte?
- Te son vecio dentro, un poco più casual te dovesi vestirte.. ara el marì de la Irma che xe sempre alla moda, lui si che se vesti ben..
- Ma te prego, per l'amor del ciel.. se l'altra volta el gaveva le braghe rosse? Te vol che me meto come un paiazo? Iera tutti, in Osteria de Rudi, che no fazeva altro che ciorlo pel fioco e darghe zò.
- No digo braghe rosse, ma un poco più giovanile, no? Un per de jeans e un bel maionzin.. te dovesi andar a ciorte vestiti con tuo nipote, no con Fedi!
- Bon, no te gavevi furia? Andemo.
- Speta, go ancora i cavei de farme, ma dieci minuti e son pronta. 
- I cavei in dieci minuti? Ma chi te credi!? Sa l'ultima invece? Go visto, prima che portavo el can, el Marsich..
- Chi xe el Marsich?
- Quel che ga quel cagneto picio, che baia sempre e fa un casin del diavolo. Quel che abita de poco in casa de Lina e Fedi.
- E bon, e alora? Perchè te me conti?
- Perchè el me ga tacà boton, el me ga dito che el ga scoperto de poco tuto el lavor che sta fazendo i triestini per riapropriarse del dirito de citadinanza de Trieste.. el xe proprio in piena, felice lo go visto.
- E si, te credo. Co un scopri l'inganno, ghe par de aver visto Lazzaro risorto.. all'inizio no ghe credi, pò el comincia a renderse conto e ghe se impiza de novo una luce.
- Proprio cusì el pareva, iluminado. El ga dito che anche lui no andarà a votar, anzi che el anderà a non-votar, a far insoma la dichiarazion de non-voto ativo, e el pareva col morbin, ringiovanì come.
- Te ghe ga dito che noi za l'altro anno gavemo fato la dichiarazion de non-voto ativo?
- Si ah, el gaveva ancora qualche dubio, sa, quele robe tipo "ma dopo che conseguenze gaverò?" "i me arresterà?" Robe de l'altro mondo, ghe go dito, e ghe go contà de quando semo andai noi l'altro anno, che za i saveva tuto quei del seggio, cosa far e cosa compilar nel verbale che i ga lori, e i ne ga sorriso e quasi dito bravi, se capiva che i la pensava come noi, e ghe go anche dito che a Fedi uno ghe ga diritura strizà de ocio. Ma infati l'altro anno ga fato tanti, e se ga visto pò quanta gente che la pensa come noi, se ga visto el 15 settembre el vero consenso!
- Pò sto anno xe ancora più importante far la dichiarazion, perchè xe le europee, no? E se i ne fa votar xe elezioni ilegitime! Parlemo de votazioni europee ilegitime, che vegnerà denunciade e quindi tuta l’Europa doverà per forza ciaparne in considerazion sul serio e no i poderà far finta de gnente e serar un ocio per farghe un favor al’Italia. Te ghe ga spiegà, si? Ma anche lui iera el 15 settembre?
- No, nol saveva gnente, e sai ghe dispiasi, sto altro anno nol vedi l'ora de vignir però.. E comunque ghe go spiegà ben, si, l’importanza de ste europee.. noi ghe denunceremo l’ilegitimità delle elezioni per colpa de l'Italia che ne permeti de votar anche se no podemo, fazendo finta che semo italiani, ilegitime perchè xe sta imposte in un stato che non fa parte dell’Europa, el nostro caro Territorio Libero de Trieste, e el Parlamento Europeo ghe domanderà conto alla Comunità Europea, che.. eccetera eccetera.. no vedo l’ora, ara! Insoma.. robe de Bruxelles e Strasburgo, sa? miga frotole!
- Sarà ancora de più sto 15 settembre, vederemo, no vedo l'ora anche mi.. Bon son pronta, va intanto a scaldar l'auto che rivo.
- No come al solito che te me fa spetar mezza ora col motor impizà però! Te son bela cusì, no ripensamenti dell'ultimo minuto, quela cotola, quele scarpe e quel capotin.. e sopratuto quei cavei, me raccomando!
- Ma si, ma si.. va dei, che te me intrighi qua, no rivo a pensar se me dimentico qualcosa.
- Ma vara ti se per cior un armadieto pel gabineto me toca andar fin là e perder tuto el giorno, che pò so za che torneremo co l'auto piena de strafanici!
- Sempre che te sbufi.. come se no te savesi anche ti che convien! In Jugo se va a far benza, in duty free se ciol ciche e propoli, spesa se fa a Capodistria e per cior armadieti e robe de casa se va in Italia a Villesse ah.. normale pò!

