Povera Italia

Fedi e Enio si incontrano dal panettiere, come quasi tutte le mattine..

- Ciao Enio, come xe?

- Ciau! Lassa star che no go dormì un boro.. mal de schena che no te conto.. no savevo de che parte voltarme, fin che me son alzà e me go messo a vardar tivù.

- Che bruto, ara! So ben perchè anche mi me ciapa ogni tanto, mi alla cervicale.. robe che no te digo! un mal de testa lucinante me vien..

- Meno mal che xe Bruna, che me ga messo arnica e un poco ga funzionà!

- Anche mi dopro, si, funzia ben! Ste bone donne che gavemo le sa tuti i rimedi.. un più del diavolo.. meno mal! E scolta, coss te ga vardà de bel a quele ore?

- Ah, coss te vol.. cercavo qualcossa che me distrai.. ma invece iera tuti che parlava de sto klinz de governo Letta.. robe de mal de panza! Povera Italia!

- Mamamia, si, te prego.. de vergognarse a esser italiani.. bon che noi no semo! Viva Trieste e el TLT!

- Ara, propio de vergognarse! Infati, te vol saver? Xe dò giorni che finalmente no sentimo più rumori de quei mone del quarto pian che fa sempre un tàl scandàl..! Quei.. come se ciama? No me ricordo mai el nome.. bon, insoma pò, quei! te ga capì quai, no? I triestiliani pò..

- Come no! So chi.. ma cossa i se vergogna?

- Apunto! per quel no se li senti più.. forsi che stavolta i capissi che i li ciol pel cul.. e un poco i se vergogna de farse veder in giro dopo che i ga tanto dito che l'Italia xe la loro madrepatria, che no li abandonerà mai e via cussì.. invece no la abandona solo lori, povereti de Trieste in mezo a tuti sti "indipendentisti", come i ne ciama.. li abandona tuti, ma tuti quanti i taliani e li lassa a remengo!

- Per mi no i capissi! E se anche i capirìa, no i ameterìa mai, tropo orgogliosi per ameter! Però almeno che i cominci a vergognarse xe un poco bon!

- Mi propio no capisso come se pol ostinarse in sto modo.. capisso chi, a ragion veduta, sposa un'idea.. un credo.. ma lori che rifiuta a priori senza gnanche leger e documentarse e co te ghe disi "legi qua" e te ghe fa veder un trattato internazionale, i te rispondi "cossa c'entra?".. "no xe le carte che fa la storia".. "xe roba de sessanta anni fà".. e monade simili! I dovessi dir "te ga ragion a solevar un dubio, vardemo se le carte xe valide.. e se cussì xe, mi che voio esser comunque talian perchè la sento la mia terra, o vado via, apunto in Italia, opur me batto per chieder l'annession de Trieste all'Italia", per inciso, come no xe stà mai fato dal '47! Che per inciso, se i domandassi desso sarìa propio una barzelletta, chi te vol che aspiri a passar sotto l'Italia.. solo un.. bon, bon, te ga capì, no? semo in logo publico, che ancora no ofendemo qualchidun!

- No so cossa risponderte, gnanche mi no li capisso.. anche mi go provà a spiegarghe qualche volta, ma xe impossibile.. specie a certi che in teoria dovessi saver ste robe, anche gente in alto, studiada, che fà politica.. xe che lori ga tuti i interessi a restar cussì.. e i pensa che se no i te dà bada dopo un poco te se dimentichi e resta tutto cussì..

- Povereti, secondo mi i xe talmente cagai che i se la conta soli e co riverà la sveia sarà come un scopeloto!

- Bon, bon.. comunque te vederà che tra un poco sc'iopa tuto e vegnerà un ribalton!

- Si, ah.. la gente no ga più schei per pianzer, la crescita no cressi.. e lori cossa fa? I ne aumenta l'iva! Volponi! Chi ghe la cazza!?! Te digo mi.. te vederà che robe che vegnerà..

- Speremo solo che ste Nazioni Unite se movi a vignir a meter in chiaro che qua a Trieste no xe Italia!

