Festa dell'Indipendenza del TLT a Trieste

- Nono, te me conti de domenica, de la Festa del TLT? La maestra ne ga dà de far un tema e mi gavevo le gare e no iero, e la ga dito che chi che no iera podeva domandar a chi che iera e far finta de far interviste.

- Cossa cossa..? Ripeti pian che no go capì un'ostia.. chi che iera chi? e dove?

- Ma ala festa de domenica.. no te ieri? La ga dito che chi no iera fisicamente presente, podeva farse contar de chi che inveze iera.. e scriver el tema come una specie de intervista.

- Ah bon, go capì si.. te devi parlar o più lento o più forte.. tu nono ormai xe vecio e se te parli tropo svelto e pian, no capisso ben..

- Vaben nono.

- Bon.. insoma, disemo intanto che sta manifestazion iera per festegiar l'aniversario, 66 anni, de quando che el 15 settembre 1947 xe stà emesso el proclama n. 1 del GMA, che sarìa el Governo Militare Alleato, e con sto proclama se pol dir che nassi efetivamente el Territorio Libero de Trieste. Vara qua:

- Ah per quel xe Festa de "Indipendenza"? Perchè de quel giorno esisti el TLT?

- Bravo! Si.. quel giorno xe propio nato el Territorio Libero di Trieste o Free Territory of Trieste o Tržaško Slobodno Ozemlje, o più facile TLT-STO-FTT. El Territorio Libero iera diviso in 18 comuni, la bandiera disi chi che desso li occupa ufficialmente e abusivamente:

Zona A:
Duino-Aurisina (Devin-Nabrežina)    

Sgonico (Zgonik)    

Monrupino (Repentabor)

Trieste (Trst)    

Muggia (Milje)    

San Dorligo della Valle (Dolina)

Zona B:
Villa Decani (Dekani)    

Capodistria (Koper)    

Isola d'Istria (Izola)    

Pirano (Piran)    

Maresego (Marezige)    

Monte di Capodistria (Šmarje)    

Umago (Umag)    

Buie (Buje)    

Verteneglio (Brtonigla)    

Grisignana (Grožnjan)    

Cittanova d'Istria (Novigrad)

Per questo tanta gente xe scesa in strada a sventolar bandiere, perchè i chiedi alle Nazioni Unite de intervenir per ripristinar la corretta citadinanza e nominar un Governator.

- Ma iera tanta gente come i disi?

- De più, sicuro de più de quel che i disi.. i giornai ga scrito 3500, ma no xe gnanche la metà, qualchidun altro inveze sui blog ga dito 8000, e non a torto.. tanti giornai intortai coi politici vol sminuir perchè.. ma xe un altro discorso, lassemo star desso.. Sappi che la testa del corteo iera za rivada in Corso Italia co ancora zente che doveva partir de la Stazion.. tute le Rive piene iera, de teste e bandiere, coi tamburi e applausi e zighi e cori! Un casin!

- Ma casin.. longhi? Feridi e taferugli te intendi? Go visto anche polizia, nono, nele foto..

- Ma nooo.. casin de gente e de festa iera! Quel tipo de casin disevo, dove tuti se diverti e xe contenti.. mai vista tanta gente andar tuti cussì d'acordo!
Pò no iera miga solo triestini.. iera gente de fora anche, triestini che lavora e vivi fora de Trieste e xe vignui aposta per festegiar e far la manifestazion che ga organizzà el Movimento Trieste Libera.. anche tanti sloveni e croati iera.. anche là i se sta movendo. Ara, go leto propio l'altro giorno su un blog de Isola che i se movi anche là. Sarìa propio ora che tuti lassi el passato e vardi un poco più in là, sopratuto per voi, fioi!

- Feeediiiii!  Movite, vignì a magnar che se sfredaaa!

- Te pol vardarte i video che gavemo registrà per farte ben un'idea, xe quasi tuta la manifestazion.. la qualità xe cista e se vedi come i orbi!.. Enio, che doveva riprender tuto co la nova videocamera, ga fato el corteo in giro per tuti i gabineti del centro.. In tuto xe sette video e nel sesto se senti anche tutto el comizio, vardili che merita!

- E cossa el gaveva?

