15 settembre 2013 - Corteo Liberiamo Trieste!

Din Donnn..
 - Fedi, va ti a verzer, che no rivo..
 - Pronto? Chi xe?
 - Ciao Fedi, son mi, Enio, posso far un salto su o disturbo?
 - No, no, vien..
 - Ciau! Ciau Lina, come te sta? No disturbo spero..
 - Ciao Enio, no dei, figurite, stago cusinado.. Fedi fà caffè.. te bevi, no, Enio?
 - Meto su la cogoma.. te vol anche un biscotin?
 - No Fedi, grazie, ma go ancora la panza che me buliga..
 - Ma cossa te xe nato ieri alora, conta..
 - Ara.. ti e quela maledeta idea che te me ga dà de cior la purga! Tu marì xe un fenomeno Lina.. el me ga sugerì de cior due tre volte la dose consigliada de purgante per evitar de ndar a l'apuntamento col giudice de pace, che cascava propio el giorno del corteo Liberiamo Trieste.. una scusa vera ghe voleva e quindi un certificato medico, cussì go ciolto el purgante e go ciamà el dotor che vegni a farme la visita, tuto per poder de pomeriggio andar a far la storia per la nostra Trieste.
 - E come xe andà?
 - E come te vol che vadi? De quel punto de vista xe ndà ben, el xe vignù e quasi nol me ga visto, tanto che ndavo in bagno. El me ga fato el certificato e pò bon!
 - E ti come te stavi?
 - E come te vol che stavo? Scagot gavevo, sai sai forte! Ma meio che no conto oltre! Tanto che me ga durà fin de sera tardi..
 - Ma ieri te gavemo visto pur, alla manifestazion..
 - Lina, se te pensi ben, no lo gavemo visto a esser sinceri.. lo gavemo intra-visto! Hahaha..
 - Infatti Lina.. Stavo mal che no te digo, la panza che me se girava.. ma mi volevo vignir a tuti i costi! Cussì ghe go dito a Bruna che me cioghi un pacco de fazoleti de carta e via mi!
 - Bravo, cussì se fa, nissun ne ferma!
 - Si, pecà però che no go visto un tubo.. o meio, go visto i gabineti de tutti i locai verti lungo el percorso del corteo!
 - Hahaha.. per quel te sparivi in continuazion.. e noi che pensavimo che te ndavi a bever!
 - Magari! Go provà a bever un bicer, ma come go butà zo, xe tornà fora de l'altra parte! Ara, no steme far contar.. Inveze, conteme voi e ben, dai, che tra el tempo in gabineto e el mal de panza no go capì un'ostia de tuto quel che xe sucesso. Go leto qualche articolo, ma voio saver de voi ben come xe andà.
- Alora, dove che se gavemo trovà te ga visto, no? Ierimo in Piaza dela Stazion de le quattro, e là za se capiva che iera un fraco de gente, però sicome la piaza iera granda e tanti doveva ancora rivar, no pensavimo che iera propio cussì tanti. Se gavemo inacorto de quanti che ierimo co xe rivada l'ora de partir.. Noi, che no ierimo nè davanti in testa, ne de drio in fondo, semo partidi mezora dopo i primi e co semo rivadi sule Rive, la testa iera za sparida in Corso Italia.. e iera ancora zente che partiva! un putiferio de zente! Bon, tuti che sonava tamburi, cantava, sonava trombe.. stiscioni e bandiere che svolazava! Bon che el tempo ga tignù e che no xe vignù el lavon, che senò sarìa sta longhi!