giovedì 6 marzo 2014

La Ferriera de Servola


- Te ga visto Fedi? Te disevo mi che i mandava per tivù el servizio su la Ferriera de Servola, go visto co i riprendeva, ti che te disevi che me sogno de note!
- Si si, te devo dar ragion. Meno mal, cusì forsi se movi qualcosa. [Guarda el  video de Nadia Toffa de Le Iene "Trieste: l’altra Ilva"]
- Ah! cosa te vol che se movi, finirà come sempre, xe ani che i xe sul giro d'aria de chiuderla e pò gnente.
- Si, e intanto la gente mori e se amala! Ma forsi adeso.. [Leggi l'articolo "I malati della Ferriera, l'Ilva del Nord-Est"]
- No, te vederà. Ghe volesi che i triestini fazi qualcosa, ghe volesi che i se movi un poco e i se daghi de far.
- Deso i cerca de trovar qualchidun che la compri e pò repete, za vedo.. [leggi l'articolo "Ferriera di Trieste, la riqualificazione costerà ai cittadini 42 milioni di euro"]
- Semo noi che dovessimo andar tuti davanti ai portoni e blocar tuto, come xe posibile che sto mostro [Leggi l'articolo "Trieste, la Ferriera assassina e quattro domande alla Procura"] resti ancora verto nela nostra bela Trieste? In ste condizioni pò, almeno che fosi come a Donavitz in Austria.. lori si che sa far, Austria pò! [Leggi l'articolo "Trieste: Donawitz, Ferriera di Servola, Severstal e la riconversione portuale"]
- E dopo i disi che Trieste se vota al turismo! Con sta "fabrica de morte", cusì i la ciama, e i ga ragion! [Leggi l'articolo "Ferriera di Trieste, dati sulla mortalità legata alle emissioni battono Taranto"] Chi te vol che vegni a pasar le ferie? Solo chi che no sa! Ma deso tuti saverà e nisun no vegnerà più! Bela prospetiva..
- Te digo mi, dovemo andar tuti là davanti a oltranza e far serar tuto!
- Enio, te ga ragion, ma no se moverà mai tuti insieme e solo quel ghe volesi, invece solo ciacole xe!



domenica 16 febbraio 2014

La canzon del triestin de oggi - Bella ciau!


Una matina, me go sveiado,
o bella ciau, bella ciau, bella ciau, ciau, ciau!
Una matina, me go inacorto,
chi che xe'l vero invasor!

O triestini, mandemolo via,
o bella ciau, bella ciau, bella ciau, ciau, ciau!
O triestini, mandemolo via,
mi son stufo de patir.

Piutosto moro, ma triestin,
o bella ciau, bella ciau, bella ciau, ciau, ciau!
piutosto moro, ma triestin,
con Miramar sempre nel cuor!

Te me porterà, sul prà in Carso,
o bella ciau, bella ciau, bella ciau, ciau, ciau!
te me porterà, sul prà in Carso,
a sburtar un ciclamin!

E tuti quei, che paserà,
o bella ciau, bella ciau, bella ciau, ciau, ciau!
e tuti quei, che paserà,
i dirà: "Ma che bel fior!"

"Xe questo el fior, del triestin"
o bella ciau, bella ciau, bella ciau, ciau, ciau!
"Xe questo el fior, del triestin
morto per la libertà!"

