Damelo grando

- Damelo te go dito! Son tuta bagnada! Te go dito che lo voio grando!

- Cossa te son mata a zigar cussì, per strada, ara xe tuti che se volta..

- E ti damelo alora, e pò, cossa te bazili, tanto xe cinesi qua, no i capissi una parola. Damelo te go dito, no farme spetar se no te vol che zigo ancora. No te vedi che son tuta un'acqua? Cossa te lo ga a far grando se pò te lo dopri de solo? Dei che son bagnada!

- Sa cossa che te digo? Za che te usi sti toni, te va dei cinesi, oramai tuti ne varda, e te se lo fa dar de lori che no speta altro. Te entri dentro, tric, trac, e finida la paura! E se caso vol che no i capissi a vose, te se fa capir a gesti, te vederà che i capissi al volo!

- Te son el solito arogante! Facile far la boba qua dei cinesi.. te sa che lori li ga tuti pici e che no funzia! Voio el tuo che xe più grando e fato meio, per cossa te lo ga grando alora, per vederme a mi con quel de un cinesin?

- Voio xe morto in guera me diseva mia nona, forsi se almeno te domandassi "per piazer"..

- Ahhhh.. ecolo perchè el se la tira tanto! Bon vaben, te fazo contento, ma solo perchè xe mez'ora che son bagnada e no ghe la fazo più, arime, fradicia son, fin le mudande go tutte bagnade! Bon bon, come che te vol. "Caro amor mio, sicome mi son sprovista, te me prestassi el tuo, per favor, che te lo ga più grande e resistente, e sopratuto nol se sera sul più bel, come quei che ga i cinesi. Basta ciaparlo in man per inacorzerse dela diferenza, ma anche i oci bastassi! Grazie."

- Bon bon, ciapà qua, tien forte che xe più pesante dei altri, e se te va la punta in un ocio te ris'ci de farte mal. Però, pati chiari eh? xe mio e comando mi, cossa far, come far, quando fermarse, quando ripartir..!

- Si vaben vaben, però se te me lo davi prima, no me bagnavo cussì tanto, ara, son tuta slavazada desso, colpa tua e de sto ombrel che guai chi te lo toca!

El motto de Giro

- Ara che strico, Enio, varda el giogo.

- No val parlar gavemo dito Fedi, orca! Se Enio no varda rangeve, ma dovè star ziti!

- Tranquilo Giorgeto, no go sentì, anca perchè go sbassà el volume del'auricolar.

- Si, si, sordo te son, ma solo co te comoda.. come te ga sentì cossa che go dito, lora?

- Scolta Giorgeto, no ga importanza, indiferente, tanto ciapè comunque bastonade, de noi e de tuti. No se ricorda nissun de l'ultima volta che gavè vinto..

- Cossa te parli monade Fedi, che anca l'altro giorno gavemo remenà quei dò che iera qua! Domandighe al nostro caro oste Rudi la remenada che ghe gavemo sonà.

- Vardè che ve sento, xe vero, propio una bela tranvada i ghe ga dà a quei due triestiliani..

- Ma chi iera? no gaverè miga zogà contro Loli e Piston, povereti?

- No, dei, figurite.. lori che zoga a tresette! al massimo i zoga a scopa co le napoletane!

- E chi xe le napoletane?

- Mona de Giro, no le babe napoletane, le carte! intendevo dir.. ma cossa te digo a far!

- Ciò, Giro se ga sveià! Buta de bever dei!

- Bon, indiferente, volè saver alora o no volè saver? Tanto che contè che se i unici a vinzer..

- Ostregheta se volemo saver! Se i ga rivà a perder con voi devi meritar propio, de scoltar!

- Mona!

- Bon, conta, dai Giorgeto, movite.

- Alora, semo che zoghemo qua, in due, mi e Giro, tanto che spetemo qualchidun per farse una bela partida in quatro e vinzer qualche bevuda, e che sorsegemo un poco de quel bon che Rudi ne ga portà de provar. In quel vien dentro due de lori e, dopo che i ga bevù dò bicieri, i ne domanda se volemo zogar. Noi oviamnete.. chi se tira indrìo?! E gavemo zogà. Bon, no te conto e no te digo, no i gaveva alba, ma no del zogo, quel anche i saveva, le regole, macome che i stricava e bussava! ala vanvera! mi no so con che logica, te giuro, sembrava propio casual. Ah, Enio, xe vero?

- Si, de no creder, se un no vedi coi sui oci no riva a imaginar. No gavemo miga capì, sa, el criterio. Ma el bel xe che tuta la partida i ga discusso che Trieste xe italiana, che "i morti dela guera", che "la madre patria".. el solito dei, robe de triestiliani, pò! Tanto i disi de volerghe ben a Trieste e pò..

- E voi? Povereti ara, propio qua i doveva capitar! Gavessi volù veder, che rider, ara!

- Cossa te vol, noi te sa come la pensemo, come voi, e no se gavemo risparmià, e intanto li bastonavimo coi punti. Giro pò, che zà de normale, col se impunta, xe una disgrazia per tuti, quel giorno el gaveva anca bevù un fià de tropo, e dovevi veder che robe.. discorsoni, nomi, fati, date, robe de comizio.. el ghe ga fato la testa come un balon, che anca mi e Rudi no podevimo più!

- Forsi xe per quel che gavè vinto, li gavè insempiai talmente tanto..

- Che mona che te son! Te dovevi sentir, altrochè!

- Pecà che no ierimo, ara. E dopo? Ghe gavè fato anche butar el giro?

- Si, ah, logico. "Chi perde paga il giro" xe anca scito int'ela tabela.. i ga pagà ziti e boni!

- La roba più de rider xe stà co i xe ndai via. I ne fà "Ricordeve che comunque Trieste xe sempre stada italiana e sempre lo sarà!" Ah Giorgeto, te se ricordi? Ti te son s'ciopà a rider, e Rudi robe che ghe ciapi un colpo, co le lagrime el iera, tuto paonazo co la vena sula fronte che sembrava che staghi per s'cioparghe, mai visto rider cussì tanto!

- Si, e Giro xe diventà quasi viola in facia, e serio el ghe fà "Ignoranti siete, leggetevi i libri di storia." tuto in italian forbito, pò incazà "Se i pezo nemici, quei che se lassa inzinganar dale volpi che pò ghe incula la merenda!" sa che Giro no ga pei, no? e dopo el ghe disi el suo motto personal, a vose alta, con quel tono che se capissi che el ga fato teatro,  "Triestini, fatti non foste per esser italiani, ma per seguire virtute e conoscenza!"

Bombardamenti e rifugi

- Nono, ma sicuro che te pol postegiar là? No te vedi che xe un segnal che no se pol?

- No te capissi un'ostia, ma no i te impara a scola? Quel xe un vecio segnal de rifugio antiaereo, ancora dela guera.. se vedi che de quela volta sta casa no i la ga ancora piturada, altro che segnal de divieto!

- Come sarìa rifugio? Cossa vol dir?

- Vol dir che co iera la guera, la seconda guera oviamente, e iera i bombardamenti, el Comando de Corpo de Stato Magiore gaveva ordinà de costruir dei rifugi, dove che la gente scampava co sentiva le sirene. Co te sentivi le sirene te ciapava una bela strenta, e te dovevi ciapar sù, impiantar tuto quel che te fazevi e corer a sconderte in rifugio.