- E Fedi, dighe anche de quel coso che svolava..
- Si, si, Enio.. iera nache un robot telecomandà che svolava per far le riprese dall'alto, un drone.. una specie de elicotterin con tante eliche che svolava sora de noi.
- Che roba ciò! quel no lo propio visto, meno mal che iera i bareti verti.. se me tocava farla drìo un canton i me gavessi anche filmà!
- Te se imagini che rider Lina, su youtube veder Enio cucià co le braghe calade.. no ga prezo!
- Tasi ara, tuta colpa tua! Bastava una che ciogo, no tre.. che mi volevo pò, ma Bruna dopo ga insistì "E se dopo no te fa effetto?" la diseva, "Va sul sicuro".. Sul sicuro che go perso diese chili! Bon, ala fine gnanche ela se ga divertì.. col fatto che iera un sacco de gente e gavevimo paura de perderse la me ga seguì in tuti i gabineti.. povera! e te dovevi sentirla de sera.. dopo el mal de panza, el mal de testa gavevo! miga colpa mia ciò, anzi!
- Comunque, ricapitolando, gavemo fato tuto sto giro, ritrovo in Piazza della Stazione ( Piazza Libertà), Via della Stazione (Corso Cavour), Via Canalpiccolo, Corso (Corso Italia), Via San Giovanni (Via Imbriani), Via del Torrente (Via Carducci), Via Valdirivo, Via della Dogana (via Roma) e Piazza della Borsa, dove che xe la sede nova del Movimento Trieste Libera. Là i ga fato un breve comizio in italian, inglese, sloven, tedesco e alla fine in triestin. Niente de tale, poche parole, ma ricche de significato, da diverse persone in diverse lingue e alla fine Roberto Giurastante ga lucidamente esposto el nociolo de la question in termini de legalità.
- Ehh mi là go comincià a star un poco meio.. alla fine de tutto! Giusto quel che bastava per perderme anche el discorso e pò ga comincià a passarme!
- Beh, bon! ma tanto te poderà scoltar e veder tuto con calma, xe pien de foto e fimati in rete.. l'importante xe che te poderà dir che te ieri, magari col scagot, ma te ieri! E credime, el corteo de ieri, resterà nella storia!
- Si, si.. e i foghi che i ga fato a sorpresa? sarà i primi de una lunga serie de anniversari! Iera pochi, ma iera caldi e sentidi, te vederà cossa che sarà tra venti anni! Varderemo le foto de sti primi e ne corerà una lagrima zo pel viso..
- Se saremo ancora! tochite..

15 settembre a Trieste

- Ma vara ti ciò, orca, proprio el 15 dovevo aver l'appuntamento..

- Che appuntamento te ga? Cossa xe ste robe che no so, Enio?

- Niente Bruna, sta calma, miga robe galanti! Gavemo el giudice di pace, no te se ricordi?

- Ah.. cossa, el 15 gavemo? Orca e come femo? No dovevimo andar al corteo de TLT?

- Appunto! quel xe el problema! Dieci mesi che spetemo de esser convocai per via de quei mone del quarto pian e proprio el 15 doveva cascar!

- E scolta Enio, no se podessi spostar? Magari se te ghe telefoni..

- Go za provà, no se pol, orca, l'unica xe problemi de salute.. quel pensavo.. dovemo inventarse qualcosa Bruna mia, al corteo noi dovemo andarghe, costi quel che costi!

Plim plooom..  Plim plooom..

- Chi xe qua Bruna, te speti gente?

- No ah, cossa so mi, va a verzer e vedi chi xe..

- Si? chi xe?

- Son mi Enio.. Fedi, disturbo?

- No, te scherzi? Vien su dai.

- Bon, rivo, verzi el porton però, se no te verzi..

- Ah si, ecco.

- Xe Fedi, Bruna, metti su caffè.

- Xe anche Lina?

- Cossa so mi? Desso vederemo..

- Ciao, permesso. No disturbo, sicuro?

- Ma cossa mai, dai, anzi, te pol dar una man.

- Ara che go due ernie, cossa te servi?

- No, tranquillo, no xe de rucar. Servi mover l'ingegno.. scolta qua. Te se ricordi che gavevimo fato una causa a quei del quarto pian per quel camin abusivo che i gaveva fatto?

- Si, cossa nassi? gaverè miga perso con quei mone, no?

