Movemose pel Porto de Trieste

- Cossa te ga nonno? Te son triste? Te pianzi?

- No, no pianzo, no..

- Ma te son triste?

- Un poco si, me fa passion veder sta città come vien amministrada, e sto Porto, povero, che no camina.

- Perchè nonno? Cossa ga che no camina?

- Uh ara, stemo una vita se te conto tutto.. varda, za che te piasi legger.. leggite qua, che xe scritto tutto ben per fin, te devi legger e studiar ben, perchè in qualità de triestin te devi assolutamente saver e farte un'idea tua, per no farte inzinganar, tutti i triestini dovessi legger e rilegger e memorizzar ben, tutti sti articoli:

• Il porto di Trieste va o non va? ..viaggio tra ciacole e realtà. (ragioniamo grazie allo studio 2012 di "MDS Transmodal")
• Trieste e l’ingannevole scenario del Corridoio Baltico-Adriatico.
• La specialità dimenticata del Porto di Trieste.
• Il porto franco di Trieste.
• La farsa itagliana del nostro Porto Vecchio.
• 1966 - Roma distrugge Trieste - La chiusura del cantiere navale di TS decisa dall'Itaglia.
• A Trieste i treni no fa ritardo perchè qua no i riva neanche!!
• Piattaforma Porto 2014.
• Porto Franco di Trieste

- Go letto nono, ma xe vere ste robe? E come pol esser che nissun no fa niente per sbloccar sta situazion?

- Eh picio mio, in verità no xe che nissun no fa niente, qualchidun anche se da tanto de far, ma te devi imparar come che funziona la gente.. per quel son triste.

- E come funziona la gente, nonno?

- Funziona che tutti prima de mover el popoci speta che lo movi i altri.. e quindi xe tutti che speta e nissun no fa niente, i triestini xe famosi pò per quanto ghe pesa el cul, ogni scusa xe bona! Tutti ga paura, o no ga voia, o ga la luna storta.. anche se xe robe importanti! Va a finir che i pensa "Bon, ma anche se manco solo mi, semo tanti e no cambia niente" e a furia de pensar cussì, nissun se movi!

- Ma a cossa te se riferissi?

- Un poco a tutto, te capirà co te cresserà.. solo co vedi bori, la gente vol moverse prima dei altri, per tutto el resto i speta sempre de esser secondi, no se sa mai! Xe el pensier dei pavidi, e de quei un poco vigliacchetti, che vol star de drio a sburtar quei che sta in prima fila e purtroppo xe un modo de far sai comune oramai. Ara là, desso l'8 dicembre sarà un'altra manifestazion, propio pel Porto, sto povero nostro porto, che xe come una bestia sofferente e moribonda, deperì perchè noi ghe da de magnar.. sarìa cussì facile, ma xe sempre qualche losco drìo che ferma tutto perchè ghe va ben cussì e ga i propri tornaconti. Vederemo desso quanta gente che vegnerà l'8 dicembre, vederemo.. sarà zima e tutti dirà "ciò, ma quasi quasi anche no vado, son zà andà alla festa de Indipendenza e gavemo fatto numeroni, anche se manco mi, sto giro, no se inacorzi nissun".

- Ma nonno, no, te vederà che sarà tanti anche sto giro, xe importante, i vegnerà..

- Ah magari, mi spero, perchè xe sai, ma sai, importante sta manifestazion! Doveremo esser in tanti, perchè xe l'unico modo per farghe capir a tutti che i cittadini triestini ghe frega de quel che succedi a Trieste. Solo cussì se poderà far qualcossa per sta benedetta città e sto povero porto, solo fazendo veder quanti che semo e spargendo la vose el più possibile. Ricordite picio, la conoscenza e la consapevolezza xe l'arma che vinzi sempre!

- Fedi, te ga finì de insempiar el picio co ste robe de grandi? Ndemo dei che se sfreda tutto, vignì a magnar!

- Lina, ara che no lo stago insempiando, ghe spiegavo ben come che funziona el mondo, el xe bastanza grando ormai per farse idee sue e ragionar.. giusto picio, digo ben?

- Si, nonno, voi me vedè sempre picio, ma mi ormai son grande.

_ Ma si, ovvio, xe tu nonna che te tratta come un fiol, mi te ciamo picio solo per abitudine, ma so ben che oramai te son grande.

- E nono, te dago una bella notizia, cussì te se tiri un poco su.. vegno anche mi l'8 dicembre, coi miei amici, gavemo za deciso e organizà.

- Per bon? Ben dai, bravissimi! Te ga sentì, Lina? Che bravi sti fioi, un esmpio per tutti!

- Si, si, go sentido.. ben fatta! Però coverzite ben che no te ciapi mal, farà un fredo can, mettite la sciarpa e la bereta, e sughite i cavei, prima de andar fora! Cossa xe sta mania del gel, che te fa andar fora co la testa bagnada..!!

Letta libera Trieste, per viz

- Ma te ga sentì Bruna? Te ga sentì?

- Cossa Enio? Dime..

- Come cossa? No te ga sentì cossa che ga dito Letta?

- No scolto quele robe mi.. te sa che go giurà de no scoltar più le monade che conta i politici.. me ga dito el dottor che per la pression devo star tranquilla.. e mi tranquilla e calma voio star!

- Bon, si, xe vero.. ma questa merita, varda.. anzi, scolta:

- No posso creder! "Viva Trieste! Trieste libera!" el ga dito?