giovedì 13 febbraio 2014

Lutto a Trieste per i alberi del Viale XX Settembre


- Cos'te pianzi Lina?
- Gniente Fedi.. solo che me diol el cuor veder quei alberi taiai.
- Ah, per quel te pianzi? te me fa ciapar un colpo..
- Beh, no xe poco, xe un pecà de dio, me sento come se fosi morta una persona cara!
- No disevo miga che xe poco.. solo che pensavo te stesi mal. Anche mi me fa mal veder el viale svodo, iera cusì bel, fa sai tristeza, fazeva parte dela storia de Trieste oramai, Rossetti se starà rivoltando in tomba, lui che gaveva tanto fato per sto viale e i alberi!
- Si, e sicuro no i pianterà altri.
- Bon, ma forsi si, vederemo.
- Te digo mi de no, te vederà, resterà cusì e pò bon.
- Scoltime, no i pol, i triestini se incazerà de bruto se i lo lasa cusì, te vederà che i pianterà altri novi, i diseva che quei iera malai e gavesi malà anche i altri che ancor xe sani.
- Fiabe, te digo mi. Altro che rimpiantar, i farà parchegi, scometemo? E a pagamento, per ciaparne bori!
- Ma cosa mai! Mi digo che i li rimpianta, l'unica roba xe che i ghe meterà ani a creser e noi no li vederemo grandi, me sa.
- I farà un parchegio, scoltime. Pò deso che xe anche quela nova palestra in do' che una volta iera l'Excelsior, maledeti lori che lo ga cavà.. iera cusì bei film in quel cine, desso solo robe in 3D che mi me salta i oci. Parchegio i farà perchè cusì i ciapa bori, coi alberi no i ciapava un tubo e anzi i doveva mantenir, e se sa che curar costa!
- Bon, ti te ga le tue idee e mi go le mie, ma mi te digo, iera malai e no se podeva far altro.
- Forsi iera anche malai, ma come mai? perchè no i li ga curai prima? una roba cusì preziosa dela storia de Trieste. Fosimo stai soto l'Austria, col pifero che i li taiava, scometo che i fusi stai sanisimi! Maledeta barca!
- Beh forsi si, se fosimo stai ancora soto l'Austria, gnanche in Val Rosandra i gavesi fato quel pastroc!
- E comunque co te se acorzerà che i farà un parchegio, te se ricorderà de sta discusion. E magari anche soteraneo i lo farà..
- No se pol, xe el torente soto el viale.
- Magari i cava anche quel! Capaci, sa? E pò iera de tempo che i saveva, perchè la Tuli fazeva parte del Comitato e la me ga contà zà tempo fà che iera bisogno de far qualcosa.
- Semo otimisti, dai Lina, te vederà che i rempianterà bei alberei, che dopo diventerà grandi come sti qua che i ga taià. Pensemo positivo. Pò sti qua se iera malai ris'ciava veramente de far dani, pensite se ghe cascava doso de una veceta che pasegiava col can, o se cascava co iera fioi che magnava gelato.
- Su quel no ghe xe dubi, mi malediso solo chi che no xe sta atento a curarli prima. No se pol dir "ormai xe fata", bisogna che paghi qualchidun, punto! I iera malai perchè chi che li doveva curar no ga fato un boro.
- Quel si, concordo con ti, che vegni fora el mus che no ga moso el cul per tempo e li ga lasai morir!
- E che no i se sogni de far parchegi! subito i devi rempiantar, che no me dimentico mi! Deso ogni giorno andarò in viale a veder cosa i combina, mi no i me la caza.
- Bon, anderemo a cior gelato in viale alora, ogni giorno, vaben?
- Si, che cocolo che te son, per quel te go sposà, mio amor!

martedì 11 febbraio 2014

Ultimatum all'Italia, porto bloccato!

 