- No, no.. ancora xe alto mar.. el 15 gavessimo appena de andar co l'avocato del giudice di pace che..

- El 15? ma sto mese? settembre? ma no xe la festa del TLT? no gavevi dito che vignivi anche voi?

- Eh, infatti.. per quel te pol iutar, ne servi una scusa per no andar del giudice e rimandar, solo una causa de salute pol esser.. documentada anche!

- Beh xe importante sta festa, xe el giorno prima de l'evento conclusivo de la serie "dialoghi con i Cittadini" che se tien (non a caso) a Trieste el 16 settembre 2013 alla Presenza de la Vice Presidente della Commissione, Viviane Reding.

- Proprio ghe disevo a Bruna un attimo fà, mi a qualsiasi costo ghe vado, e co la bandiera albardada in man!
El 15 settembre 1947 xe entrà in vigor el Trattato di pace, che all'articolo 21 ordina:

È costituito in forza del presente Trattato il Territorio Libero di Trieste, consistente dell’area che giace fra il mare Adriatico ed i confini definiti negli articoli 4 e 22 del presente Trattato. Il Territorio Libero di Trieste è riconosciuto dalle Potenze Alleate ed Associate e dall’Italia, le quali convengono, che la sua integrità e indipendenza saranno assicurate dal Consiglio di Sicurezza delle Nazioni Unite.
La sovranità italiana sulla zona costituente il Territorio Libero di Trieste, così come esso è sopra definito, cesserà con l’entrata in vigore del presente Trattato.
Dal momento in cui la sovranità italiana sulla predetta zona avrà cessato d’esistere il Territorio Libero di Trieste sarà governato in conformità di uno Strumento per il regime provvisorio, redatto dal Consiglio dei Ministri degli Esteri e approvato dal Consiglio di Sicurezza. [...]

Te devi darme una man a trovar una scusa.. xe troppo importante! Ti te son bravo, no, in ste robe?

- Te digo subito Enio, xe facile.. Ti de matina te se svei bonora, te bevi un bicier de acqua con dentro sciolto el tabacco de un cichin. Te speti co la calma un'oretta che fazi effetto e rivi la febbre, e co te vedi che se alza un poco la temperatura te ciami el dotor, te ghe disi che te ga mal de panza e te lo fa vignir a domicilio. Prima che el rivi te ciol una bela purga, in modo che col rivi te ga de andar in cesso.

- E basta cussì? Ma te son sicuro?

- No go mai provà, ma iera Aldo, che ga fato anni de carriera militar, e me contava che sto qua iera un metodo che usava certi soldai inamorai el giorno prima che el regimento dovessi andar in mission, per star a casa co la morosa e no dover partir.

- Bon ah, alora xe deciso, un poco de scagoto e via. Ma dopo riverò a vignir al corteo? In quanto tempo passa? No xe che me toca vignir col panolon?

- El panolon xe el meno, spero che no te servi, sinò stame lontan! El pezo sarà el cichin bevudo.. te farà sai nausea tuto el giorno.. però te poderà vignir. E forsi che qualche bicer de rosso te caverà tuto e te salterà come un fiol..

- Infatti, volevo dir! anzi, più che un bicer de rosso, me porterò la fiascheta co la grapa de Rudi che no se sa mai! Quela fa risuscitar i morti!

- Bruna, ciche sicuro gavemo, ma purga? Fazo un salto in farmacia a cior?

- No, gavemo za, sa che son organizada e go tute ste robe.. ma.. Fedi, quanta purga el ga de cior?

- Ah no so mi.. Al posto suo ciolessi due o tre volte tanto quel che i scrivi de cior.. dopotutto devi sembrar che el sta mal, no? Cussì xe sicuro che el dotor ghe scrivi sul certificato. Se dovè esser sicuri per via del giudice..

- Urca cussì tanta? Bon ah, vederemo, go un poca de paura però..

- Bon adesso devo andar, iero del feramenta qua soto e son solo vignù a saludarve, go Lina che me speta a casa per andar de la paruchiera.