- Prima che i ne ciuci altri bori! Maledeta quela barca!

- Ara che toca ti, movite!

- Urca, si.. Bongiorno bella! Le solite quattro sc'iopete bianche a nome "Bruna" e pò un krapfen.. quel là de drio, el più s'gionfo, che magno subito. Grazie.

- Ma Enio.. e col colesterolo?

- Tasi! Per quel magno subito.. no dirghe a Bruna che sinò la me ziga!

Musica ai tempi d'oggi

Driiinnn.. Driiinnn..

- Pronto? Chi xe?

- Ciao Enio, son mi, Fedi!

- Fedi caro, come xe? Cossa nassi che te ciami a ste ore? Niente spavada dopomagnà oggi?

- No la me dà pase.. No rivavo ciapar sonno.. colpa de Spotify.. quei zurli ga messo a pagamento e Lina no pol più scoltar musica. Mi ghe go dito "Cossa te ciava? Scolteremo de novo le cassette de una volta" ma la ga dito che le xe in fondo alla cantina.. sa cossa vol dir no? te ga visto la mia cantina?

- Urca! Se le xe in fondo a quel budel te ga voia! No te invidio sicuro! Quanto la xe longa?

- Quindici metri! Col klinz che vado a ciorle! Le ga volude ela in fondo, "tanto no servi più" la diseva..

- E come fè? Te convien sonarghe ti le canzonete e pòbon!

- No cior pel cul.. Voi no usavi spotify per scoltar musica?

- Si, anche noi, ma gavemo ancora due mesi de bonus.. penseremo!

- Comunque te go ciamà per dirte che te ghe domandi a tua nipote, che xe là, se se pol risolver senza pagar.. sa che lori sa sempre una più del diavolo per no pagar, no? Nove generazioni pò..

- Ah bravo, xe vero, no go pensà de domandarghe.. speta un attimo in linea.

Passa dò minuti e Enio torna al telefono.

- Ecome! Te son ancora là?

- Si ah.. dò te vol che vado?

- Scolta, alora, te devi cavar via Spotify e meter un altro meio che no ga limiti de tempo.. la me ga dito che xe meio anche per altre robe ma no me ricordo quali, te scoprirà ti. El nome xe Grooveshark. No xe una roba che te installi, te scolti direttamente dal browser, figon!

- E bon, desso ghe digo subito a Lina e speremo ben dai. Cossa la me insempia mi co ste robe!

- Comunque proveremo anche noi sto Grooveshark, no vedo l'ora, cussì cavemo subito sto klinz de Spotify! Bon, desso te pol andar a farte un bel spavin! Sogni d'oro!

- Si, ah! Ringrazia tua nipote, ciau Enio, stame ben!

"Trieste è Italia".. ma cossa mai!

- Ma Enio.. ma te ga sentì per tivù coss che i ga dito?

- De cossa Bruna? Spieghite..

- Ma del TLT ostia! No te ga pena sentì anche ti?

- Ah bon.. si, si.. ma lassa che i disi e pò bon!

- Ma come pò bon? No te frega gnente? I ga dito che l'ONU ga risposto e ga dito che Trieste xe Italia!!

- Coss te se lassi insempiar anche ti? Ara, fa solo rabbia per come i zerca ancora de cazarnela.. come sessanta anni fà.. Doveva rispender inveze, uficialmente, l’Assemblea Generale, el Consiglio di Sicurezza e el Consiglio di Amministrazione fiduciaria (Trusteeship Council)! Servi la sua firma.. e se te legi ben, anche la signora Song no parla de sovranità, no la specifica.. infatti no xe una risposta uficial, sinò i doveva specificar, no te par?

- Ah xe vero, ma per tivù no i ga scrito..

- Te credo! Te vol che i se daghi la zzapa sui pìe de soli?

- Però in basso sulle didascalie iera scrito come sessanta ani fà "Trieste è Italia", senza specificar infati..

