Svola balini

Fedi - Ciò Enio, dove xe sparì Jure? Te lo ga forsi visto, ti?

Enio - No, savevo solo ch'el doveva ndar a cior dò buloni a Gorizia, de quela misura inglese che qua no se trova. El iera tuto incazà che "Come? qua, a Trieste, no se trova misure inglesi in tuta la cità, e un che ghe servi cosa fa? Se taca?" cussì el brontolava in oficina, e sicome el bubez xe in ferie ghe ga tocà ndar lui, fin Gorizia.

Fedi - Un'altra auto inglese i ghe ga portà de riparar? Chissà quanti Cristi e Madone el ga tirà zo, dopo quela de l'altra volta, che nol saveva come se studava le luci. Tute strane ste auto inglesi,el diseva.. cosa iera? Una Triunf me par, no?

Enio - Si si, me par propio quela.. Basta che no i ghe tiri col s'ciopo! Te ga sentì de l'altro giorno? de quel mato cos che ghe ga tocà a Gorizia? go leto sul giornal.

Fedi - Qual? No so gnente, conta, conta, dei.

Enio - Gnente.. un mato caminava in zentro a Gorizia e a un certo punto se ga trovà un balin de piombo in te l'orecia! Ma nol saveva ben cosa iera, el xe andà in ospedal e là i ga trovà el balin e cusì la puglia ga zercà e ga trovà che iera un mona che sparava col s'ciopo de la finestra de casa.

Fedi - No posso creder.. che gente mata che xe in sto mondo! E dopo i ne disi a noi che semo una cità de mati! Almeno noi gavemo quel che gira col stereo in spala, duro come un scalin de la matina a la sera, la baba che se vesti d'epoca che gira col pasegin, svodo, e qualche altro insempià, che no i ghe fa mal a una mosca! Altro che s'ciopo!

Enio - Dopo i lo ga portà dentro, ma te vederà che doman el sarà fora come prima! No xe più i tempi de una volta, co iera Franz Josef..

Fedi - Eh.. te sa si! ormai no xe più alegorie, xe propio vero, in tuti i sensi, che nel'aria svola balini!