- E perchè ga scrito U.S.? Cossa vol dir? xe inglese?

- Macchè inglese! Cossa ghe c'entra i inglesi? Quei doveva ancora rivar! U stava per "Uscita" e S stava per "Sicurezza", uscita de sicurezza pò!

- E perchè no i ga scrito "Entrata" invece de "Uscita"? Miga de dovevi scampar fora, te dovevi scampar dentro, no?

- Xe vero, te son acuto come tu nono, brevo, eco de chi che te ga ciapà! Però in sto caso no c'entra, perchè no iera fati per la gente che scampava, ma per chi che dopo li doveva zercar se vigniva zo la casa. Pensite che i doveva esser sai resistenti, anticrollo pò, ossia che anche se la casa vigniva zò, el rifugio soto restava intiero con tuti quei che ghe iera drento, e che iera anche 40 de lori, almeno cussì ghe iera stà ordinà ai costrutori dele case. Imagina se una casa vigniva bombardada: quei che iera imbusai, restava stropai drento e iera compito de chi che vigniva a zercarli de cavarli fora.. cussì, se iera scrito fora de dove che se li cavava fora e i li trovava subito.

- Se vedi che le prime volte no i trovava de dove entrar per ciorli, giusto nono?

- Si, probabile, e lora i ga scrito de fora el punto de dove che i gavesi dovudo uscir!

Piston va de Irma Bocadolce

I conta che un giorno Piston, che de nome vero el fà Piero, ma che tuti ciama lo stesso Piston, dela famiglia dei Triestiliani, ga volù ndar co una dona de mondo, quele.. un poco cussì insoma, che te fa divertir per qualche lira, quele che te fà l'ociolin co te passi per strada, se gavemo capì? indiferente, un putanon, per parlar schieto! E in quel periodo iera sai famosa una certa Irma, Irma "Bocadolce" i la ciamava, tanto che anche Piston iera vignù a saver dele sue performans, perchè in bar, se sa, tuti i parlava e le vosi, co una xe brava, gira sai veloci. Bon, alora, tuto incuriosido de provar anche lui, el se ciapa convinto, el ghe domanda i schei a su mama disendoghe che ghe serviva per andar a comprar no so cossa e qual ordegno, e zito zito el va in Cavana, el ciapa el vicoleto, quel che tuti sa, ma fa finta de no conosser, el entra in un portonzin che xe sempre sochiuso, el fà le scale, e in secondo pian el bussa una portisina, un poco logora e consumada del viavai de gente che ghe xe passada giorno dopo giorno nei ani. "Irma" iera scrito sula porta, su de una targheta de oton, e soto iera scrito a biro "bocadolce", che se vedeva che qualchidun gaveva zontà, sai contento dela prestazion! Una bela baba, de quele beleze che xe più fascinanti che bele per davero, fàssino dovù sopratuto al'esperienza piutosto che a la natura, ghe verzi e lo saluda. Lù, che impacià el xe za de natura, essendo un poco lole dela nassita, con quela là davanti, lù, che una mula no la gaveva quasi gnanca mai vista del vivo cussì de vizin a tu per tu, no ghe vien quasi le parole fora, tanto che el riva pena a saludar! Sta baba che iera sai sgamada, se ga inacorto subito de quanto lole el iera e per no perder tempo e rivar al dunque la fà, sparada: "Cento euri xe, se te vol.." 

Bon, no me crederè, ma come che el ga sentì tuti quei bori ghe xe tornada subito la parola e el se ga messo a contrattar.. no per furbizia, magari! ma perchè veramente nol gaveva tuti quei bori. "zinquanta" la fà ela, e lui gnente, "no rivo" el disi. "venticinque, una robeta legera" disi ela, per darghe el contentin zà che el xe là. Lui però, zinque euri contai el se gaveva fato dar de su mare, gavemo dito pò che no'l iera una gran zima! Cussì avanti a contratar, fin che la perdi la pazienza e la ghe fà "Scolta cocolo, con zinque euro solo una sega sul pianerotolo te se pol far, de solo!" la ciapa e la ghe sera la porta in facia. 

Bon, no crederè se no lo gavè conossù per bon! Cossa xe successo? Xe successo che passai diese minuti el ghe bussa de novo la porta e co la verzi sorpresa, la lo vedi tuto sudà, col fiaton e paonazo, con quel facion de ebete sodisfato, che el ghe da i zinque euri e "grazie de tuto, arivederci signorina".

Due gatini triestini sfigai

Una sera che la Bora sufiava forte Gino, dito "Loli", e Piero, dito "Piston", i dò fradei dela famiglia dei Triestiliani, che abita in quarto pian sora Bruna e Enio, co iera in giro in Cavana, i trova dò gatini per tera, tuti iazai e afamai. Se sa che no xe dò cime tuti dò, no xe Triestiliani per gnente, ma se sa anche che no i xe cativi, povereti, Gesù ghe ga dà poco, ma almeno un poca de pietà e compassion si! Cossa i fà e cossa no i fà, ala fine i decidi de tignirli un per omo e sicome un, disgrazià, gaveva un'orecia taiada, Loli, che iera el più compasionevole, disi de volerlo lui.

Dopo un per de giorni che i ghe sta drìo però i se corzi che anche quel de Piston se ga fato un taio e dopo un giorno el perdi anche lui quel toco de orecia, propio come quel de Loli. Cossa i fà e cossa no i fà, Piston ghe vien un lampo de genio, el ciapa el povero gatin e el ghe taia un toco de l'altra orecia, quela bona. Ghe dispiasi, perchè el gaveva compassion, ma el fà lo stesso, altri modi nol vedeva. Bon, passa qualche altro giorno e sti gatini cressi, magna, zoga insieme e lori sempre li ciol de sera e i li porta ognidun in camera sua a dormir. Fin che un giorno, de sera,  co i torna, anche el gatin de Loli ga la seconda orecia taiada: cossa xe nato no se sa, ma zogando in qualche modo el se devi gaver taià. I lo cura e ala fine el sta ben, però dopo aver cavà le bende i se corzi che xe de novo come prima, tuti dò senza orecie! Alora Piston, che de solito tra i due iera quel che brilava de più, anche se brilar xe una parola forte in sto caso, el ciapa de novo el gatin e el ghe taia un toco de coda, altro modo nol vedeva.. ghe dispiasi sai che quasi el pianzi, ma co toca, toca, zachete e via la coda! Passa ancora un poco de tempo e i gatini sta ben, vispi più che mai, senza orecie tuti dò e senza coda un, ma i sta sai, sai ben, perchè Loli e Piston xe un poco lole ma ala fine xe boni muli, come se disi, muli de cuor, più che de zervel. Insoma tuto fila lisso fin che de novo, un giorno, el gatin de Loli se fa mal.. porconi e bestemioni! propio in te la coda! cossa femo e cossa no femo, ala fine ghe toca taiarla perchè se no fà infezion! No ghe par vero de coss che ghe toca, co la sfiga ciama, ciama forte e anche zigando! I gatini ga tuti dò le orecie taiade uguali e le code anche. "Come femo?" domanda Loli quasi disperà, e Piston sta volta propio no sa cossa far, idee ghe vien ma no se pol: "se ghe taio le zate nol camina più, se ghe taio la testa el mori, se ghe taio l'usel.. meo alora che ghe taio la testa! cossa fazo?" cussì el pensava, caminando su e zo per la corte, do' che i li gaveva ingrumai. Ma intanto che el se danava a zercar una soluzion e Loli pianzeva, per fortuna xe passà de là nona Nera che dopo averse fato contar tuto la ghe disi tranquila: "No fè prima a ciorve un, quel nero, e l'altro, quel bianco?"

