Le scovaze geniali de Trieste

- Che i vadi a remengo!

- Con chi te la ga Enio?

- Con chi che la go? No te son ancora ndada a buttar le scovaze ti, no?

- Orca, l'altro giorno iero, perchè?

- No, l'altro giorno iero mi! De una settimana che vado mi, ecco perchè te me domandi, sinò te imprecavi anche ti!

- Ma cossa nassi Enio? Dime.

- Nassi che se te va zò in strada a veder i bottini novi che i ga messo, no te capissi se i xe tumbani veramente o i ne ciol pel cul!

- Perchè? Cossa xe nato? Cossa i ga fato?

- Bon, ara, te conto, anche se te dovessi veder per capir.. Un pochi de giorni fà, desso no me ricordo quando esattamente, son ndà zò a butar le scovaze e go visto che iera i bottini novi. Finalmente, go pensà, perchè iera de tempo che i iera tuti roti e a remengo. Fato stà che vado vizin per butar i dò sacheti che te me ga dà e no trovo el pedal per verzerli.

- Che pedal?

- Ma Bruna, el pedal, quela sbara de ferro che te frachi col pìe e se alza el covercio, no? Bon, no vedo e zerco de capir come far.. alora vedo che i ga un buso sora e vardo come verzer sto buso, ma no capivo ah.. no ghe iera nissun covercio, sa, iera solo come due scove, una di fronte all'altra che coverzeva el buso al posto del covercio. Vardo ben e alla fine go capì che te dovevi fracar dentro i sacheti tra ste dò scove!

- No go capido sai ben, Enio, spieghite.

- Te go dito, come due scove grandi, nere, senza manigo, de traverso, che tappa el buso!

- E come te buti le robe dentro?

- Per quel te digo, xe un casin, te toca fracar, traverso de ste scove! Pò bisogna anche esser alti, ti no so se te rivi, che te son più picia de mi, che rivavo per un pel.

- Ma cossa, i xe fora? Ma come i se ga sognà sta roba?

- Mah, devi aver inventà qualche ingegner genio in comun, coss'te vol che te digo? Sa che qua a Trieste semo famosi per i mati, no? Se vedi che qualchidun xe finì in comun!

- Bon, ma forsi sarà studiai per far che sia più facile butar..

- No, no, te go za dito. Ti no te rivi, xe tropo alto, e pò te devi anche fracar sai forte perchè no passa facile. Coss'te credi che bestemio a far? Me go tutto smerdà perchè te me ga dà el sacheto che iera robe mole dentro e liquide..

- Umido ah pò! I disi de differenziar e mi fazo, ingrumo tutto a parte e te go dà anche quel del'umido.. Coss'te vol che lo buto in gabineto?

- Ma si, ma si, no xe colpa tua, xe colpa de quei geni che li ga pensai e quei tumbani che li ga fati e messi là, senza provar.. Che li ciapi le strighe! Ara son tutto che iozo ancora, e pò spuza, me par che xe banane marze che iera in sacheto, varda, tuta la maniga dela giaca me go sporcà!

- E come faremo alora?

- Ah, facile! Una volta i me frega mi, la seconda i ciapa! E infatti el secondo sacheto lo go lassà impiccà fora e lo butterà dentro i scovazini! No capivo infatti perchè iera pien de sacheti impicai de fora.. desso so! Se vedi che anche i altri se ga imparà!

- Urca ma se xe cussì allora vegnerà fora un schifez e un spuzon là intorno!

- Per mi no i dura sai, prima o dopo ghe darà fogo qualchidun! Pensite che iera una signora, povera, che la gaveva ingrumà i bisogni del suo can e no la saveva come buttar dentro..

- Che schifo! E come la ga fato?

Eh, no so, povera.. la iera là che la pensava come far co son rivado e la iera ancora là co son ndà via.. la gaverà messo in borsetta e portà a casa forsi, o la gaverà lassà là.. no credo che la gabi avù coraggio de fracar dentro! E dopo i se lamenta che la gente no ingruma le merde de can!

- Ma proprio tanto bisogna fracar, Enio?

- Si Bruna, te go dito, fracar forte te devi in quelle klinz de scove!

- Sempre geni gavemo qua a Trieste! Ara ti! Maledeta barca!