- Alora? Come iera, Enio?
- Ara Bruna, iera tanta acqua!
- Quel go visto! Vardavo fora del pergolo ogni tanto e ve pensavo.. vigniva zò che Dio la mandava e no gà molà un atimo.
- Per el resto, cos'te vol, no iera de far tanto, se no blocar l'entrata del porto, anzi, le entrate, perchè gavemo serà anche in vial Miramar. Mi e Fedi semo stai poco però, reumatismi e menade varie ne fazeva patir, qualche oretta e dopo semo andai e ciapar caldo in bar. Fortuna che semo in tanti e che tuti se dava el cambio, de pomerigio fin de sera tardi.
- Ma go leto che iera poca gente.. xe vero?
- Pareva, Bruna, pareva poca.. ma inveze iera el fato che bisognava darse el cambio per blocar per diese ore le entrate.. come te fazevi senò? E cusì pareva de meno. Iera tante ore e pochi podeva star tuto el giorno là, un poco perchè tanti lavora, un poco per sto klinz de tempo che iera, che te bagnava anche i ossi. Pò, xe vero che tanti ga lipà e ga tirà paco! Xe el problema un poco dei triestini, no? Che i se imbusa cò xe de farse el de drìo.. e ieri co la piova che iera, iera de farse el de drìo per bon!
- Bon ma quanta gente iera? Te ga visto anche la Beni?
- Dificile dir.. lori disi centinaia, ma col fato che se se alternava, chissà.. forsi anche de più. Importante xe che el porto iera blocà, come promeso, e ala fine gavemo vinto un'altra bataglia, pochi ma boni, come i 300 de Sparta.
- Ara che quei xe morti però.. de eroi, ma i xe morti!
- Si bon, iera per viz, noi, coi seci de acqua che vigniva zò, se sentivimo comunque eroi, e se sentivimo un poco morir, almeno mi e Fedi che semo più veci, ovio che i muli no. E se gavemo imolado anche a nome de chi che no ga podù vignir con scuse lofie! Che pò te vederà che la prosima volta i vegnerà tuti.. gavemo dà l'esempio e son sai contento!
- Bon, si, bravi! Ma adeso cosa naserà? Xe miga finida qua, no?
- No ah, che domande! Ovio che no! Xe pena comincià, i vederà de cos'che se parla, miga fritole! "L’Italia non ha risposto all’ultimatum. Da domani il MTL si muoverà per ottenere risposte non più dalle autorità italiane, ma direttamente dall’ONU. Abbiamo presentato all’ONU un manifesto per il rispetto dei diritti dei cittadini del TLT. Se entro il 15 settembre non avremo risposte, il popolo triestino passerà all’autodeterminazione."  Cusì i ga dito. E cusì sarà!
- Ma la Beni la iera alora?
- No, go visto però la sua amica e la me ga dito che la iera a casa col rafredor, che el giorno prima la iera in gita a Forni sula neve a far la gara e la ga ciapà fredo perchè la iera tuta bagnada. E pò la gaveva de far perchè ghe se ga blocà el computer de lavor co un virus de paura..
- Orca, povera, la ciamerò alora..
- Ah, i muli me ga dito de farte i complimenti per el strucolo che go portà drìo, più grando ghe voleva però..




domenica 9 febbraio 2014

Pulcini a Trieste in Carso


Un ricco e distinto lord inglese, vien in vacanza a Trieste. El ga sentì sai bele robe sul mar, su l'Austria, le osterie, el sincrotrone, Miramar.. e anche sul Carso triestin. Alora, dopo un per de giorni che el iera qua, stufo de farse scarozar in auto de l'autista, el decidi de menar lui steso la sua Rolls Royce e farse un gireto solo, per goderse la pase dei paeseti del Carso e le bele campagnete che ghe xe tra una dolina e l'altra, vardarse i fiorelini pena spuntai e nasar, insoma, i profumi dela primavera.
Tuto fila liso fin che a un certo punto, dal ciglio dela strada, salta fora un pulcin. Co una bela frenada, de quele che te riva el cuor in gola, el riva a schivarlo, el smonta zò e con tenereza el lo ciol su e el ghe disi: "Oh! What a nice baby! Did you get lost?" ("Che picio che ti xe, che cocolo! te se ga perso?")
El se acorzi però che el xe un poco sporco, el nasa e el capisi che xe merda. Alora el tira fora un fazoleto, el lo neta ben con cura e pò el ghe fà: "Go back to your mom, that will be looking for you!" ("va picio, torna dela tua mamina, che la te starà zercando!")
Sodisfato dela bona azion, el se risenta in auto tuto soridente, cò de colpo vien fora un altro pulcin del bordo dela strada. De novo el smonta, lo ingruma su con tenereza e el ghe disi: "Oh! What a nice baby! Did you get lost too?" ("che picio che te son, che cocolo! anche ti te se ga perso?") 
Anche questo, però, xe tuto smerdà, e alora con calma el tira fora un altro fazoleto e con cura el lo forbi tuto, come l'altro, prima de rimandarlo per la sua strada. 
Ancora più sodisfato, a posto co la coscienza per le bone azioni, el se rimeti in auto. Ma proprio quando che el sta per ripartir, salta fora de novo un altro pulcin.. e pò un altro e un altro ancora.. tuti smerdai. De novo el smonta per ingrumarli tuti e netarli ben anche lori, cò de colpo però, proprio col sta per cior el primo, vien fora de un cespuglio la man de un omo che ziga: "Ou! Te gavesi forsi un fazoleto, che go finì i pulcini?"

sabato 8 febbraio 2014

Gara di sci del TLT a Forni di Sopra (Prequiel)



Driiin.. Driiin..