El boscheto rovinado

 

- Te ga visto sta foto del Boscheto, Fedi? Che scempio!

- Go visto si, go compagnà Franchino a portar in giro el can ieri, e propio per de là semo passai.. robe de no creder, me gavevo dimenticò de contarte.

- Sicuro che iera Franchino e no Franchina?

- Ma si dei, ostregheta, se go quasi novanta ani, dò te vol che vado? Ancora gelosa, Lina, te son?

- Sicuro! anche se no te funzia, xe el pensier che conta! E ti te son sempre stà malandrin.. come tuti i omini pò!

- Dai, dai.. no dir monade. Te sa che te voio ben, cos te vol che bazilo drìo de altre! Bon, comunque, indiferente, passemo de là, mi e Franchino, che ciacolavimo, e tutintun cossa se vedemo davanti i oci? sto ato de vandalismo! ne ga ciapà un nervoso al'inizio.. ma pò solo sconsolazion. Che tristeza ara, sti fioi de ogi no ga altro de far che spacar tuto? Perchè pò? No i capisi che xe anche de lori? Bon bon inutile parlar, tanto cos te vol? No esisti spiegazioni logiche per chi xe sempio de natura!

- Inutile szervelarse, no te riverà mai a capir, co un xe mona xe mona!

- Zurli ah pò! Ghe volessi che altri muli, più sgai rimeti a posto e ghe fazi veder come se fà se se usa el zerveleto. Mi fazesi subito, ma la schena no me tien e i genoci me bala! Sinò subito farìa!

- Si, ghe volesi che qualchidun fazi un bel gesto per bilanciar sta cazada, e magari ghe dassi l'esempio! Noi veci semo, ma forsi qualchidun più giovane..

Green Day a Trieste

- Tira zo sta carta Fedi, no pol esser che ogni volta che rivemo de ti se incioda tuto!

- Sa come se disi, Enio? Pian e ben!

- E se no ben almeno pian! Visto che te ga anche perso el conto e i se ga fato tuti i danari!

- Miga colpa mia! te son ti ghe te ga sbaià, te me ga inzinganà e fato capir tuto altro, coss'te me bussi a far? te dovevi ndar lisso là!

- Bon dei, indiferente! Tanto iera za in conto che dovevimo lassarghe un giro, per compassion, vero caro Giorgeto?..

- Cossa mai compassion che ve calemo le braghe co volemo!

- Enio, lassemoli creder, cussì almeno i va casa contenti, quando ghe capita de vinzer un'altra?

- Si, si, se ricorderemo ben co i ga vinto, iera el giorno dei Brindei, impossibile dismetigarse!

- Machè Brindei, coss te parli, mona?

- Brindei, quei che canta in piazza grande, i musicisti pò, quei inglesi, me par.. o mericani.. bon, indifferente!

- Green Day se ciama! ara sto altro.. Brindei el li ciama, ciamili brindai alora ah.. cussì femo "cin" e pò bon!

- Go scoltà per radio e go capì mal, credevo co la bi.. bon sucedi!

- Tuto sto casin per dò fioi coi cavei spetinai e ste canzonete pò, tute uguali, te ga visto che scandal? Tuto i ga serà, transenà, urbi in giro, ambulanse, pugliotti..

- Giorgeto, no te capisi un ostia, solito brontolon te son, xe solo che bon che vegni qua sta gente, i ne fa conoser, xe zente famosa e tuto el mondo ne varda par tivù, coss te frega se i te sera dò strade per città? de sera pò, gnanca te fussi che te ga de passar per forza per de là! E pò fà morbin!

- Si ah, ga ragion Enio, beata l'ora che vegni qualchidun qua, xe ncora pochi! Dovessi esser ogni settimana un, sa che festini, pien de mulerìa, turisti e bobane pei locai, almeno per lori no fossi più crisi! I xe anche bravi un poco, go provà a scoltar de mio nipote e devo dir che, bon, no sarà mai come quei de una volta, ma i se la cava i muli! Ti Giorgio no xe per ti. Ti te son sai indrìo co le carte, ti solo valzer te pol scoltar, la marcia de Radetzky, e Danubio Blu.

- E pò fa ben un poca de mulerìa in più qua, tuti veci semo, ara. Te ga dito ben, Fedi, ogni settimana ghe volesi, tanto i se esalta per un che femo ogni morte de papa, anzi, ogni cambio de papa! Territorio Libero dovessi esser, internazional!

- Si, e quel'un ne saluda come, co vien? Mandi! Ma va in mona volevo risponderghe, ma no iero..

- Lora si che fossi ogni settimana un conzerto, fussimo come Londra, Parigi, New York.. luci sempre impizade, altrochè studar per sparagnar!

- Internazionai pò, fossimo! Città del mondo! Inveze desso i ne magna solo sora e no ne vanza gnente!

- Chissà de tasse co sto concertin cossa che se gaverà magnà el stato.. A Trieste dovessi restar, tuto! e investì par el prossimo conzerto e altre robe pei muli!

- Distroparse le orecie dovessimo, e scoltar le nove generazioni, veci semo oramai, un fià de borin che porti aria nova, Trieste da sola ghe volesi, come se disi, "chi fa da sè fa per tre"!

grazie a farco777 per  l'ottima ripresa video!

Spesa e musina

Bruna - Cos te fa con quela cassa de vin in man? No te volerà miga cior, no? Te sa che semo cisti in sto periodo, e dovemo far musina, Enio!

Enio - Ma orca.. dò botiglie cos te vol che sia?

Bruna - Te go dito: no! Se gavemo dito l'altro giorno de far musina, che sinò no rivemo a ndar in vacanza sto estate.. meti via, dai, femose sto favor.

Enio - Eh bon ah, però alora, scusime, quela crema che te ga in man cossa xe?

Bruna - Questa no c'entra, xe crema de beleza, servi per la pele, ringiovanisi, xe quela che me diseva la Ilde!

Enio - Ma scolta.. e el discorso de far musina alora? Dove xe finì? Te me ga pena dito de meter via dò fiasche de vin per sparagnar..

Bruna - Ma questa xe per farme bela per ti, amor!

Enio - Scolta amor mio, premesso che te son bela come una putela e mi son e sarò sempre inamorà de ti, se propio te volesi sembrar ncora più incantevole de quel che te son, con dò fiasche de vin, che costa sai de meno dela crema, sa che più bela che te me sembrerìa?

Un scovazon

Lina - Che merdon!

Fedi - Lina coss te parli cussì? Se te parli sempre forbito.. Cossa nassi?

Lina - Eh scusime Fedi, legi! Legi qua! Xe quel che i ne ga fato diventar, propio un cesso!

Fedi - Orca, gavevo sentì qualche vose in giro de ste scovaze, ma dopo ever leto.. te ga ragion, i ne ga trasformà propio in un grando cagador!