- Mal de panza pò, scagot.. sai, sai forte! Cussì ne ga tocà far col telefonin de tu nona, che xe quel che xe! Movemose! Andemo dei, che la ga fato i gnochi col gulash che te piasi e se se sfreda xe un pecà!

66° Anniversario TLT - Video

I video de un giorno indimenticabile.. la rinascita de Trieste! Finalmente i triestini ga mosso el cul..

La playlist completa (vol dir che parti tuti in automatico.. un drìo l'altro)

I singoli video in ordine de ripresa

66° Anniversario TLT - Foto

Le foto del 66° Anniversario del TLT - Territorio Libero di Trieste. 

15 Settembre 2013..  Noi ierimo, el prossimo anno saremo, e quei dopo anche!

(clicca sulla foto sotto)

15 settembre 2013 - Corteo Liberiamo Trieste!

Din Donnn..
 - Fedi, va ti a verzer, che no rivo..
 - Pronto? Chi xe?
 - Ciao Fedi, son mi, Enio, posso far un salto su o disturbo?
 - No, no, vien..
 - Ciau! Ciau Lina, come te sta? No disturbo spero..
 - Ciao Enio, no dei, figurite, stago cusinado.. Fedi fà caffè.. te bevi, no, Enio?
 - Meto su la cogoma.. te vol anche un biscotin?
 - No Fedi, grazie, ma go ancora la panza che me buliga..
 - Ma cossa te xe nato ieri alora, conta..
 - Ara.. ti e quela maledeta idea che te me ga dà de cior la purga! Tu marì xe un fenomeno Lina.. el me ga sugerì de cior due tre volte la dose consigliada de purgante per evitar de ndar a l'apuntamento col giudice de pace, che cascava propio el giorno del corteo Liberiamo Trieste.. una scusa vera ghe voleva e quindi un certificato medico, cussì go ciolto el purgante e go ciamà el dotor che vegni a farme la visita, tuto per poder de pomeriggio andar a far la storia per la nostra Trieste.
 - E come xe andà?
 - E come te vol che vadi? De quel punto de vista xe ndà ben, el xe vignù e quasi nol me ga visto, tanto che ndavo in bagno. El me ga fato el certificato e pò bon!
 - E ti come te stavi?
 - E come te vol che stavo? Scagot gavevo, sai sai forte! Ma meio che no conto oltre! Tanto che me ga durà fin de sera tardi..
 - Ma ieri te gavemo visto pur, alla manifestazion..
 - Lina, se te pensi ben, no lo gavemo visto a esser sinceri.. lo gavemo intra-visto! Hahaha..
 - Infatti Lina.. Stavo mal che no te digo, la panza che me se girava.. ma mi volevo vignir a tuti i costi! Cussì ghe go dito a Bruna che me cioghi un pacco de fazoleti de carta e via mi!
 - Bravo, cussì se fa, nissun ne ferma!
 - Si, pecà però che no go visto un tubo.. o meio, go visto i gabineti de tutti i locai verti lungo el percorso del corteo!
 - Hahaha.. per quel te sparivi in continuazion.. e noi che pensavimo che te ndavi a bever!
 - Magari! Go provà a bever un bicer, ma come go butà zo, xe tornà fora de l'altra parte! Ara, no steme far contar.. Inveze, conteme voi e ben, dai, che tra el tempo in gabineto e el mal de panza no go capì un'ostia de tuto quel che xe sucesso. Go leto qualche articolo, ma voio saver de voi ben come xe andà.
- Alora, dove che se gavemo trovà te ga visto, no? Ierimo in Piaza dela Stazion de le quattro, e là za se capiva che iera un fraco de gente, però sicome la piaza iera granda e tanti doveva ancora rivar, no pensavimo che iera propio cussì tanti. Se gavemo inacorto de quanti che ierimo co xe rivada l'ora de partir.. Noi, che no ierimo nè davanti in testa, ne de drio in fondo, semo partidi mezora dopo i primi e co semo rivadi sule Rive, la testa iera za sparida in Corso Italia.. e iera ancora zente che partiva! un putiferio de zente! Bon, tuti che sonava tamburi, cantava, sonava trombe.. stiscioni e bandiere che svolazava! Bon che el tempo ga tignù e che no xe vignù el lavon, che senò sarìa sta longhi!