- Pronto? Chi xe?
- Ciau Bruna, son mi, Lina.
- Oh Lina, te pensavo propio deso, come xe? tuto ben?
- Si dai, disemo de si, e ti? con la schena come xe?
- Ma vara, continuo a meter sti ceroti che scalda e far massagi e devo dir che un poco iuta.. xe sto tempo umido che inveze no iuta gnente!
- E cos'te vol? Xe cusì ah.. almeno no xe fredo e iazo come l'altro ano che no te podevi 'ndar fora de casa senza iazini, almeno qua a San Luigi, che xe tuto impirà.
- Contime tuto, perchè te me ga ciamà?
- Ma gnente, volevo saver come te stavi e se vignì anche voi doman a Forni di Sopra, visto el tuo mal de schena..
- Si ah che vignimo, te son mata che me perdo la prima gara de sci del TLT? scherzemo?
- Ah bon, sa, no xe per mi, ma son preocupada un poco per Fedi, almeno se xe anche Enio i se buta l'ocio un co l'altro.
- Uh te sta fresca alora.. anche lui xe testa mata. Ancora no go capì se i fa per bon anche lori, la gara, o se i vol solo vardar. A mi el me ga fato una testa compagna che el vol far, ma no rivo a capir se el scherza o el parla sul serio..
- Credo propio che i parli per bon alora, anche Fedi me ga dito che i fà! i xe mati!
- Mi no rivo a capir, i xe pieni de magagne e i va a zercarle col lumin! No i capisi che a una certa età xe meo lasar star?
- Ara, manca solo che i se spachi una gamba! Ma no gufemo dai, che ancora ghe portemo pegola.. Speremo che vadi ben e pò bon!
- Ah, mi conoso Enio ormai.. el me ga tanto dito che el andarà pian, solo per partecipar, perchè bisogna far in modo che sta gara sia sentida e gabi suceso, che xe una bela iniziativa, che unisi i triestini.. e tante robe insoma! ma so za, el se laserà ciapar dela gara e el vegnerà zo come un balin, come se el gavesi 20 ani.. coi muleti el se meterà a competer! mi lo conoso..
- Pò figurite con Fedi vicin, forsi iera meio se i ndava soli e no insieme.. i se monterà un co l'altro e i farà gara fra de lori! Come co i auti pò, e dopo i se s'cioca! Ormai riflesi xe quel che xe..
- Se pò sarà anche quei fenomeni de altri amichetti.. figurite, sicuro partirà qualche genocio!
- E speremo solo che no sia quel de lori ah.. tanto altro no podemo far!
- Mi, se Enio se fa mal e el me devi star un mese per casa co la gamba dura, piutosto lo mando ala Salus! cosa mai, per ste monade de infermierina mi no ghe fazo, ghe go za dito! che el se rangi!
- Si ah, no esisti.. lori fa i mone e noi sgobemo? e cosa semo? ebeti? che i se rangi si, se i se fa mal i pagherà!
- Bon dai, speremo che i vadi pian per bon come che i ga dito, tanto i ga anche el casco!
- Mi a Fedi ghe fazo meter la tuta de moto de nostro nipote, quela che ga quei tochi duri per proteger i ossi.. ghe go dito "o cusì o gnente, fà ti!". La ghe vanza un poco perchè mio nipote xe grando, ma no fà gnente. Lui disi che xe ridicolo ma mi no me frega, o cusì o gnente!
- Bona idea, deso ghe digo anche mi a Enio, tanto so a chi domandarghe una in prestito.. ara te saludo e ciamo subito, se sentimo dopo. Brava, ara, proprio bona idea!
- Si ah, quele tute xe fate per cascar in moto, cosa te vol che sia coi sci? tanto diverso? E scolta, merenda cosa te porti?
- Solito, panini, un poche de polpete e dopo go fato strucolo. Ti?
- Devo ancora far, ma bon che te me ga dito, volevo far strucolo anche mi, ma a sto punto farò gnochi de marmelata oltre che i soliti panini e polpete anche mi.
- Bon, a dopo alora.
- Ah, se no te trovi una tuta per Enio, dime, che mio nipote dovesi aver anche quela de sua morosa che a Enio ghe dovesi comunque andar ben, che ela xe un calandron e la ga taia grande.
- Bon grazie, vaben, casomai te digo dopo.
- L'unica roba.. la xe tuta color rosa, ma meo de gnente, no?

