Gara di sci del TLT a Forni di Sopra (Prequiel)

Driiin.. Driiin..

- Pronto? Chi xe?

- Ciau Bruna, son mi, Lina.

- Oh Lina, te pensavo propio deso, come xe? tuto ben?

- Si dai, disemo de si, e ti? con la schena come xe?

- Ma vara, continuo a meter sti ceroti che scalda e far massagi e devo dir che un poco iuta.. xe sto tempo umido che inveze no iuta gnente!

- E cos'te vol? Xe cusì ah.. almeno no xe fredo e iazo come l'altro ano che no te podevi 'ndar fora de casa senza iazini, almeno qua a San Luigi, che xe tuto impirà.

- Contime tuto, perchè te me ga ciamà?

- Ma gnente, volevo saver come te stavi e se vignì anche voi doman a Forni di Sopra, visto el tuo mal de schena..

- Si ah che vignimo, te son mata che me perdo la prima gara de sci del TLT? scherzemo?

- Ah bon, sa, no xe per mi, ma son preocupada un poco per Fedi, almeno se xe anche Enio i se buta l'ocio un co l'altro.

- Uh te sta fresca alora.. anche lui xe testa mata. Ancora no go capì se i fa per bon anche lori, la gara, o se i vol solo vardar. A mi el me ga fato una testa compagna che el vol far, ma no rivo a capir se el scherza o el parla sul serio..

- Credo propio che i parli per bon alora, anche Fedi me ga dito che i fà! i xe mati!

- Mi no rivo a capir, i xe pieni de magagne e i va a zercarle col lumin! No i capisi che a una certa età xe meo lasar star?

- Ara, manca solo che i se spachi una gamba! Ma no gufemo dai, che ancora ghe portemo pegola.. Speremo che vadi ben e pò bon!

- Ah, mi conoso Enio ormai.. el me ga tanto dito che el andarà pian, solo per partecipar, perchè bisogna far in modo che sta gara sia sentida e gabi suceso, che xe una bela iniziativa, che unisi i triestini.. e tante robe insoma! ma so za, el se laserà ciapar dela gara e el vegnerà zo come un balin, come se el gavesi 20 ani.. coi muleti el se meterà a competer! mi lo conoso..

- Pò figurite con Fedi vicin, forsi iera meio se i ndava soli e no insieme.. i se monterà un co l'altro e i farà gara fra de lori! Come co i auti pò, e dopo i se s'cioca! Ormai riflesi xe quel che xe..

- Se pò sarà anche quei fenomeni de altri amichetti.. figurite, sicuro partirà qualche genocio!

- E speremo solo che no sia quel de lori ah.. tanto altro no podemo far!

- Mi, se Enio se fa mal e el me devi star un mese per casa co la gamba dura, piutosto lo mando ala Salus! cosa mai, per ste monade de infermierina mi no ghe fazo, ghe go za dito! che el se rangi!

- Si ah, no esisti.. lori fa i mone e noi sgobemo? e cosa semo? ebeti? che i se rangi si, se i se fa mal i pagherà!

- Bon dai, speremo che i vadi pian per bon come che i ga dito, tanto i ga anche el casco!

- Mi a Fedi ghe fazo meter la tuta de moto de nostro nipote, quela che ga quei tochi duri per proteger i ossi.. ghe go dito "o cusì o gnente, fà ti!". La ghe vanza un poco perchè mio nipote xe grando, ma no fà gnente. Lui disi che xe ridicolo ma mi no me frega, o cusì o gnente!

- Bona idea, deso ghe digo anche mi a Enio, tanto so a chi domandarghe una in prestito.. ara te saludo e ciamo subito, se sentimo dopo. Brava, ara, proprio bona idea!

- Si ah, quele tute xe fate per cascar in moto, cosa te vol che sia coi sci? tanto diverso? E scolta, merenda cosa te porti?

- Solito, panini, un poche de polpete e dopo go fato strucolo. Ti?

- Devo ancora far, ma bon che te me ga dito, volevo far strucolo anche mi, ma a sto punto farò gnochi de marmelata oltre che i soliti panini e polpete anche mi.

- Bon, a dopo alora.

- Ah, se no te trovi una tuta per Enio, dime, che mio nipote dovesi aver anche quela de sua morosa che a Enio ghe dovesi comunque andar ben, che ela xe un calandron e la ga taia grande.

- Bon grazie, vaben, casomai te digo dopo.

- L'unica roba.. la xe tuta color rosa, ma meo de gnente, no?