El novo albero de Nadal

- Ciao Fedi, come xe?

- E come te vol che sia, Enio, vivo son, el resto solito! Ti, invece, te xe passà el mal de schena?

- Uh ara, de stamattina no go più, incredibile, speremo che duri!

- E cossa te ga ciolto? che go anche mi un poco..

- Gnente ara, proprio gnente!

- E come xe possibile? Cussì, tutintun, te xe passà?

- No so mi, veramente.. sarà che stamattina co son 'ndà in centro e go visto el novo albero de Nadal me ga ciapà talmente el nervo.. che, forsi quel, me ga fatto passar tutto! In compenso me se ga stropà el stomigo del nervoso!

- Che albero? No so gnente..

- Come no te sa? Se lamentavimo i altri ani de l'albero, no? Che iera indecoroso per una città come Trieste.. ma te dovessi veder sto qua! L'albero che la Serrachiani ghe ga regalà a Cosolini.. te devi veder.. anzi, meio de no! Sto qua el vinzi tutto!

- Perchè? Come el xe?

- Uh, no se pol descriver.. son pena tornà de Graz e iera tuto un festin, luci dappertutto e un albero maestoso, bel pò, proprio bel! E dopo rivo qua e trovo sta roba striminzida, che te vien de pensar "povero alberel"! Altro no suscita che passion!

- Ma vara ti, sempre pezo ah, devo andar a veder, son troppo curioso..

- Credime, te se fa mal!

- E bon ah, se vedi che xe ancora più cisturia, pezo de i ani passai!

- Speremo almeno che i refi co le luci, chissà..

- Sempre che no i voli sparagnar anche sulla corrente!

- Forsi che i se ga rabià coi triestini perchè i vol el Territorio Libero!