Lina - Si, no so se gavemo fato ben a ciorse sto compiuter, che pò xe anche un patèma per doprar per noi veci, robe de mulerìa xe! Forsi iera meio no saver e continuar a scoltar solo quel che te conta giornai e tivù.

Fedi - No, no, meio, almeno savemo, prima i ne scondeva e no savevimo gniente, desso che tuti se pol zercar soli le robe, i ga poco de scriver per insempiar la gente! Ara, legi anche qua Lina mia, ara che robe, meno mal che xe gente che ga coragio de scriver, speremo che no i li neti!

Lina - Semo veceti noi, ma pensite i giovini, che ga una vita davanti e ghe toca passarla in scovazon, e pagando un mucio de tasse! Sa come se girasi nela tomba Franz Josef se el savesi come xe ridota Trieste, che co el la ga lasada la iera ancora un gioielin!

El paradiso

- Nono, ma cosa vol dir che la prof oggi a scola ne ga dito che forsi Trieste sarà paradiso fiscale?

- Cossa? Cussì la te ga dito? Che prof xe stada? Ghe femo subito un monumento!

- La profesoressa Krunz, quela de matematica, perchè?

- Sai sgaia in efeti! Xe vero, la ga ragion, co una picola precisazion però: noi semo zà, anzi, semo sempre stai paradiso fiscal, ma no savevimo de esser, perchè i triestini per ste robe xe un poco lole. Lole in senso bon eh, no sta capir mal! I triestini xe furbi e sgai, ma solo co ga el fogo soto el cul, per el resto i xe "viva là e pò bon", difati xe el moto triestin! Ghe basta un gireto in osteria, ndar a barcola un per de orete, portar in campagneta la morosa e poder lavorar quel minimo, ma propio el minimo, che basta per ciapar quei dò schei per far ste robe. Dificile che i sia arivisti e lavoratori acaniti, come che par esempio xe i furlani o i milanesi, in pratica "i podesi sai ma no i se aplica", come ti a scola pò!

- Come i filosofi greci, nono!

- Forsi anche si, el triestin xe un pensatore romanticone in efeti, ma per certi versi un poco spuzafadighe!

- Ma alora semo zà paradiso fiscal? No go capì..

- Si, semo zà! Dal 1947, co i ga fato el Trattato di Pace, dove i ga scrito che Trieste sarà un stato indipendente, e no doverà pagar le tasse a nissun.. Trieste, le sue terre e el suo porto, insoma, indiferente, i lo ga ciamà el "Territorio Libero di Trieste". Ma cos te studi a scola? no i ve conta ste robe?

- No, ste robe no, però parlando con la prof de mate xe vignù fora el discorso, perchè la ne spiegava le percentuali e per farne esempi che capimo la ne ga parlà dele tasse, e parlando de tasse la ne ga fato l'esempio dei paradisi fiscali e quindi de Trieste e del TLT, oltre che de altri.

- Ah, desso capisso come mai una prof de matematica ga tirà fora el discorso.. no me rivavo a capacitar! Comunque, indiferente, el discorso xe che Trieste de quela volta xe zà zona franca. Tuti sa, ma i triestini no, xe i unici che no sa un ostia de sta storia. Pensite che tuti i paesi del mondo ne credi un paradiso fiscal, che val a dir come un grande duty-free per capirse, in grando però, sai grando, come un stato pò, dò che no ghe xe tasse e dogane de alcun genere.. per dirla curta, sa? Per esempio, legite qua sul sito del ministero degli affari esteri norvegese, te vederà che inte la tabela ghe xe anca Trieste, segnada co una x che la identifica come "Tax Havens and Offshore Financial Centres", che vol dir "paradiso fiscale e centro finanziario offshore"! Inglese me par che te sa no? almeno quela i te impara a scola?

- Credo de gaver capì, nono. Ma alora perchè tuti paga lo stesso le tasse qua?

- Eh, quel xe discorso lungo, robe de storia, robe longhe. Bisogna prima saver el contesto storico che iera nel '47 e cos che xe vignù dopo. Se i gavessi rivà a nominar sto klinz de governator, forsi che le robe sarìa stade sai diverse.. e alora altro che Montecarlo fossimo! Bobane per tuti sarìa! Purtropo, te go dito, el contesto storico iera sai difizile quela volta, pensite che iera pena finida la guera, che ghe iera el bloco sovietico e el bloco ocidental che fazeva falische e ris'ciava ogni dò per tre de s'ciopar tuto de novo, iera el ris'cio de una terza guera mondial! E noi che no savemo, Trieste iera proprio in mezo. La "Questione Trieste" i la ga ciamada. Adeso ti te vedi el porto cussì, con dò tre navi, ma Trieste ga el porto più a nord del Mediterraneo, e gnanche far aposta, quel coi fondai più fondi, e per de più in mezo, nel cuor, del'Europa.. te capirà che tuti lo voleva, specialmente perchè i gaveva visto le potenzialità, dopo che l'Austria lo gaveva ben valorizà nei secoli prezedenti, cussì "o de tuti o de nissun" e ala fine i la ga fata stato indipendente, Territorio Libero di Trieste, Free Territory of Trieste, supervisionà de un governator che gavessi rapresentà tuti quanti i paesi dele Nazioni Unite e tutelà in tempo stesso i interessi de tuti sti paesi.

- Eh bè, ma cossa c'entra sta roba co le tasse che paghemo e no dovessimo pagar?

-Ghe entra, ghe entra! Perchè per via de sti casini internazionai che iera nel'aria, profitando de sta situazion delicata, e del fato che no i rivava a meterse in acordo sul governator che gavesi apunto governà Trieste, se doveva eser filo-sovietico o filo-ocidental, le furbe Italia e Yugoslavia, che quela volta gaveva quel volpon de Tito, se ga ben che spartì el Territorio Libero di Trieste. Zà nel '54, co l'aministrazion xe pasada dei aleati a l'Italia col maledeto Memorandum di Londra, i ga comincià a inculcarne co un giogo de parole che Trieste iera pasada a l'Italia, "Trieste torna all'Italia!" i zigava.. e inveze iera solo che l'aministrazion dei aleati pasava provisoriamente al'Italia perchè no i iera boni de trovar un governator che ghe ndasi ben a tuti, fin quando no i gavesi rivà a nominarlo. Questa xe stada la prima caramela; la seconda xe stada Osimo, el famoso Trattato di Osimo.. In pratica, per taiar curto, ziti ziti, Tito e i taliani se ga trovà e se ga meso d'acordo sui confini, sulla gestion dele minoranze e altre dò robete. El fato xe che lori lo ga spaciada come una definizion dela provisorietà del'aministrazion che i gaveva, perchè te devi saver che la iera provisoria, e questo tuti lo saveva, per questo i se ga trovà a Osimo a far sto pastroch! Però bisogna sotolinear che int'el tratato no xe scrito in nissun logo che la sovranità xe passada dal TLT al'Italia, o ala Jugo, per questo i xe stai, te go dito, sai furboni.. no i podeva scriver, sinò sarìa vignù fora un putiferio internazional, i xe stai ben atenti, in modo che, ufiziialmente, questo podessi passar per un semplice trattato bilaterale, che vol dir semplicemente tra dò de lori, in pratica i se meteva in acordo su come aministrarne e come spartirse la gestion del nostro teritorio. Per ciò che passi la sovranità gavessi dovù esser presenti e firmar tute le nazioni che ga firmà el Trattato di Pace, poco ma sicuro! La carognada xe stada che a noi i ne la ga contada come un diventar definitivo de l'una e del'altra nazion: la zona A diventava definitivamente italiana, e la zona B jugoslava. Cussì almeno i la contava, profitandose del poter che quela volta i gaveva co l'informazion publica.

