Gita in Italia e Elezioni Europee

- Enio, movite che femo tardi.

- Come tardi? Xe apena le nove..

- Apunto, a Villesse i verzi alle dieci, semo tardi.

- Ma vara che xe verto fin de sera, sa?

- Cosa c'entra? no se sa mai, meti che dopo no rivemo a cior tuto..

- Ma cosa.. no te se sognerà miga de star ore là dentro? No te dovevi cior solo l'armadieto pel gabineto?

- Si, ma Lina ga de cior anche due robete e pò lori va là subito co verzi, cusì ghe go dito che se trovemo là fora alle dieci.

- Con Lina? Noo, ma no te me gavevi dito, no val.. te sa che quela co ga de cior una roba la perdi ore.. mi no go miga la pazienza de Fedi.. pò lui se la ga scelta e sposada e ghe toca, mi perchè devo patir con lui, che no c'entro un boro?

- Ti te c'entri eccome.. no te me ga pur sposado e scelto a mi? e mi te digo andemo, movite!

- Che giornada ara.. meno mal che xe anche Fedi, almeno gaverò de ciacolar qualcosa.. ciogherò in edicola el primo numero de Trieste Libera News.. almeno gaveremo cosa leger..

- Ah.. cosa? xe za fora? No me ricordavo..

- Ma come.. te go tanto dito! Desso che pasemo davanti lo ciogo al volo, son sai curioso de leger.

- Si, anche mi. Lo legerò in auto, intanto che te guidi.

- Ara che dopo te ciapa mal, za l'altra volta te ga avù nausea tuto el giorno..

- Ma cossa mai! te vederà che no me fa gnente..

- Bon alora te legerà forte, no val che ti te legi e mi me toca guidar, anche mi son curioso.

- Va ben, basta che no te zuchi, che ormai te ga pochi punti ancora, manca solo che i te cavi la patente, cosa femo dopo? Andemo co la filovia, come i Belich, che lui se ga fato portar via la patente andando in superstrada controman?

- Ma si dei, sta bona, no state procupar. El Belich xe un caso unico, mi no fazo ste robe, al massimo zuco un poco.. co servi però! Pò xe colpa tua, te me fa sempre furia ti.. co sta storia che ogni volta no te son mai pronta e te se devi far bela come se te dovesi andar de la regina de Inghilterra, femo sempre tardi. E mi recupero, ah.. E comunque l'altra volta, za che salta fora, gnanche no corevo.. per mi, te go dito, i mati.. bon lasemo perder, che me vien nervoso!

- Alora? no te se cambi? cos'te speti?

- E cosa me devo cambiar? Son pronto.

- No te vegnerà miga cusì, no? Metite un per de jeans, te son fora moda oramai, sempre serio, sembra che te vadi a messa o a un funeral.

- Ma cossa jeans, miga andemo in prà.. son ben cusì, e no frizerme.. te digo forsi mi che cotola meterte?

- Te son vecio dentro, un poco più casual te dovesi vestirte.. ara el marì de la Irma che xe sempre alla moda, lui si che se vesti ben..

- Ma te prego, per l'amor del ciel.. se l'altra volta el gaveva le braghe rosse? Te vol che me meto come un paiazo? Iera tutti, in Osteria de Rudi, che no fazeva altro che ciorlo pel fioco e darghe zò.

- No digo braghe rosse, ma un poco più giovanile, no? Un per de jeans e un bel maionzin.. te dovesi andar a ciorte vestiti con tuo nipote, no con Fedi!

- Bon, no te gavevi furia? Andemo.

- Speta, go ancora i cavei de farme, ma dieci minuti e son pronta. 

- I cavei in dieci minuti? Ma chi te credi!? Sa l'ultima invece? Go visto, prima che portavo el can, el Marsich..

- Chi xe el Marsich?

- Quel che ga quel cagneto picio, che baia sempre e fa un casin del diavolo. Quel che abita de poco in casa de Lina e Fedi.

- E bon, e alora? Perchè te me conti?

- Perchè el me ga tacà boton, el me ga dito che el ga scoperto de poco tuto el lavor che sta fazendo i triestini per riapropriarse del dirito de citadinanza de Trieste.. el xe proprio in piena, felice lo go visto.

- E si, te credo. Co un scopri l'inganno, ghe par de aver visto Lazzaro risorto.. all'inizio no ghe credi, pò el comincia a renderse conto e ghe se impiza de novo una luce.

- Proprio cusì el pareva, iluminado. El ga dito che anche lui no andarà a votar, anzi che el anderà a non-votar, a far insoma la dichiarazion de non-voto ativo, e el pareva col morbin, ringiovanì come.

- Te ghe ga dito che noi za l'altro anno gavemo fato la dichiarazion de non-voto ativo?

- Si ah, el gaveva ancora qualche dubio, sa, quele robe tipo "ma dopo che conseguenze gaverò?" "i me arresterà?" Robe de l'altro mondo, ghe go dito, e ghe go contà de quando semo andai noi l'altro anno, che za i saveva tuto quei del seggio, cosa far e cosa compilar nel verbale che i ga lori, e i ne ga sorriso e quasi dito bravi, se capiva che i la pensava come noi, e ghe go anche dito che a Fedi uno ghe ga diritura strizà de ocio. Ma infati l'altro anno ga fato tanti, e se ga visto pò quanta gente che la pensa come noi, se ga visto el 15 settembre el vero consenso!

- Pò sto anno xe ancora più importante far la dichiarazion, perchè xe le europee, no? E se i ne fa votar xe elezioni ilegitime! Parlemo de votazioni europee ilegitime, che vegnerà denunciade e quindi tuta l’Europa doverà per forza ciaparne in considerazion sul serio e no i poderà far finta de gnente e serar un ocio per farghe un favor al’Italia. Te ghe ga spiegà, si? Ma anche lui iera el 15 settembre?

- No, nol saveva gnente, e sai ghe dispiasi, sto altro anno nol vedi l'ora de vignir però.. E comunque ghe go spiegà ben, si, l’importanza de ste europee.. noi ghe denunceremo l’ilegitimità delle elezioni per colpa de l'Italia che ne permeti de votar anche se no podemo, fazendo finta che semo italiani, ilegitime perchè xe sta imposte in un stato che non fa parte dell’Europa, el nostro caro Territorio Libero de Trieste, e el Parlamento Europeo ghe domanderà conto alla Comunità Europea, che.. eccetera eccetera.. no vedo l’ora, ara! Insoma.. robe de Bruxelles e Strasburgo, sa? miga frotole!

- Sarà ancora de più sto 15 settembre, vederemo, no vedo l'ora anche mi.. Bon son pronta, va intanto a scaldar l'auto che rivo.

- No come al solito che te me fa spetar mezza ora col motor impizà però! Te son bela cusì, no ripensamenti dell'ultimo minuto, quela cotola, quele scarpe e quel capotin.. e sopratuto quei cavei, me raccomando!

- Ma si, ma si.. va dei, che te me intrighi qua, no rivo a pensar se me dimentico qualcosa.

- Ma vara ti se per cior un armadieto pel gabineto me toca andar fin là e perder tuto el giorno, che pò so za che torneremo co l'auto piena de strafanici!

- Sempre che te sbufi.. come se no te savesi anche ti che convien! In Jugo se va a far benza, in duty free se ciol ciche e propoli, spesa se fa a Capodistria e per cior armadieti e robe de casa se va in Italia a Villesse ah.. normale pò!