El Faro della Vittoria

A.D. MCMXXVII

Splendi e ricorda

i Caduti sul mare

MCMXV - MCMXVIII

Questi xe i versi, che ga scrito probabilmente D'Annunzio, che se pol veder scriti sula grande piera de Orsera che xe ala base del "Faro della Vittoria" (cussì se ciama) de Trieste, e che servi a ricordar tuti i marinai e i caduti dela Prima Guerra Mondiale. Infati, sto faro xe cusì bel perchè doveva esser anche un monumento, oltre che iluminar el mar e el ga tuta una storia drìo..

Intanto vardemo dò che el sta: i lo ga messo sul cole de Gretta, propio sora el torion principal del Forte Kressich, che i ga inglobà nel basamento e che iera un grande e sai importante compleso militar dei austro-ungheresi, al tempo el fior fior del'architetura militar, progetà dal'architeto Karl Möring per difender la cità de chi che vigniva del mar e forsi anche de chi che in cità gavesi fato casin con somosse e robe simili.

El Faro della Vittoria xe opera de l'architeto Arduino Berlam (1880-1946), ultimo dei famosi Berlam che ga lassà tante bele impronte artistiche a Trieste e ga contribuì a farla bela come la xe. Arduino ga volesto, co un colpo solo, costruir un faro che funzi e che se vedi ben de lontan, visto che la Lanterna ormai iera tropo picia per tuto el trafico del porto, e alo steso tempo un monumento per comemorar el 3 novembre 1918, data in cui xe rivà a Trieste l'esercito italian e quindi finiva l'epoca dei Asburgo col Regno Austro-Ungarico.
In realtà, al'inizio i lo voleva far a Salvore, per via de Nazario Sauro che iera de Capodistria, ma pò i ga deciso che a Trieste serviva de più per el porto e per el significato simbolico che gaveva per l'Italia farlo proprio sora el Forte austriaco.

Un'altra curiosità xe che Arduino Berlam no ga volù schei per el suo lavor, anzi el ga messo dei sui come contributo, insieme a altri citadini de spico, al'Italia, a qualche banca e asicurazion e ai esuli de New York, per costruir tuto el faro.

I lavori ga comincià nel '23 e in tempo 4 anni el faro iera pronto e el 24 maggio 1927 Re Vittorio Emanuele III xe vigù a inaugurarlo, impizandolo per la prima volta.

El faro xe fato cussì: el basamento, come gavemo dito, xe el torion principale del Forte Kressich, che ga i muri spessi do metri e mezo; el ga una gradinata dove sora in cima ghe xe una lapide (con scrite le parole che xe scrite sora, al'inizio de sto articoleto) e ancora più su xe un primo balconcin che circonda tutto el faro. Pò el va su a forma de campana, dove xe tacada l'ancora del cacciatorpediniere Audace (che xe la nave italiana che el 3 novembre 1918 ga atracado in Molo San Carlo, che dopo appunto xe diventà Molo Audace). Continuando a salir, xe un ballatoio, de dove che efetivamente parti el faro, e xe mesa una statua in piera che rapresenta el Marinaio Ignoto, fata del scultor triestin Giovanni Mayer (1863-1943). La statua xe el simbolo del steso faro, perchè ricorda tuti i marinai morti nela prima guera, e la xe alta 8,60 metri.

El corpo del faro xe fato de cemento armado rivestido in piera de Orsera e finisi con un alargamento a capitello che tien su el balatoio, anche quel in piera lavorada. Sora, finalmente, xe la lanterna che ga intorno un terazin chiuso da una cupola de rame.
E sora de sta cupola xe la statua dela Vittoria Alata, fata sempre de Mayer e forgiata dal maestro d'arti Giacomo Sebroth. La statua rapresenta la Dea Nike, portatrice de vitoria, fata de rame e alta 7,20 metri. Nela man destra la ga una corona de aloro, nela sinistra la ga una fiacola che la alza al ciel. La statua dela Vittoria Alata xe sai importante perchè xe un'opera de ingegno per come la xe stada fata, infati co la Bora che sufia cussì forte a Trieste, iera pericolosa lassù in alto, e alora i ga escogità de meterghe dei tiranti nele ali, cussì che gabi un poco de giogo co sufia forte. Risultato: co xe vento, par che la movi le ali, almeno cussì conta chi che ga visto!