- E come ve gavè fato inzinganar cussì? No ve rendevi conto?

- Cos te vol? Iera altri tempi, prima iera dopoguera, dopo se stava ben, ma iera sempre sti russi e americani che iera sul pìe de guera e l'atenzion iera tuta là.. pò lori ga fato una bela campagna disinformativa e pensite che in quel tempo, fin pochi ani fà, no ghe iera internet, che te fracavi un boton e te vardavi tuto, no iera miga Google! Per far una ricerca te dovevi mover le gambete e ndar in biblioteca, e se te trovavi.. bon! sinò.. cice! No iera miga tuti i libri e documenti del mondo in biblioteca! E chi gaveva voia? Chi gaveva voia de farse el cul per zercar robe, che iera comunque contrarie a quele che i te inzinganava sui giornai o i te impastrociava a scola? Per questo desso xe diverso! Speremo almeno!

- Bon, bon, go capì. Alora bisogna sparzer sempre più la vose, che tuti sapi, giusto, nono?

- Eh si ah, per forza!

- E cossa se pol far, alora, per ciò che el TLT diventi veramente come che el dovessi esser?

- Urca, la femo longa qua, desso no xe tempo, te conterò un'altra volta, dei. Va a magnar desso, che tu nona te speta, sinò la se rabia.. che i gnochi de susini xe più boni caldi!

El governator del TLT

Driiiin.. Driiiin..

Bruna - Si? Pronto? Chi xe?

Lina - Ciau Bruna, son mi, Lina..

Bruna - Ah, ciau, come xe? Tuto ben? Iero drìo a cusirghe le braghe a mio nipote, no capisso, el xe sempre coi genoci de fora, gnanche el fazesi posta! El xe vignù trovarme ieri e cossa el me porta? solito, dò peri de braghe de cusir, tute dò sbusade sui genoci. E no servi dirghe de giogar a balon co le braghe vece, no! sempre quele nove! e dopo "nona te prego cùsime, se ga roto"!

Lina - E bon, e cos te vol, xe mulerìa, ah.. Beati lori! Che i se diverti, lori che i pol, noi co ierimo putele un per de braghe te durava anni, e se te le sbusavi iera lignade! No iera schei quela volta, e gnanche pan! E dir el vero, gnanche braghe per noi, solo cotole iera, solo i mas'ci gaveva braghe, e solo curte iera, longhe solo co te diventavi un ometo!

Bruna - Altro che desso, tute le ultime robe tecnologiche, che mi no capisso gnente. Mia fìa me ga regalà per l'ultimo nadal un telefono celulare e mi no lo rivo a doprar, ogni volta che toco cambia tuto. Ciò, una volta iera facile, te gavevi diese botoni, coi numeri e iera finì.. desso te ga voia, te tochi un atimo e te parti mile robe che no capisso, l'ultima volta che go tocà me ga partì una telefonada internazional no so dove e me ga finì el credito, e de quela volta mi no toco più, solo rispondo, che là te pol star sicura, i me ga dito.

Lina - Eh.. ste tecnologie xe cussì, o te resti al passo, o zachete! te son taiada subito fora. 

Bruna - Te son za ndada a firmar pel governator?

Lina - Mi? Subito ah, el primo giorno! I iera col barachin in largo Barriera. Iera sai bruto tempo, ma son ndada lo stesso. In verità, te digo, iero del dotor là vizin e quindi dovevo andar comunque fora de casa, ma credo che sarìa ndada lo stesso. E ti?

Bruna - Mi son ndada ieri in Cavana, iero in giro con Enio che me ga compagnà a far spesa e gavemo profità per firmar. Pensite che i me ga dito che e i ga zà ampiamente superà i mile de lori che ga firmà, un sucesson!

Lina - Si si, me ga contà la Ilde, che su marì xe con lori che colabora, che xe un casin de zente che desso se interessa, sempre de più, e el numero cressi ogni giorno. Che Dio dassi, ara!

Bruna - Ma si ah! Sarìa anca ora che sta cità se svei un poco! Mi el mio lo go fato, e anche Enio, desso speremo che fazi anche i altri!

Lina - Purtropo ancora tanti no sa gnanca a cossa che servi el governator a Trieste.. Iero l'altro giorno in Cremcaffè con Germana, quela dei fioi gemei, te ga presente? La go incontrada in bus e za che ierimo de mesi che no se vedevimo, alora gavemo dito de beverse un cafè e contarse un poco dele ultime nius, sa, coi fioi e nipoti xe sempre robe nove de contarse. Bon, insoma, ierimo là e iera per tera un volantin de Trieste Libera, ela lo ga ingrumà e xe vignù fora el discorso del governator..

Bruna - E cossa la disi ela?

Lina - E cossa te vol che la disi? No la saveva un boro! Alora ghe contà mi, ghe go dito del Trattato di Pace, del Memorandum di Londra.. pò, solito, ela me ga dito de Osimo, che val quel, e mi ghe go spiegà perchè che no xe valido. E ela? Ela no la ga podù che, stando cussì le robe, darme ragion e anzi, la se ga come impizà, tanto che no la vedeva l'ora de ndar casa a contarghe a su marì e zercar su internet, che i se ga 'pena imparà a doprar. pò ghe go spiegà mi che sta roba del governator servi per continuar quel che iera lassà interoto co xe rivai i taliani a ministrar, che servi cioè per finalizar finalmente el Territorio Libero di Trieste, ma solo "finalizar", perchè esister.. esisti zà!

Bruna - Ben fata! E dopo? Te ghe ga dito quando se femo un'altra partida a Ramino, xe mesi ormai che strasinemo sta storia, una volta no pol una, dopo no pol l'altra.. Bisogna concretizar!

Lina - No, no go rivà perchè me xe passà el tempo contandoghe del TLT, che ela me incalzava e domandava robe in drìo man, te go dito, la iera infervorada! E insoma, a un certo punto go visto l'ora e son dovuda scampar de corsa che sinò me serava la farmacia. Ara, giusto giusto, son rivada per un pel!

Ma andando via la me ga dito che la me ciama doman per saver meio dove xe de ndar per farse la tessera e firmar, cussì doman se meteremo d'acordo anche per quel, che xe vero, xe passà tropo tempo de l'ultima partida.

Bruna - Bon, me fa piazer si, anche che te la ga vista ben, no vedo l'ora de vederla, xe sai cocola e bona anima ela! Desso vado che devo finir de cusirghe ste braghe, se sentimo doman alora, che te me conti forsi novità!

Lina - Bon si, ciau bela, cusi cusi, che tanto dopo el spaca de novo, fioi, ah, pò!

La Voce di Trieste

Fedi - Scolta qua, Enio: "..suo ruolo naturale di porto franco baricentrico della Mitteleuropa e dotato del regime internazionale di zona franca più solido e favorevole del Mediterraneo e del continente, oltre che fra i migliori al mondo" cusì recita.

Enio - Musica per le orecie, caro Fedi! Finalmente i scrivi qualcosa, e anca ben! Ma dove te legi? sul bugiardelo?