- Te go dito.. xe come una volta.. i tenta de insempiar chi no sa leger tra le righe! I gavessi dovù scriver "Trieste è sotto amministrazione dell'Italia" se i fossi giornalisti veri co la gi maiuscola, come quei de La Voce di Trieste, perchè dal 1947 no esisti al mondo documento che attesti che l'Italia ga la sovranità su Trieste.. e no esisti, come qualchidun aferma, che val "sic rebus stantibus", basta informarse meio, e più dei giornalisti chi dovessi informarse? Per cui, o i xe tululù, o i ne vol insempiar!

- Bon, bon, me pareva strano infatti che se esaurisi tuto co una riga de mail..

- Pò vedemo adesso cossa che farà el Tribunal de Trieste.. in teoria, se basta quella mail, che no basta, i giudici podessi emetter sentenza sul difetto de giurisdizion che ga presentà Giurastante, no? E qua vien el bel.. co la sentenza in man e no esistendo inveze documenti che disi che Trieste sia soto sovranità italiana, se poderà inveze concretizar in maniera assoluta la posizion de invasor de l'Italia!

- Figurite se i emeterà quela sentenza, alora..

- No se sa mai.. speremo de si, cussì podemo andar vanti e chieder l'intervento immediato del Tribunal Internazionale! Sta calma che Trieste xe solo triestina e de nissun altro, xe solo question de tempo!

- Ara là! I ne vol sempre insempiar! Ndemo a magnar che sfreda, ufa, ogni volta fredo ne toca magnar!

Leggi il seguito →   Un figurin de merda "simbolico"

Simboli o no simboli?

Nella solita osteria de Rudi..

- Chi ghe toca ogi butar de bever?

- Fedi, me par che te dovevi ancora un giro de l'altra volta, no?

- Col klinz! Ara che go zà fato mi, tocava Enio!

- Si, si.. tocava mi.. portine un fiasco Rudi, per favor, e fame anche un panineto de porzina solito mio.

- Giro, missia le carte dei, che ogi me sento in bone.

- Ciò ma gavè leto de sti casini che xe nati per via del simbolo de le Nazioni Unite? Ma se pol doprar o no?

- Mah.. no gapì Enio. Mi dopro, son cittadin del Territorio Libero, e le Nazioni Unite ga l'obligo de difender la nostra citadinanza, ergo impico la bandiera de Trieste e dele Nazioni Unite dò che voio! E che i me vegni a dir qualcossa..

- Te son el solito, Giorgeto, la fazenda xe delicata.. de quel che go capido mi, dovessimo poderla far sventolar, perchè ghe chiedemo proprio all'Onu de intervenir.. quindi, ovio che sventolemo la bandiera blu! Chiaro che magari no te pol usar el simbolo per far creder inveze che quel che te disi xe avvallado dall'Onu.. me par logico.. Comunque spetemo chiarimenti uficiai.. domanda alle Nazioni Unite xe stada fatta, me par..

- Ma infatti, Enio.. ara, el viz xe tuto un altro.. el viz xe che el giornal ga dito che no se pol, miga l'Onu! però de come che el ga dito sembrava de si.. e pò el ga dito altre robe che par esser futizade! Ma te convien leger ben e farte un'idea.

- Muli, scoltè, el problema xe el modo de afrontar le robe.. Una roba xe la discussion, seria e ponderata su fati e documenti, a cui se dovessi rivar, tutti, d'acordo o no.. l'omo se ga evolù co la parola, no? un'altra xe quando che un vol aver ragion a tuti i costi e vol inzinganar la gente!

- Si, son d'accordo con ti, Fedi, mi me par che qualchidun scrivi robe solo per insempiar la gente!

- Pò zontighe qualche mona svasticado che ga mezo neuron e no riva più in là che scriver minace sui muri perchè no ga altri argomenti se no spacar tuto..