Bravo xe sta infati anche l'ingegner progetista Beniamino Battigelli, anche lui ricordà con una lapide de ringraziamento dentro nel'atrio del faro, vicin de una statua de Arduino Berlam (fata da Mayer) e due proietili dela corazata austro-ungarica Viribus Unitis, de cui la cadena de l'ancora xe usada come contorno del giardineto fora del faro.

Numeri: altezza 67,85 metri - altezza dal mare 116 metri - intensità 1.250.000 candele - portata 35 miglia - peso 8.500 tonnellate - costo 5.265.000 de Lire

Mappa Google:

Visualizzazione ingrandita della mappa

Mappa Bing:

Visualizza mappa più grande  |  Ottieni indicazioni  |  Visualizza vista ravvicinata



Fonti:  http://www.tuttotrieste.net/varie/faro/faro.htm,  http://it.wikipedia.org/wiki/Pagina_principale

El funeral de Marieta

Siora Lina ghe telefona a siora Bruna. Dopo un poche de ciacole sul come xe e come no xe, sul tempo e do ricette, le pasa finalmente ala cronaca dei gosip triestini..

Lina - E te sa l'altro giorno Toni che gaveva el funeral de quela povera disgraziada de Marieta?

Bruna - Chi Maria, quela de la pescheria?

Lina - No, no.. Marieta de Toni, quela che nove ani fa i la credeva morta, mesa in bara, messa del vescovo in catedral de San Giusto e tuto el resto, e in tel funeral, co i la portava, un mona de quei che la gaveva in spala xe inciampà, la bara xe cascada e sta qua la se ga sveià de colpo.. e bon che i se ga corto perchè la se lamentava, sinò i continuava el funeral e i la sepeliva viva!

Bruna - Ah si me ricordo deso, come no? E chi no se ricorda! Iera sul Picolo un mese, che no i parlava de altro, interviste e robe cusì, anche quei de rai uno xe vignui, me ricordo si.. e beh cosa xe nato? la xe morta deso, no? l'altra setimana me par.. e do giorni fà iera el funeral, quel vero.. cosa la se ga sveià de novo?

Lina - No, no, stavolta i la ga sepelida per bon, ma xe ndà Fedi che conoseva el cugin de Toni, su marì, e el me ga contà che el iera proprio vizin dele scale fora dela cesa coi la portava in spala.. e quel mona de marì ghe ga dito pian ai muli, ma Fedi ga sentì lo stesso, "Ocio ai scalini muli!"

Ghe xe andà mal el primo giro, ma el secondo nol voleva risciar!

Bruna - Povera Marieta ara, ela morta e el marì che deso farà festini!

La carta de identità del TLT

Bruna: Te son ndà a cior le carte de identità nove? ara che le sarà rivade forsi..

Enio: No, ancora no credo, i ga dito diese giorni, xe pasai pena sete, cos te vol che vado a romperghe che i sarà incasinai co sta storia del non-voto. Anderò dopodoman , cusì ghe porto la dichiarazion de non-voto e insieme ciogo le carte, che anche se no sarà pasai propro diese, forsi i le gaverà za!

Bruna: Movite e portighe deso, che tanto devo disbratar e no te voio tra i pìe, cusì te me ciol anche el pan che mi no go rivà a ndar. E za che te va te ghe domandi se per caso i le ga za.

Enio: Uff.. te son dura, te go dito che no le sarà pronte.. bon bon dei, vado, sinò no te moli più co sta storia!

[Dopo do orete Enio torna a casa col pan.. e le carte]

Bruna: Ma do te son sparì? do ore.. te se ga fermà a ciacolar in bareto no? e mi qua che speto co la zena pronta..

Enio: Ciò, te gavevi ragion, i le gaveva za! Machè bareto e bareto, do ore go spetà, iera fila, pien de mati che ghe consegnava e anche chi che voleva farse anche la carta nova.. un casin! E pò la sede xe ancora picia, iera tuti strucai e chi che spetava fora.. ma i ga dito che i sta ciolendo una più granda, in un posto sai bel, un posto degno i disi.. in zentro zentro..