- Ma come, no la iera l'altro giorno?

- Bruna, a mi dime.. sa come la xe? la vol esser ben perchè la disi che i farà foto e video del corteo e resterà nela storia oltre che a girar su internet e tuto el mondo varderà. Te la conossi, no?

- Si, si, saludimela, ciao!

- Va ben, certo! E Enio.. portite la bandiera, ricordite.. e magari per sicurezza anche el pannolon!

El Ponte Curto

- Monade! Per mi xe tute monade!

- Ma cossa Enio? Cossa xe monade?

- Come cossa? Quele che i fa qua a Trieste, pò.. Sto Ponte Curto per esempio.. Passaggio Joyce.. ma cossa vol dir, cossa ghe entra Joyce col ponte? Capisso che i ghe vol ben, ma xe un limite, no? Mi no me quadra, e per ste robe go ocio, sa?

- Aaaah el ponte curto? Spieghite, no? Cossa te vol che capisso, con tute quele che i fà, go voia mi de imbrocar quela che te parli tì!

- Beh si, qua te dago ragion, mea culpa, dovevo specificar quala, i fa tante de quele..

- Ma pò se ga savesto perchè sto nome? Te sa ti, Enio?

- No.. me ga spiegà Fedi, ma no go capì ben. Una roba xe sicura, el nome de "Ponte Curto" no ghe lo cavava più nissun oramai, dopo tuto quel casin che i ga combinà! E pò i gaveva fato anche el sondagio no? Quei del Piccolo me par.. ma forsi me sconfondo, forsi iera su Facebuc.

- No, no, te ga ragion, anche mi me par che i gaveva fato lori. Ma coss te vol, indiferente insoma, quel che conta xe che ala fine tuti voleva che i lo ciami cussì, e cussì i ga dovesto far, voia o no voia! El sindaco no iera sai contento, perchè se ricorderà tuti de lù come quel del ponte curto.

- Se vedi che per no darghe tropo valor i ga zontà anche Passaggio Joyce, sperando che la gente col tempo lo ciami cussì.. e inveze no, cari, sarà sempre "curto" quel ponte. Con quel che ne xe costà.. cussì tante altre robe più sgaie i podeva far con quei schei, e inveze cossa? un ponte che propio no serviva, per sparagnar 30 metri de far a pìe, ma dei, dei.. Ben ghe stà! I voleva far bela figura e inveze i ga fato un bel figurin de merda!

- Te ga visto el filmato che i gaveva fato per riderghe sora? Forti i muli, quei de Robe Fatte Cacao. Tropo de rider, co me lo ga mostrà Lina me ga ciapà una ridariola tale, che robe che moro!

- Si, ah, che go visto! Chi te vol che no lo gabi visto? Te perdi colpi? Gavemo anche vardà insieme un fraco de volte.. ogni volta più de rider el fà, apuntamento te devi cior, che no te sia vignù l'alzaimer.

- Cossa mai! L'alzaimer te gaverà ti! Indiferente insoma.. Comunque co go leto sul giornal che i lo ga batezà, col cartel e tuto el resto, no podevo far a meno de pensar a sta sceneta e rider. Ma chi che xe andà come ga fato a star serio?

- Xe andà el mulo, a veder, quel che ga l'oficina vicin el giardin publico. Propio ieri el me ga contà, de matina, in bar.

- Ah si? Conta alora, coss te speti.

- Desso ghe rivo, speta, sempre furia te ga, ciò. Calmite, una calmada te devi darte, te son come un'anima in pena, ciò! Bon, insoma, el xe andà per veder, za che el iera là de drìo pei ufici, e el ga dito che propio serio no iera nissun, tuti che sorideva, alegri e felici. Per mi i rideva per la monada. E forsi anche perchè ghe vigniva in mente el filmatin, te dago ragion. I ga propio camufà ben sti furbi, i ga organizà el festin, perciò che tuti credi che i ridi de quel inveze che de la cazada! Sai furbi, darghe ato bisogna.