- E Fedi, dighe anche de quel coso che svolava..
- Si, si, Enio.. iera nache un robot telecomandà che svolava per far le riprese dall'alto, un drone.. una specie de elicotterin con tante eliche che svolava sora de noi.
- Che roba ciò! quel no lo propio visto, meno mal che iera i bareti verti.. se me tocava farla drìo un canton i me gavessi anche filmà!
- Te se imagini che rider Lina, su youtube veder Enio cucià co le braghe calade.. no ga prezo!
- Tasi ara, tuta colpa tua! Bastava una che ciogo, no tre.. che mi volevo pò, ma Bruna dopo ga insistì "E se dopo no te fa effetto?" la diseva, "Va sul sicuro".. Sul sicuro che go perso diese chili! Bon, ala fine gnanche ela se ga divertì.. col fatto che iera un sacco de gente e gavevimo paura de perderse la me ga seguì in tuti i gabineti.. povera! e te dovevi sentirla de sera.. dopo el mal de panza, el mal de testa gavevo! miga colpa mia ciò, anzi!
- Comunque, ricapitolando, gavemo fato tuto sto giro, ritrovo in Piazza della Stazione ( Piazza Libertà), Via della Stazione (Corso Cavour), Via Canalpiccolo, Corso (Corso Italia), Via San Giovanni (Via Imbriani), Via del Torrente (Via Carducci), Via Valdirivo, Via della Dogana (via Roma) e Piazza della Borsa, dove che xe la sede nova del Movimento Trieste Libera. Là i ga fato un breve comizio in italian, inglese, sloven, tedesco e alla fine in triestin. Niente de tale, poche parole, ma ricche de significato, da diverse persone in diverse lingue e alla fine Roberto Giurastante ga lucidamente esposto el nociolo de la question in termini de legalità.
- Ehh mi là go comincià a star un poco meio.. alla fine de tutto! Giusto quel che bastava per perderme anche el discorso e pò ga comincià a passarme!
- Beh, bon! ma tanto te poderà scoltar e veder tuto con calma, xe pien de foto e fimati in rete.. l'importante xe che te poderà dir che te ieri, magari col scagot, ma te ieri! E credime, el corteo de ieri, resterà nella storia!
- Si, si.. e i foghi che i ga fato a sorpresa? sarà i primi de una lunga serie de anniversari! Iera pochi, ma iera caldi e sentidi, te vederà cossa che sarà tra venti anni! Varderemo le foto de sti primi e ne corerà una lagrima zo pel viso..
- Se saremo ancora! tochite..

15 settembre a Trieste

- Ma vara ti ciò, orca, proprio el 15 dovevo aver l'appuntamento..

- Che appuntamento te ga? Cossa xe ste robe che no so, Enio?

- Niente Bruna, sta calma, miga robe galanti! Gavemo el giudice di pace, no te se ricordi?

- Ah.. cossa, el 15 gavemo? Orca e come femo? No dovevimo andar al corteo de TLT?

- Appunto! quel xe el problema! Dieci mesi che spetemo de esser convocai per via de quei mone del quarto pian e proprio el 15 doveva cascar!

- E scolta Enio, no se podessi spostar? Magari se te ghe telefoni..

- Go za provà, no se pol, orca, l'unica xe problemi de salute.. quel pensavo.. dovemo inventarse qualcosa Bruna mia, al corteo noi dovemo andarghe, costi quel che costi!

Plim plooom..  Plim plooom..

- Chi xe qua Bruna, te speti gente?

- No ah, cossa so mi, va a verzer e vedi chi xe..

- Si? chi xe?

- Son mi Enio.. Fedi, disturbo?

- No, te scherzi? Vien su dai.

- Bon, rivo, verzi el porton però, se no te verzi..

- Ah si, ecco.

- Xe Fedi, Bruna, metti su caffè.

- Xe anche Lina?

- Cossa so mi? Desso vederemo..

- Ciao, permesso. No disturbo, sicuro?

- Ma cossa mai, dai, anzi, te pol dar una man.

- Ara che go due ernie, cossa te servi?

- No, tranquillo, no xe de rucar. Servi mover l'ingegno.. scolta qua. Te se ricordi che gavevimo fato una causa a quei del quarto pian per quel camin abusivo che i gaveva fatto?

- Si, cossa nassi? gaverè miga perso con quei mone, no?

- No, no.. ancora xe alto mar.. el 15 gavessimo appena de andar co l'avocato del giudice di pace che..