mercoledì 5 febbraio 2014

Spionaggio a Trieste


- Ciò Lina, come in guera freda semo.. te ga visto?
- Cossa Fedi? cosa mai fredo? se no gavemo mai avudo inverni più caldi!?
- Ma nooo.. guera freda, no tempo fredo.. so anche mi che fà caldo, bon per i ossi!
- E cosa te disevi alora? cosa ghe entra la guera freda?
- El spionagio Lina, iera un riferimento a quel che i scrivi oggi in rete, no te ga leto?
- Scolta, son che stiro de stamatina bonora le tue camise, cosa te vol che gabio leto? contime ti, no?
- Ma niente.. i ga trovà una telecamera nascosta in centro per spiar i simpatizanti del TLT, par che la gabi messa i carabinieri coi tecnici dela Telecom?
- La Telecom? e cosa i fa anche telecamere desso?
- Ma nooo, sicome che i carabinieri la ga messa in una cabina dela Telecom alora i ga fato coi tecnici de lori.. cussì par almeno!
- Urca, ma a sto punto semo? chissà quante che sarà che noi no savemo alora!
- Eh si, pol esser, semo tornai indrìo de qualche decenio, co iera guera freda e Trieste iera un covo de spie.. tuti che se spiava un co l'altro! Bon ah, mi comunque no go de sconder gnente, che i fazi pur, però me urta un poco che i fa tanto casin co sta privasi, o come se ciama, e i te fa firmar mille moduli e dopo i ne cuca de sconton cos'che femo. I ne ciol pel cul! Speremo che Semeta con tutte le Nazioni Unite rivi presto, ara!
- Che i vadi remengo! Te vedi Fedi? ti che te disi sempre, "chi te vol che te vardi", co me fazo i cavei per andar fora! bisogna sempre darse un contegno in publico, cavei a posto e mudande nete, che no se sa mai un malor e te devi andar de corsa in ospedal!
- Cosa te gufi? Tochemo fero dai, gnente dotori!
- Mi no gufo, xe cussì, bisogna sempre esser preparadi, me diseva mia nona co iero picia, e no la sbaiava un colpo!