- Ah pol esser, sa che per ste robe i sa una più del diavolo..

- Pò anche el Piccolo ga capelà, el ga scrito "passeggio".. gnanca i cartei no i sa leger, varda, legi qua, chi sarà el pampel che ga scrito?

- Eh, cossa te vol, se vedi che el giorno prima el iera in osmiza! Ara, per mi, forsi anche che i fa aposta a sbaiar, el bugiardelo ga una certa tradizion de portar vanti!

- Magari che fossi per la tradizion! Ciapemola in rider ah, che sinò xe ciodi! Ma tuti insempiarne i vol, sempre, ma mi no i me la caza più! Monade, pò, Bruna, te digo mi, solo monade!

In gita a Vienna

- Cossa te disi Bruna, andemo?

- Dove? In gita a Vienna col MTL?

- Si ah, dove senò!

- Si, si andemo, no te vedi che stago fazendo la jota, che dopo iazo in congelator, cussì gavemo qualcossa de meter soto i denti in tante ore de pulman.

- Ah, orca, mi pensavo che iera desso, per pranzo.. che pecà, gavevo propio voia.

- Xe anche per desso, sta bon e no frizer, go fato in più.

- Bon, alora cossa fazo, prenoto, la gita coi muli intendo, in pulman coi triestini del Movimento?

- Te go dito de si, no voio che te guidi. Te son vecio, orbo e sordo, cossa te se sogni de guidar fin là. Andemo co i altri, col pulman, senza ris'ci, cussì se divertimo anca, no?

- Bon si, te ga ragion, xe solo che.. te sa che go la susta mola, no? e se no i se ferma spesso.. per quel volevo andar pei fati miei. Ma bon, dai, cussì bateremo carte e canteremo. Speremo che sia altri veci, che sicuro sarà, cussì no sarò solo mi a dirghe de fermarse spesso.. Scolta, go ciolto anche un dò fiasche de quel bon, de portarse drìo, no se sa mai.

- Bravo, anche se là i ga bona birra, forsi che no coreva. Pò vin e birra insieme.. te podevi anche far a meno. Vaben, dai, indiferente, mal no farà.

- Anzi, me ga chiesto tu fio, che no pol vignir, se ghe portemo un poche de botiglie de birra indrìo co tornemo. El ne ga dito de andar alla  7 Stern Bräu, una birreria artigianale che dovemo provar, cussì el ga dito almeno, e dovemo portarghe una botiglia per tipo. El ne ga fato la lista, vara qua:

• Hanf (la famosa birra alla canapa del 7 Stern), sai delicata
• Wiener Helles (birra bionda con aroma de luppolo)
• Prager Dunkles (birra scura, quasi nera, col sapor de malto tostado, caramello e aroma de vaniglia), sai, sai bona
• Märzen (birra rossa/ambrada al sapor de noci e pan de spagna)
• Chilli (piccante), de provar..
• Bangerberg Rauchbier (birra rossa, ideale per compagnar ai magnari fumigai e ala griglia)

- Bon ah, porteremo.. ma no so se le riverà piene, sa come che xe!

- Te farà in modo che rivi, orpo! Le tegno mi e pò bon!

- Ma si, scherzavo dei, tanto ciogheremo anche per noi, no? Portemo un dò valigie svode, cossa te disi?

- Esagerado! Basta una.

- Mah, no so, sa? Meti che, dopo che tornemo, tuti ne domandi de sagiar.. no resta un boro!

- E bon, porteremo due trolei, che ga le riodele, e via! Sarà quel che sarà!

- Ricordite la bandiera, me racomando!