- El 15? ma sto mese? settembre? ma no xe la festa del TLT? no gavevi dito che vignivi anche voi?

- Eh, infatti.. per quel te pol iutar, ne servi una scusa per no andar del giudice e rimandar, solo una causa de salute pol esser.. documentada anche!

- Beh xe importante sta festa, xe el giorno prima de l'evento conclusivo de la serie "dialoghi con i Cittadini" che se tien (non a caso) a Trieste el 16 settembre 2013 alla Presenza de la Vice Presidente della Commissione, Viviane Reding.

- Proprio ghe disevo a Bruna un attimo fà, mi a qualsiasi costo ghe vado, e co la bandiera albardada in man!
El 15 settembre 1947 xe entrà in vigor el Trattato di pace, che all'articolo 21 ordina:

È costituito in forza del presente Trattato il Territorio Libero di Trieste, consistente dell’area che giace fra il mare Adriatico ed i confini definiti negli articoli 4 e 22 del presente Trattato. Il Territorio Libero di Trieste è riconosciuto dalle Potenze Alleate ed Associate e dall’Italia, le quali convengono, che la sua integrità e indipendenza saranno assicurate dal Consiglio di Sicurezza delle Nazioni Unite.
La sovranità italiana sulla zona costituente il Territorio Libero di Trieste, così come esso è sopra definito, cesserà con l’entrata in vigore del presente Trattato.
Dal momento in cui la sovranità italiana sulla predetta zona avrà cessato d’esistere il Territorio Libero di Trieste sarà governato in conformità di uno Strumento per il regime provvisorio, redatto dal Consiglio dei Ministri degli Esteri e approvato dal Consiglio di Sicurezza. [...]

Te devi darme una man a trovar una scusa.. xe troppo importante! Ti te son bravo, no, in ste robe?

- Te digo subito Enio, xe facile.. Ti de matina te se svei bonora, te bevi un bicier de acqua con dentro sciolto el tabacco de un cichin. Te speti co la calma un'oretta che fazi effetto e rivi la febbre, e co te vedi che se alza un poco la temperatura te ciami el dotor, te ghe disi che te ga mal de panza e te lo fa vignir a domicilio. Prima che el rivi te ciol una bela purga, in modo che col rivi te ga de andar in cesso.

- E basta cussì? Ma te son sicuro?

- No go mai provà, ma iera Aldo, che ga fato anni de carriera militar, e me contava che sto qua iera un metodo che usava certi soldai inamorai el giorno prima che el regimento dovessi andar in mission, per star a casa co la morosa e no dover partir.

- Bon ah, alora xe deciso, un poco de scagoto e via. Ma dopo riverò a vignir al corteo? In quanto tempo passa? No xe che me toca vignir col panolon?

- El panolon xe el meno, spero che no te servi, sinò stame lontan! El pezo sarà el cichin bevudo.. te farà sai nausea tuto el giorno.. però te poderà vignir. E forsi che qualche bicer de rosso te caverà tuto e te salterà come un fiol..

- Infatti, volevo dir! anzi, più che un bicer de rosso, me porterò la fiascheta co la grapa de Rudi che no se sa mai! Quela fa risuscitar i morti!

- Bruna, ciche sicuro gavemo, ma purga? Fazo un salto in farmacia a cior?

- No, gavemo za, sa che son organizada e go tute ste robe.. ma.. Fedi, quanta purga el ga de cior?

- Ah no so mi.. Al posto suo ciolessi due o tre volte tanto quel che i scrivi de cior.. dopotutto devi sembrar che el sta mal, no? Cussì xe sicuro che el dotor ghe scrivi sul certificato. Se dovè esser sicuri per via del giudice..

- Urca cussì tanta? Bon ah, vederemo, go un poca de paura però..

- Bon adesso devo andar, iero del feramenta qua soto e son solo vignù a saludarve, go Lina che me speta a casa per andar de la paruchiera.

- Ma come, no la iera l'altro giorno?

- Bruna, a mi dime.. sa come la xe? la vol esser ben perchè la disi che i farà foto e video del corteo e resterà nela storia oltre che a girar su internet e tuto el mondo varderà. Te la conossi, no?

- Si, si, saludimela, ciao!

- Va ben, certo! E Enio.. portite la bandiera, ricordite.. e magari per sicurezza anche el pannolon!