venerdì 17 gennaio 2014

Le scovaze geniali de Trieste



- Che i vadi a remengo!
- Con chi te la ga Enio?
- Con chi che la go? No te son ancora ndada a buttar le scovaze ti, no?
- Orca, l'altro giorno iero, perchè?
- No, l'altro giorno iero mi! De una settimana che vado mi, ecco perchè te me domandi, sinò te imprecavi anche ti!
- Ma cossa nassi Enio? Dime.
- Nassi che se te va zò in strada a veder i bottini novi che i ga messo, no te capissi se i xe tumbani veramente o i ne ciol pel cul!
- Perchè? Cossa xe nato? Cossa i ga fato?
- Bon, ara, te conto, anche se te dovessi veder per capir.. Un pochi de giorni fà, desso no me ricordo quando esattamente, son ndà zò a butar le scovaze e go visto che iera i bottini novi. Finalmente, go pensà, perchè iera de tempo che i iera tuti roti e a remengo. Fato stà che vado vizin per butar i dò sacheti che te me ga dà e no trovo el pedal per verzerli.
- Che pedal?
- Ma Bruna, el pedal, quela sbara de ferro che te frachi col pìe e se alza el covercio, no? Bon, no vedo e zerco de capir come far.. alora vedo che i ga un buso sora e vardo come verzer sto buso, ma no capivo ah.. no ghe iera nissun covercio, sa, iera solo come due scove, una di fronte all'altra che coverzeva el buso al posto del covercio. Vardo ben e alla fine go capì che te dovevi fracar dentro i sacheti tra ste dò scove!
- No go capido sai ben, Enio, spieghite.
- Te go dito, come due scove grandi, nere, senza manigo, de traverso, che tappa el buso!
- E come te buti le robe dentro?
- Per quel te digo, xe un casin, te toca fracar, traverso de ste scove! Pò bisogna anche esser alti, ti no so se te rivi, che te son più picia de mi, che rivavo per un pel.
- Ma cossa, i xe fora? Ma come i se ga sognà sta roba?
- Mah, devi aver inventà qualche ingegner genio in comun, coss'te vol che te digo? Sa che qua a Trieste semo famosi per i mati, no? Se vedi che qualchidun xe finì in comun!
- Bon, ma forsi sarà studiai per far che sia più facile butar..
- No, no, te go za dito. Ti no te rivi, xe tropo alto, e pò te devi anche fracar sai forte perchè no passa facile. Coss'te credi che bestemio a far? Me go tutto smerdà perchè te me ga dà el sacheto che iera robe mole dentro e liquide..
- Umido ah pò! I disi de differenziar e mi fazo, ingrumo tutto a parte e te go dà anche quel del'umido.. Coss'te vol che lo buto in gabineto?
- Ma si, ma si, no xe colpa tua, xe colpa de quei geni che li ga pensai e quei tumbani che li ga fati e messi là, senza provar.. Che li ciapi le strighe! Ara son tutto che iozo ancora, e pò spuza, me par che xe banane marze che iera in sacheto, varda, tuta la maniga dela giaca me go sporcà!
- E come faremo alora?
- Ah, facile! Una volta i me frega mi, la seconda i ciapa! E infatti el secondo sacheto lo go lassà impiccà fora e lo butterà dentro i scovazini! No capivo infatti perchè iera pien de sacheti impicai de fora.. desso so! Se vedi che anche i altri se ga imparà!
- Urca ma se xe cussì allora vegnerà fora un schifez e un spuzon là intorno!
- Per mi no i dura sai, prima o dopo ghe darà fogo qualchidun! Pensite che iera una signora, povera, che la gaveva ingrumà i bisogni del suo can e no la saveva come buttar dentro..
- Che schifo! E come la ga fato?
Eh, no so, povera.. la iera là che la pensava come far co son rivado e la iera ancora là co son ndà via.. la gaverà messo in borsetta e portà a casa forsi, o la gaverà lassà là.. no credo che la gabi avù coraggio de fracar dentro! E dopo i se lamenta che la gente no ingruma le merde de can!
- Ma proprio tanto bisogna fracar, Enio?
- Si Bruna, te go dito, fracar forte te devi in quelle klinz de scove!
- Sempre geni gavemo qua a Trieste! Ara ti! Maledeta barca!

mercoledì 8 gennaio 2014

Montedoro o MonteDeScovaze?



- Mi no rivo a capir come xe possibile una roba compagna.. e nissun ne disi gnente, o poco gnente, e ancora pezo nissun fa un'ostia!
- Coss'te ga Piro, de coss'te parli?
- Enio, purtroppo de robe vere parlo.. ti te son de Trieste e te xe andà ben, ma mi che vivo a Muja son sai preocupado. No te ga sentì de Montedoro? Che xe tuto inquinà?
- Ma Montedoro el centro commerciale? Come inquinà? Cossa i ga combinà?
- No, no.. no c'entra un boro el Centro Commerciale! Xe inquinamenti seri, de decenni che xe e nissun ne ga mai dito! Almeno mi no gavevo mai sentì prima.. e son de Muja! Ara, varda qua e te capirà:



- No posso creder! Ma come xe sta roba? E nissun fa un tubo?
- Ara, no so mi, spero solo che desso che xe vignù fora in rete sta roba (leggi articolo), la vegni ben diffusa dai media e che tutti movi el cul per netar sto schifo! 
- Come sempre se la ciapemo noi triestini in quel posto, te vederà che ne tocherà pagar noi e rangiarse per netar le magagne dei 'taliani!
- Bon, vederemo coss'che toca, ah.. però xe un poco una ciolta pel cul che i lo ciami Montedoro, no te par?
- Parecchio, si.. i dovessi ciamarlo MonteDeScovaze, altrochè!
- Bravo, MonteDeScovaze me par più idoneo, si! Mi me fa troppo imbestialir ste robe.. ghe volessi ciapar i responsabili e serarli tutti in un de quei busi inquinai per un mese! Cussì i impara!
- Che pò se parla anche forsi de armi chimiche.. ben messi semo!
- Bon ah.. speremo che rivi presto le Nazioni Unite qua, a tirarne fora de sta melma!
- Magari ara.. sa che festa che femo dopo?
- Altrochè! Baldoria per tre giorni de fila, femo!