Ein Prosit TeleQuattro

- Rudi, porta un litro che dovemo festegiar.
- Me racomando, quel bon, che te tien sconto! Xe importante, e vien anche ti a beverte un bicer con noi!
- Ecolo, signori, el meio dela casa, ma no ve meto in conto, sto qua lo ofro mi e guai a chi fiata!
- Urca, grazie ciò, se vedi che te ghe vol propio ben a Trieste..
- Giorgeto, ara che no son cussì caìa come se disi in giro, xe solo che se no stago tento va tuto in malora, e l'osteria devi ndar vanti, chi la senti dopo mia moglie!
- Ma si, scherzemo, dei, no statela ciapar, savemo, savemo come xe Maria.
- Ciò Fedi, ara che el cambia idea, sta bon, dei. Casomai dopo che gavemo bevù..
- Bon stapa dei, Rudi cossa te speti, qua se brinda per giuste cause.
- Eco si, deme i biceri che verso, passime, Giro, ti che te son vicin.
- Al TLT!
- Al Territorio Libero de Trieste, cin!
- E anche a quei che se ga da de far, specialmente ogi brindemo a Tele4 che ga trasmeso finalmente qualcosa de TLT e a quei del Movimento Libero de Trieste, che xe andai là!
- Iera ora che se parli un poco per tivù, manca ancora quel klinz de giornal però, ma bon, intanto brindemo a sto sucesso, cin!
- Che pò gave visto Giurastante? Tropa roba, el ghe le ga sonade! Una spana sora i altri.
- Enio, ara che anche i politici no scherzava.. el problema iera propio quel, no i scherzava!
- Giorgeto, batudoni ogi, ah?
- Certo che me spetavo un poca de preparazion, i ghe gaverà pur dito de cossa che iera l'argomento, no?
- Ahh, secondo mi, la mancata preparazion i la ga usada come scusa per poder sorvolar e no esprimer un parer. Cossa te vol che i disi, povereti? Xe evidente a tuti, niente pol scavalcar un tratato internazional, no? anche i fioi, orco can, ghe riva! Ma se i diseva qualcossa, dopo ghe tocava far i conti coi capi de partito taliani, e quindi i se gavessi dà de soli la zapa sui pìe!
- Giusto, caro Enio, anche secondo mi xe andà cussì.. impreparati! ma come se pol? i xe là per qualcossa no? come i pol esser impreparati! Bociadi, i dovessi bociarli, come a scola, e no farli tornar più! I se ga fato un bel figurin! Pezo che dir contro.
- No, no, Giro. Pezo che dar contro no, però uguale dirìa mi. Capisso che no i podeva dir gnente, ma dir castronade come ga dito qualchidun..
- Però bravo el nostro Roberto, ghe ga dito ciaro e pulito, senza lassarse infervorar del'idiozia generale che regnava. Mi no so se fossi rivà a star cussì sereno. Anche se un poco se vedeva che dentro el s'ciopava..
- Cossa te vol? Davanti al'ignoranza xe dificile resister.. bravo el xe stà, sai, sai bravo!
- Speremo che i rifazi, ara! Co i stessi! cussì sta volta no i gaverà scuse.. impreparati! ancora me ciapa el nervo, ma come se pol? e xe gente che li ga votai! per esser impreparai! Ridicolo, se no assurdo!
- Bon, bon calmite Giro, speremo che no i te ciami a ti, che sinò te ghe mandi per aria el studio!
- Si, Fedi, te se lo vedi a lui là? Meo de no, dai.
- Bon Rudi, sa cossa te digo, qua sto litro xe za finì. Va a cior un'altra che la situazion merita. Robe grandi ste qua, altrochè.
- Come no? Anche due! Qua se fa el TLT, robe grandissime!
- Che Tele4 parli avanti e che Dio te scolti!
- Rete nazional diventerà, del TLT!
- Prosit! Viva! Cin!
- ♫ ♪ ♩  Ein Prosit, ein Prosit, der Gemuetlichkeit, ♬ ♩ ♫ ♭ Ein Prosit, ein Prosit, der Gemuetlichkeit, ♫ ♭ ♪ ♬ ♩ Ein.. Zwei.. Trei Gsuffer!  ♫ ♭ ♪ ♬ ♩ ♫ ♭ ..