Fedi - Uh, figurite! quei gran furboni no i scrivi un boro de sta roba, xe tabù! No perchè no i vol, povereti, ma no i se pol espor fin che no diventa roba uficial. Te vederà che dopo i corerà anca lori co le bandiere in man, sventolando de qua e de là e publicando copie de stampe e cartoline d'epoca e robe co l'alabarda!

Enio - E dove te legi alora?

Fedi - Qua xe scrito! su La Voce di Trieste, xe quel giornal indipendente che i parlava l'altro giorno, fora del cine.

Enio - Ma dove se ciol? In edicola de Mario el xe?

Fedi - Si, ovio, dove te vol trovarlo, in paneteria forsi? Xe un giornal, ah! Ma se Mario li ga finidi e no te trovi più in giro te pol vardar anche su internet, ma dopo mi me bala i oci a leger là, cos te vol, veci semo oramai!

Enio - Lassa star che con tuti quei che i te regala in giro desso, te podessi forsi trovarlo anche là! Vecio te sarà ti, comunque, ara che mi ogni dò giorni vado a Barcola e me fazo la passegiata fin al castel e indrìo ritorno, e d'estate me fazo anche la nudada, quindi vecio.. un klinz!

Fedi - Ma se te no te vedi un'ostia e te toca andar in bus che i te ga cavà la patente per veciaia! E comunque no xe de quei gratis, quei xe pieni de publicità, sto qua xe un vero e proprio giornal, xe un quindicinal che parla ben a fondo de Trieste, che pò xe quel che ne interesa noi, cos te vol che me freghi ormai, de le ciacole dei politici taliani? o de Ruby che pianzi? Per l'amor del ciel!

Enio - Tasi che xe stà colpa de quel mona de dotor se no go più la patente, lù me ga dito de leger la seconda  riga de letere e inveze intendeva la terza, e mi devo indovinar? e dopo naturale che vien fora la barufa, mi iero sicuro de mi e lui de lù. Ma no stame ricordar dei, che sinò me ciapa nervi tuto el giorno. Pàssime, pàssime dei, che legio anche mi, te me ga stuzigà!

Fedi - Alora te son anca sordo oltre che orbo, se no te ga gnanca capì cos ch'el voleva? Ciapa qua, legi ben, dopo torna però, se ciama Pietro, che no go finì, sembra picio ma xe tanto de leger perchè xe tuto interesante. E pò lo vol leger anche Lina, ghe lo devo portar casa.

Enio - Sordo e orbo te sarà ti! Bon grazie, dago solo un'ociada, dopo passo de Mario e lo ciogo anche mi. Te ga ordinà sti cafè?  Sior, per cortesia la ne fa dò capi in bi?

Fedi - No, ogi no voio capo mi, la ne fazi solo un capo in bi per lui e per mi un gociato. Me ga dito el dotor de bever meno late e laticini, causa de sta roba che go in gola, me fa gastrite e me sento come un brusor dopo.

Enio - Bevi coreto alora, te vederà che te pasa tuto de balin, e forsi te diventi anche de novo putel!

Fedi - Che Dio dasi!

Svola balini

Fedi - Ciò Enio, dove xe sparì Jure? Te lo ga forsi visto, ti?

Enio - No, savevo solo ch'el doveva ndar a cior dò buloni a Gorizia, de quela misura inglese che qua no se trova. El iera tuto incazà che "Come? qua, a Trieste, no se trova misure inglesi in tuta la cità, e un che ghe servi cosa fa? Se taca?" cussì el brontolava in oficina, e sicome el bubez xe in ferie ghe ga tocà ndar lui, fin Gorizia.

Fedi - Un'altra auto inglese i ghe ga portà de riparar? Chissà quanti Cristi e Madone el ga tirà zo, dopo quela de l'altra volta, che nol saveva come se studava le luci. Tute strane ste auto inglesi,el diseva.. cosa iera? Una Triunf me par, no?

Enio - Si si, me par propio quela.. Basta che no i ghe tiri col s'ciopo! Te ga sentì de l'altro giorno? de quel mato cos che ghe ga tocà a Gorizia? go leto sul giornal.

Fedi - Qual? No so gnente, conta, conta, dei.

Enio - Gnente.. un mato caminava in zentro a Gorizia e a un certo punto se ga trovà un balin de piombo in te l'orecia! Ma nol saveva ben cosa iera, el xe andà in ospedal e là i ga trovà el balin e cusì la puglia ga zercà e ga trovà che iera un mona che sparava col s'ciopo de la finestra de casa.

Fedi - No posso creder.. che gente mata che xe in sto mondo! E dopo i ne disi a noi che semo una cità de mati! Almeno noi gavemo quel che gira col stereo in spala, duro come un scalin de la matina a la sera, la baba che se vesti d'epoca che gira col pasegin, svodo, e qualche altro insempià, che no i ghe fa mal a una mosca! Altro che s'ciopo!

Enio - Dopo i lo ga portà dentro, ma te vederà che doman el sarà fora come prima! No xe più i tempi de una volta, co iera Franz Josef..

Fedi - Eh.. te sa si! ormai no xe più alegorie, xe propio vero, in tuti i sensi, che nel'aria svola balini!

Che Dio dasi!

Driiiin.. Driiiin..

Lina - Pronto, chi xe?

Bruna - Ciau Lina, son mi, Bruna, come te sta? Te disturbo?

Lina - No, figurite, a sta ora go za disbratà tuto, Fedi xe ndà a far benzina in Jugo e mi stavo vardando tivù, ma no ghe xe gnente de bel a sta ora.. te stavo quasi per ciamar mi, ara ti! te me ga precedù!

Bruna - E mi go su el gulash che se cusina e no go gnanche mi niente de far deso, cusì te go ciamà.

Lina - In realtà vardavo, sì, tivù, ma nel fratempo lustravo un poca de argenteria, me go inacorto stamatina che la iera tuta nera ormai e la gaveva propio bisogno de una bela netada.

Bruna - E cos te vol.. no xe mai finì per noi, co ben te finisi de una parte te toca cominciar de l'altra!

Lina - Te sa, si! Miga come quei altri dò, i gaverà sì lavorà, ma deso i xe ben che in pension e no i fa un boro tuto el giorno!

Bruna - Almeno deso i xe ciapai de sto TLT, che Dio dasi che i rivi a far qualcosa de bon! Almeno no i buta via tempo a ciacolar in bar dei tempi che furono. Almeno i fa qualcosa de bon e de utile!

Lina - Si, si, meno mal, dei. Son sai contenta de Fedi, lo go visto come ringiovanì, animado, arzilo come un tempo. El xe sempre che el cori de qua e de là, che el ghe dà una man coi bancheti in cità e che el ghe fa promozion.

Bruna - Go visto si, anche Enio uguale, bon bon, speremo che porti a qualcosa.. Te ga sentì le ultime nius?

Lina - Che nius? Cosa xe suceso?

Bruna - Che finalmente l'altro giorno, per l'esateza el 15 maggio, xe incominciada in tribunal la "prima valutazione sul difetto di giurisdizione dell'autorità italiana nella zona A del Territorio Libero di Trieste", cusì citava l'articolo, go leto su Trieste Libera.

Lina - Orca no go leto ancora, dopo legio ben. Dime ti intanto, cosa diseva?

