El governator del TLT

Driiiin.. Driiiin..

Bruna - Si? Pronto? Chi xe?

Lina - Ciau Bruna, son mi, Lina..

Bruna - Ah, ciau, come xe? Tuto ben? Iero drìo a cusirghe le braghe a mio nipote, no capisso, el xe sempre coi genoci de fora, gnanche el fazesi posta! El xe vignù trovarme ieri e cossa el me porta? solito, dò peri de braghe de cusir, tute dò sbusade sui genoci. E no servi dirghe de giogar a balon co le braghe vece, no! sempre quele nove! e dopo "nona te prego cùsime, se ga roto"!

Lina - E bon, e cos te vol, xe mulerìa, ah.. Beati lori! Che i se diverti, lori che i pol, noi co ierimo putele un per de braghe te durava anni, e se te le sbusavi iera lignade! No iera schei quela volta, e gnanche pan! E dir el vero, gnanche braghe per noi, solo cotole iera, solo i mas'ci gaveva braghe, e solo curte iera, longhe solo co te diventavi un ometo!

Bruna - Altro che desso, tute le ultime robe tecnologiche, che mi no capisso gnente. Mia fìa me ga regalà per l'ultimo nadal un telefono celulare e mi no lo rivo a doprar, ogni volta che toco cambia tuto. Ciò, una volta iera facile, te gavevi diese botoni, coi numeri e iera finì.. desso te ga voia, te tochi un atimo e te parti mile robe che no capisso, l'ultima volta che go tocà me ga partì una telefonada internazional no so dove e me ga finì el credito, e de quela volta mi no toco più, solo rispondo, che là te pol star sicura, i me ga dito.

Lina - Eh.. ste tecnologie xe cussì, o te resti al passo, o zachete! te son taiada subito fora. 

Bruna - Te son za ndada a firmar pel governator?

Lina - Mi? Subito ah, el primo giorno! I iera col barachin in largo Barriera. Iera sai bruto tempo, ma son ndada lo stesso. In verità, te digo, iero del dotor là vizin e quindi dovevo andar comunque fora de casa, ma credo che sarìa ndada lo stesso. E ti?

Bruna - Mi son ndada ieri in Cavana, iero in giro con Enio che me ga compagnà a far spesa e gavemo profità per firmar. Pensite che i me ga dito che e i ga zà ampiamente superà i mile de lori che ga firmà, un sucesson!

Lina - Si si, me ga contà la Ilde, che su marì xe con lori che colabora, che xe un casin de zente che desso se interessa, sempre de più, e el numero cressi ogni giorno. Che Dio dassi, ara!

Bruna - Ma si ah! Sarìa anca ora che sta cità se svei un poco! Mi el mio lo go fato, e anche Enio, desso speremo che fazi anche i altri!

Lina - Purtropo ancora tanti no sa gnanca a cossa che servi el governator a Trieste.. Iero l'altro giorno in Cremcaffè con Germana, quela dei fioi gemei, te ga presente? La go incontrada in bus e za che ierimo de mesi che no se vedevimo, alora gavemo dito de beverse un cafè e contarse un poco dele ultime nius, sa, coi fioi e nipoti xe sempre robe nove de contarse. Bon, insoma, ierimo là e iera per tera un volantin de Trieste Libera, ela lo ga ingrumà e xe vignù fora el discorso del governator..

Bruna - E cossa la disi ela?

Lina - E cossa te vol che la disi? No la saveva un boro! Alora ghe contà mi, ghe go dito del Trattato di Pace, del Memorandum di Londra.. pò, solito, ela me ga dito de Osimo, che val quel, e mi ghe go spiegà perchè che no xe valido. E ela? Ela no la ga podù che, stando cussì le robe, darme ragion e anzi, la se ga come impizà, tanto che no la vedeva l'ora de ndar casa a contarghe a su marì e zercar su internet, che i se ga 'pena imparà a doprar. pò ghe go spiegà mi che sta roba del governator servi per continuar quel che iera lassà interoto co xe rivai i taliani a ministrar, che servi cioè per finalizar finalmente el Territorio Libero di Trieste, ma solo "finalizar", perchè esister.. esisti zà!

Bruna - Ben fata! E dopo? Te ghe ga dito quando se femo un'altra partida a Ramino, xe mesi ormai che strasinemo sta storia, una volta no pol una, dopo no pol l'altra.. Bisogna concretizar!

Lina - No, no go rivà perchè me xe passà el tempo contandoghe del TLT, che ela me incalzava e domandava robe in drìo man, te go dito, la iera infervorada! E insoma, a un certo punto go visto l'ora e son dovuda scampar de corsa che sinò me serava la farmacia. Ara, giusto giusto, son rivada per un pel!

Ma andando via la me ga dito che la me ciama doman per saver meio dove xe de ndar per farse la tessera e firmar, cussì doman se meteremo d'acordo anche per quel, che xe vero, xe passà tropo tempo de l'ultima partida.

Bruna - Bon, me fa piazer si, anche che te la ga vista ben, no vedo l'ora de vederla, xe sai cocola e bona anima ela! Desso vado che devo finir de cusirghe ste braghe, se sentimo doman alora, che te me conti forsi novità!

Lina - Bon si, ciau bela, cusi cusi, che tanto dopo el spaca de novo, fioi, ah, pò!