Leggi il seguito →   Un figurin de merda "simbolico"

Amor studiado

- Ciao Fedi!
- Ciao Lina! Dame qua una borsa che te iuto.. coss te ga ciolto tanta roba..?
- Spesa ah, roba de tuti i giorni, gnente de special.. ovi, late, pan, do litri de vin, do robete per la colazion.. ma cossa te conto a far che no te capissi gnente! Ciapa! Meti sul tavolo che pesa!
 - E cossa do ore te son stada per cior ste dò robete?
 - Ma go incontrà Germana, che me ga tacà boton.. te prego, zerte robe la me ga contà.. che no te digo!
 - Tipo? Cossa la ga combinà?
 - Gnente, gnente.. almeno ancora! Però interessanti forsi..
 - Bon, conta dei!
 - Fedi.. semo avanti.. poco cossa far.. qua a Trieste, in Territorio Libero, semo sai avanti in tuto! Sa cossa la me ga dito?
 - No che no so! Se no te conti..
 - Bon, insoma.. qua gavemo el circotrone, la sissa, la Hack, anzi.. gavevimo, pace al'anima sua, el zinema, la Illy, e tute ste robe che ne fa importanti nel mondo e al'avanguardia! Bon.. anche nel sesso semo tra i primi.. te savevi?
 - No pò ah, se no te conti.. Cossa gavemo? El Rocco triestin? o la Ciciolina de Borgo?
 - No dir sempiade.. me ga contà apunto Germana che xe una scola de sesso in Russia, dove che i ghe insegna ale putele o far quele bele robe che a voi omini ve piasi sai..
 - Cossa te intendi dir? Che robe?
 - Come che robe? I lavoretti pò.. quei che se fa de sera soto i ninzioi!
 - E cossa c'entra con Trieste? Le vien qua ste putele?
 - De più! No te crederà ma i ghe insegna anche ale mule qua, a Trieste, in TLT, sti corsi.. e mi no go sentì che in altri posti i fa ste robe.. solo qua de noi pel momento.. avanti semo! anche in quel!
 - Ma come sarìa? Ma la te cioleva pel cul forsi.. o anzi, più facile.. la ga ciolta pel cul chi che ghe ga contà sta roba!
 - Ma nooo.. te digo mi, xe vera! Se ciama "Fellatiami" e xe un corso de "pompinologia"!

 - Urca ciò.. no posso creder! E dove i lo fa?
 - In via Felice Venezian, proprio in centro.. me par che el posto se ciama Aralaralà. E speta.. desso vien el bel.. Germana me ga contà sta roba, perchè la va a far, la se ga za iscrito!
 - No posso creder.. Germana? Ma se la gaverà zento ani per gamba? Cossa la va a far..?
 - Eh si caro, proprio ela! La disi che la vol istruirse.. star al passo.. e far contento Toio!
 - Toio.. ma gnanche no ghe tirerà più! El ga za un pìe nela fossa.. Ah forsi per quel, la lo volerà risveiar! basta che no ghe ciapi la pompeta.. nol ga anche mal de cuor?
 - Eeehh.. coss te vol che te digo? Amor xe amor.. e sicuro no ga età.. speremo ben!
 - Bon bon.. sarà contento lù, sicuro! Almeno el ghe la darà col soriso stampà! E te volevi ndar anche ti?
 - Ecolo, savevo mi! El solito porco! Ma sa cossa te digo amor.. spetemo che fazi Germana e la ne conti come che xe sta roba.. e dopo.. no se sa mai!
 - Ma si.. ara che scherzavo, sa che ste robe no me interessa.. mi te voio ben e basta!
 - Tasi, che capissi anche i muri che te son rufian! No contar frotole! Inveze sa ancora cossa la me ga contà? No te crederà mai a sta qua.
 - Dai dai, conta. I fa anche altri corsi?
 - Quel no so, ma sa chi che fa anche el corso con ela, la me ga dito? Nerina!
 - Nerinaaa? Ma no la xe vedova de tanti ani?
 - Apunto! He he.. tuti disevimo "povera Nerina".. e inveze.. vara ti! se vedi che la ga l'omo ah..
 - Opur che la lo vol trovar! Chissà quanti arretrati.. devo dirghe a Ucio!
- Cossa c'entra Ucio?
- Eh.. sa che lui xe de boca bona.. e anche se la xe vecia, vedova e bruta sicuro nol se volerà perder l'ocasion!