Bruna - Gnente.. intanto diseva - te strenzo, sa? - che un giudice italian no ga alcun potere a Trieste, perchè xe, come se sa, teritorio fora dela giurisdizion italiana, e spiega, per via del Memorandum di Londra. Perchè con quel Memorandum el governo italian ga ciapà el mandato fiduciario internazional per aministrar el TLT, ma in quel mandato iera comprese un poche de robe che l'Italia no ga tignù sai conto. Questo diseva in curto el mandato: garantir l'indipendenza, la democrazia e una bona aministrazion del TLT, promover la finalizazion del TLT- figurite! - garantir la parità giuridica dei citadini aministrai, indiferentemente dala lingua o cultura, conservar e promover el Porto Libero internazionale nel'interesse del TLT e dela comunità internazionale, mantignir i conti e le tasse separai dei quei del'Italia e no domandar tasse relative al debito publico italian.

Lina - Quel che diseva so ben, go studià sai la question, ma te fa sempre ben a ribadirlo, sopratuto te dovesi ripeterghelo a Rita, la siora del terzo pian: mi go tentà più volte, ma ela per principio no la vol gnache leger e informarse ben, la disi de eser italiana, che l'Italia xe tuto, che se inventemo tuto e semo noi i mati che "no sa", ebene si, la disi propio che "no savemo", ma inveze ela? No la ga mai leto niente, i ghe ga dito a scola che xe cusì e de quel giorno, basta! no la ga più volesto saver altro. Legi, digo mi! Legi! xe trattati internazionali, a disposizion de tuti, no pol scriver bale, le bale al masimo xe quele che i te ga contà, o che ta ga leto sui libri de scola ale elementari, scriti nel pien dopoguera, che no ga el valor uficiale che inveze pol aver un trattato firmado de 21 nazioni!

Bruna - So, so, imagino.. anche mi me toca, co parlo in giro. Certi te scolta e se va a informar, e xe quei che de solito dopo te ringrazia de averghe verto i oci.. altri inveze no vol propio sentir parlar e se tapa le orece!

Comunque l'articolo dopo disi che el 17 luglio inizierà la discusion in tribunal, sulla validità del Trattato di Pace del 1947 di Parigi e del Memorandum di Londra del 1954.

Lina - Sarìa de sperar che no vegni fora robe de parte.. no ghe xe conflito de interessi, scolta? El tribunal italian co un giudice italian, che devi decider de una question cusì de alto interesse? Ghe volesi una roba super partes, un tribunal speciale internazionale, no? o una roba del genere, cosa te disi ti?

Bruna - E bon, speremo che i ciami almeno qualche esterno.. vederemo! Intanto za vedo el putiferio de bandiere de Trieste che sarà là fora quel giorno! Che Dio dasi!

Lina - Si, che Dio dasi veramente, stavolta pò servisi propio, no ga ancora tante scians Trieste, se resta soto el governo italian!

Bon, vado a meter via sti do tocheti de argento, che devo far zena.. tra un poco torna Fedi e no rivo a combinar più gnente che el me xe tra i pìe e el me insempia de ciacole!

Bruna - Ciau, se sentimo doman che andemo a far la spesa al'Ofer.

Trieste triestina

- Nono, ma cosa vol dir che Trieste xe solo triestina?

- Vol dir che no la xe de nisun altro se no de se stessa, in pratica i ne vol far creder che semo italiani, ma in realtà semo solo triestini.

- E come xe posibile? A scola i ne insegna diverso. I ne ga dito che Trieste xe pasada al'Italia..

- Xe andà cusì, scolta ben:

Finida la guera, tuti i stati se ga meso d'acordo su come sarìa stà dopo, come sarìa stai i confini e i risarcimenti dei perdenti ai vincitori e cusì via.. i se ga trovà a Parigi e dopo aver trovà le soluzioni i ga scrito el Trattato di Pace di Parigi del 1947, che tuti ga firmà e quindi acetà.

Anche l'Italia ga recepì nel suo ordinamento legislativo, col decreto del presidente provisorio de lo stato 1430/47 che con la Legge 3054/52 diventa legge de lo stato a tutti i efeti "e fatto obbligo a chiunque spetti di rispettarlo e farlo rispettare".

Sto conceto te lo pol trovar anca nel art. 10 dela costituzion italiana "L'ordinamento giuridico italiano si conforma alle norme del diritto internazionale generalmente riconosciute." Quindi in sto momento tuto el Trattato di Pace xe legge del stato italian ancora in vigor.

- E nono, cosa xe scrito in sto Trattato di Pace?

- Xe sai longo, te digo solo la parte che parla de noi, el resto te studierà a scola..

L' art. 21 punto 1 disi: "E' costituito in forza del presente Trattato il Territorio Libero di Trieste […] Il Territorio Libero di Trieste è riconosciuto dalle Potenze Alleate ed Associate e dall'Italia, le quali convengono, che la sua integrità e indipendenza saranno assicurate dal Consiglio di Sicurezza delle Nazioni Unite."

Al punto 2 disi: "La sovranità italiana sulla zona costituente il Territorio Libero di Trieste [..] cesserà con l'entrata in vigore del presente Trattato."

El Trattato di Pace scrivi in modo chiaro e completo come ga de suceder el pasagio da la Sovranità Italiana a quela "Triestina". Nei allegati VII (Regime Provvisorio) e VI (Statuto Definitivo) vien definido nei partcolari come ga de eser el Territorio Libero di Trieste (TLT): indipendente, col proprio parlamento unicamerale con parlamentari eleti tra i cittadini nati e residenti a Trieste, con un Governatore Internazionale (non italian, né Jugoslavo, nè del TLT) nominà da l'O.N.U. e con pagà da l'ONU. E vien anche stabilì come l'Italia devi garantir le pensioni za maturade, l'integrità industriale e leteraria dei citadini del TLT e che questi no xe tignui a contribuir al risanamento del debito pubblico Italiano (allegato X). In più l'Italia devi agevolar in tuti i modi posibili l'economia e l'indipendenza del Territorio.

- Ma nono.. e chi controla dopo che tuto vegni fato come xe scrito?

- In teoria dovesi eser el Comissario del Governo, in Prefettura. Cusì scrivi anche Wikipedia: "Inoltre, nella Provincia di Trieste, presso la Prefettura, ha sede il Commissariato del Governo a tutela e garanzia degli accordi internazionali del Trattato di Pace con l'Italia firmato e ratificato nel 1947 e della Lettera d'Intento firmata a Londra nel 1954 dove avvenne l'estensione dell'amministrazione civile da parte del Governo Militare delle Potenze Alleate ed Associate, controllate dal Consiglio di Sicurezza dell'ONU, alla cosiddetta zona A del Territorio Libero di Trieste."

- Che robe! Ma perchè no se sa niente de ste robe?

- Eh.. xe tropi interesi drìo da parte italiana, se Trieste sarìa veramente zona franca, come dovesi eser, sarìa longhi per l'Italia! Pensa che diritura el tribunal xe abusivo:

Nel regime del Statuto Definitivo i disi inoltre che i citadini del TLT devi eser procesadi de un tribunal con dei magistrati nominadi dal Governator del TLT e con due soli gradi de giudizio, che vegni istituida una polizia locale e che, sopratuto, el stato devi eser neutrale e smilitarizzato.