Bruna: Ma no stame dir.. alora no gavemo fato solo noi el voto non-voto? Bon segno! Ara che forsi Trieste se sveia! Anche Lina e Fedi xe ndai, la me ga ciamà proprio poco fà e la me ga contà. El mato del segio de lori iera anche lui tropo cocolo, el ghe ga confidà che anche lù ga fato cusì. Speremo che i conti presto ste dichiarazioni che ghe gavemo consegnà, cusì savemo zirca quanti semo, ma go paura che saremo tanti se te me disi cusì, meno mal! Lina me ga dito che tante sue amiche ga votà cusì, e chisà quanti che no savemo..

Enio: Mah.. che Dio dasi! Scoltavo le ciacole, là che iero, e sembrerìa de si, che xe stai tanti che ga fato cusì. Meio! Intanto vara qua che bele. Teritorio Libero di Trieste.. Comune di Trieste-Trst.. Carta d'identità n. B0015.. del signor.. ecc. sai ben fate ara! sembra proprio vere, anche el timbro xe, xe proprio spudade de quele che gavevimo coi aleati, pecà solo che manca la firma del governator, sarìa tropo bel se fosi za vere! Metighe una bustina, te ga? cusì no le se rovina.. quasta xe storia, tienla ben!

Bruna: Te capirà! Ovio che la tegno ben, cos te credi?! Pecà in foto ara, te go dito che dovevo prima andar de la paruchiera, tuta sta furia che te me ga meso indoso, ara che cavei che me xe vignui!

Enio: Ma se te son bela come un fior!

Bruna: Si, si, ciol pel cul.. ara che te ga in piato, magna che diventa fredo!

El voto-non-voto de Trieste

Fedi: Lina movite che ndemo a votar.. dei, te son sempre tardi, te speto in auto.

Lina: Sempre che te sbufi, va zo e speta! Gavemo tempo.

[Per questo un forestier che vien a Trieste vedi sempre veci in auto col motor impizà: xe tuti i marì che speta le mogli che se finisi de impetar i cavei e meter roseto, intanto i legi el Picolo in auto o i forbi l'auto col pano.]

Dopo 20 minuti Fedi parti co la sua 128 rossa e a bordo la sua Lina, ala fine i se vol sai ben e tra un sbufon e l'altro lui fa tuto quel che la vol, come un putel inamorà. E dopo una bona oreta i xe de ritorno.

Lina: Ma ti cos te disi? gaverà fato uguale anche siora Ema? che ieri la go vista un poco indecisa.. la diseva "e dopo chi ne paga la pension? e dopo chi ne paga la sanità? e dopo, se no xe polizioti più, chi varda le strade? vien pien de tepisti e criminai.." Mi ghe go dito sa? che no sarà problemi, che el cambio riverà gradual, che al posto de aver la sanità italiana gaveremo la nostra, del TLT, e sarà sicuro anche meio, e cusì per tuto el resto. Finalmente qualcosa funzionerà! Voio veder se dopo nasserà qualche casin! Te li gaverà qua, no a Roma, e te poderà andarghe dir del vivo e subito le robe in facia se no funzia! Ma no so se la ga capì.. ti cos te disi?

Fedi: Te ghe ga dito ben si, però te sa che la xe de Durazo! Vederemo, tanto dopo te la vedi no? Invece sa chi go visto, intanto che te spetavo? Xe vignù zo el mulo, quel del quarto pian e intanto che l spetava la moglie, ciacolando el me ga dito che ndava anche lori a votar, e anche lori fazeva sta storia del non-voto, perchè ghe ga dito su cognà de far, e lù xe in croce rossa e là i se spargi subito la vose e i ga votà tuti cusì, anzi, no i ga votà, xe meio dir! Te vedi che gavevo ragion..

Lina: Ma se te gavevo dito mi de sta storia, che me ga dito la baba de la lateria.. e anzi, ti te ieri anche scetico al'inizio, te disevi "ma figurite, se fosi vero i gavesi za fato!"

Fedi: "Mi si che iero scetico, ma te credo, normale ah, co un te disi cusì.. ma comunque no te ma ga dito prima ti, perchè me ga dito Piero prima de ti, ma no te go dito perchè me volevo prima informar ben."

Lina: "Si, si, te ga dito prima Piero, figurite.. se quel se sveia sempre per ultimo!?! Comunque no ga importanza, l'importante xe che gavemo fato el voto-non-voto, cusì ghe disemo a sta Italia che vadi fora de le bale e ne torni el nostro, che se aministremo noi che semo sicuro più boni!"

Fedi: "Si, e che i se meti el rigasificator a Ostia!"