Quindi el stato italian ga dovesto abolir la corte de appello dal tribunal de Trieste col Decreto Legislativo n. 1319 del Capo Provvisorio dello Stato del 4 ottobre 1947. La particolarità xe che sta legge xe ancora oggi in vigor! La legge che abolisi el tribunal de secondo grado del Friuli Venezia Giulia no xe mai stata abrogada! Forsi un tentativo i lo ga fato.. 61 ani dopo la sua entrada in vigor, ma el “distratto” legislator italian con el Decreto Legge n. 200 del 22 dicembre 2008 ga abrogà la lege sbaiada! anziché el Decreto Legislativo n. 1319 del 4 ottobre 1947 el ga cancellà el Decreto Legislativo n. 1319 del 4 novembre 1947, che no esisti! (vedi articolo relativo).

- E el porto, nono? che tanto i parla..

- Speta, no aver furia, che deso rivo.

Te go dito de alcuni alegati che xe nel Trattato di Pace di Parigi del 1947.. bon! ghe ne xe altri, e un de questi l'allegato VIII parla proprio de questo. Anzi, più che parlar, con questo alegato proprio se istituisi el PORTO FRANCO LIBERO INTERNAZIONALE DI TRIESTE.

- E cosa vol dir?

- Speta te go dito, abi pazienza. Vol dir el nostro porto xe un porto extraterritoriale, che significa che no xe de nisun stato al mondo, ma che inveze xe a disposizion de tuti i stati del mondo, infati nel'art. 3 al punto 2 recita: "L’istituzione di zone speciali nel Porto Libero sotto la giurisdizione esclusiva di uno Stato qualunque è incompatibile con lo status del Territorio Libero e del Porto Libero."

In più, con l'art. 5 al punto 2, (che disi: "Con riferimento all’importazione o esportazione dal o in transito attraverso il Porto Libero, le autorità del Territorio Libero non possono imporre, su tali merci, dazi doganali o pagamenti diversi da quelli imposti per servizi resi.") el nostro porto ga un'altra roba importante: oltre al trafico in esenzion doganale, ga anche la manipolazion de le merci, che vol dir che xe incentivà l'insediamento in porto de atività imprenditoriali internazionali perchè in esenzion fiscale, e pò disi, nel'art. 18 al punto 3, che tra i lavoratori devi eser asunti con titolo preferenziale i citadini residenti nel TLT.

Altra roba importantissima xe che l'amministrator del Porto Libero, come el governator, devi eser nominado da le Nazioni Unite e non devi eser de Nazionalità Italiana, nè Triestina, né Jugoslava, per poder tutelar gli interesi del Porto Libero e del Territorio Libero.

- E perchè alora xe tuto diverso adeso?

- Purtroppo dopo el Trattato di Pace xe vignuda, come te saverà za, la guerra fredda, e tra el 1947 e el 1954 la nomina del Governatore xe stada disturbada dai casini tra America e Russia, in pratica ognidun voleva un governator che propendesi più de la sua parte e quindi, avendo entrambi el dirito de veto, ogni volta che vigniva proposto un candidato che iera de una parte, l'altra lo bociava, e sicome el mondo iera spacà in due, no i trovava vie de mezo.

Cusì, ala fine, no rivando a trovar un governator che ghe andasi ben a tuti, col Memorandum di Londra del 1954 tra Italia, Irlanda, Jugoslavia e Regno Unito, vien deciso che l'aministrazion civile provisoria del TLT zona A pasa dal governo Militare Alleato all'Italia e della Zona B alla Jugoslavia. 

Ma sta'tento! Nisun ga parlà de sovranità, ma solo de aministrazion, e provisoria! cioè fin ala realizazion del TLT, come scivi l'art. 2: "[...] The Italian and Yugoslav Governments will forthwith extend their civil administration over the area for which they will have responsibility." (Wikipedia: Memorandum di Londra)

De quel momento, co la partenza de l'Esercito Alleato e l'arrivo dei Bersaglieri, se ga una vera e propria invasion militar, e resta el problema dela nomina del governator, che no se ga mai risolto fina a ogi.

- E Osimo alora? A scola i ne ga dito che col Trattato di Osimo Trieste diventa definitivamente italiana..

- Bale! I zerca de contarnela, ma no xe cusì. Col Trattato di Osimo no se parla de "sovranità" ma ancora e solo de "amministrazione", de confini amministrativi e de rispeto dele citadinanze. 

Sto tratato xe nullo per le Nazioni Unite perchè xe solo un trattato bilaterale, cioè solo tra due nazioni che no annulla nè modifica i trattati internazionali in vigor, perchè semplicemente no pol.

Basti pensar che solo l'Italia, e solo dopo 12 anni, nel 1987, lo ga presentà alle Nazioni Unite, e infati el segretario delle Nazioni Unite incaricado, ga scrito una prefazion, ciamada "pagina zero" do che el disi che Nazioni Unite ciol atto de l’esistenza de sto accordo bilaterale, ma non implica asolutamente che sto documento possi andar a modificar el Trattato di Pace o la 16esima Risoluzione del Consiglio di Sicurezza.

- Ma se ste robe se le sa, perchè alora nisun fa niente?

- I fa, i fa.. prima no se podeva per via de la guera freda, e l'Italia se profitava, ma deso che le robe xe cambiade, xe internet e informazion libera e xe cisturia, tuti sta incominciando a mover el cul. Difati xe za un mucio de triestini che ga firmà una "Petizione al Parlamento Europeo ai sensi del'articolo 227 del Trattato dell’Unione Europea sulla violazione del diritto di cittadinanza per i cittadini del Territorio Libero di Trieste".

Ma pò xe altre robe oltre a sta petizion, pensa che za più de 80 processi xe fermi per "difetto di giurisdizione", dove i giudici no i sa cosa far per dir che Trieste invece xe italiana. Adiritura un giudice ga chiesto, dopo che el Ministero de Giustizia, tramite l'ufficio esteri, ga delegà ai singoli magistrati de deliberar sul difetto de giurisdizion, la traduzion del Memorandum di Londra, perchè el se troverìa senza apogio italiano, solo soleto, a difenderse davanti al tribunal dell'AIA.

Pò un mucio de lori ga anche difidà el Tribunal italian a Trieste in quanto no competente per teritorialità.

Altri triestini, tanti, ga dichiarà nei seggi eletorali delle elezioni politiche 2013 e a quele regionali, con una dichiarazion scrita e firmada, de rifiutar el voto "in quanto le elezioni italiane sono illegali a Trieste".

Tanti, ancora, ga incomincià ad auto-tutelarse su le ingiunzioni de pagamento de Equitalia, disendo che no la xe competente per giurisdizion su Trieste.

E pò i fa cortei, i ga meso su una sede e un movimento e qualchidun se esposto più de i altri presentando anche una denuncia al TAR denunciando l'illegittimità delle elezioni regionali. L'ultima xe che i raccogli le firme per la nomina del Governator.. che Dio dasi! 

- Domani ghe chiedo ala prof de storia se la sa e perchè no la ne ga mai contà sta storia.

- Domandighe si, e se no la sa, vol dir che la fa finta o de no saver o de eser una prof de storia!

Deso movite, andemo a magnar che tu nona ne speta co la jota calda!

 Fonti:  http://triesteadesso.blogspot.it/,  http://triestelibera.org/it/,  http://it.wikipedia.org/wiki/Pagina_principale