- Par de si ah.. ancora no go capì cossa che el voleva dir sotto sotto.. perchè savemo, no, che el xe un furbon? e sicuro nol ga dito a caso!

- Ma forsi che el voleva dir che el sta con noi? Me par strano, ma chissàdìo!

- No Bruna.. figurite! Magari! Due xe le robe.. o el ga capellà, nel senso che el voleva sostener i animi de quei che vol diventar italiani e che credi alla favoletta che Trieste dopo la guerra xe stada liberada e diventada italiana, ma allora iera meio se el gavessi dito "liberata" perchè "libera" proprio no la xe.. oppur iera el suggellar tra le righe un qualche accordo con Putin, tipo "Ok, mi te dago questo se ti alle Nazioni Unite te sburti perchè Trieste diventi a tutti i effetti italiana, e se per caso riva qualche triestin a chieder qualcossa, ti te fa el sordo, o meio ancora, te lo seri in qualche gulag in Siberia.", e in sto caso el "Trieste libera" voleva esser un riforzin, tipo "Allora chiaro, no? Trieste libera, mi go el mio e ti te gaverà el tuo". Quale delle due no saverìa quale sceglier, meio de tutto iera se el zontava un "Grazie dell'ospitalità"!

- Come sarìa "diventi a tutti i effetti italiana", Enio?

- Si ah, perchè con tutto sto putiferio che sta fazendo finalmente un pochi de triestini che ga sal in zucca, prima o poi i doverà cior le carte in man, e a quel punto, siccome sul Trattato di Pace xe scritto che Trieste no xe Italia, e le carte no i le pol scancelar col bianchetto e correger, o i convaliderà finalmente che Trieste xe indipendente e capitale del Territorio Libero oppur i doverà sentarse tutti insieme e scriver carte nove, contro el voler dei triestini "saladi" e col beneplacito dei triestini tumbani che ancora credi che esser Italia xe figon! E a quel punto, ovvio, ghe servirà comunque aver più alleati possibili che ghe pari el cul.. Ehhh te digo mi, credime Bruna, Letta no xe mona.. chissa cossa che el ghe ga promesso a Putin.. sicuro una fetta del nostro cul, se no tutto, per invoiarlo e far in modo che sia importante per i russi che l'Italia mantegni el controllo su de noi!

- Ecco, te vedi, uffa.. me se sta za alzando la pression, no te dovevi contarme.. desso me tocca cior le pirole!

El tram de Opcina e un armeron

- Enio! Anche ti che te ciapi la 4?

- Si, vado a farme un giro in Napoleonica.. ti? Te vien con mi?

- Ara, quasi quasi.. Volevo andar a trovar Berto a Opcina, ma co sta giornada, serarse in casa, xe de cofe..

- E dighe anche a lui che el vegni, no?

- Ma coss te vol che el vegni! No te lo conossi? Lui fora de casa nol va mai, el xe agorafobico.. se disi cussì pò?

- Booo, me par de si! E bon.. e te ghe va dopo allora, a trovarlo, no te pol? Cussì dopo la passeggiata andemo a ciorse una pasta crema e pò bon, te ciol anche per lui e te ghe porti!

- Orca, te me tenti sai!.. fame pensar.. ma si dai, chi se ciava? Andemo dei!

- Bravo, omo, cussì se fà, ciapar e ndar, e pò bon!

- Però che bale sta 4 ara.. te sa qualcossa ti del tram? Andar in bus no me garba sai.. iera cussì bel in tram, cussì cocolo e rilassante! e un fià romantico soprattutto, co te vedi sti panorami de Trieste dalle alte, sentà su le panchette de legno.. ara, me vien quasi una lacrima e i brividi, mi che no son gnanche per ste robe pò! I lo rimetterà in funzion, si o no?

- Mah.. chìssadìo! Qua a Trieste gavemo solo tandui che ne governa!

- No solo a Trieste, vara, in tutta Italia! TLT subito, ghe volessi.. e piade in tel de drìo a chi so mi!

- A proposito del tram, te se ricordi che ridade, proprio con Berto, che se gavemo fatto? Forsi che per quel nol va mai fora de casa!

- No me ricordo ben, ma forsi no iero mi.. te me confondi con qualchidun altro!

- E cossa, no te ieri ti quela volta che el ne ga contà la storia del falegname che lo ga remenà e dopo lo voleva anche denunciar? Orca, iera una bela tiritera, proprio strano che no te se ricordi! Ma ghe scaza contar in giro, quela volta ghe xe scampà de contar perchè el gaveva bevù un bicier de troppo!

- No, ara che te se confondi, te go dito, no iero, o almeno mi no me ricordo. Contime dei, che forsi me vien inamente.

- Bon, in pratica un giro el xe andà in città a far qualcossa che desso no ga importanza. Intanto su moglie bisogna dir che iera mesi che ghe diseva de giustarghe l'armeron perchè ogni volta che passava el tram, che lori abita in piazza Dalmazia propio sora le rotaie, sto armeron ballava e fazeva casin, e a ela a son de sentirlo ogni do per tre, ghe urtava sai e ghe fazeva vignir un diavolo per cavel. La ghe diseva ogni giorno, "Ciama el falegname", "Ciama el falegname", "Ciama el falegname".. ogni santo giorno! E lui ghe entrava de una parte e ghe andava fora de l'altra, "Domani Uccia", "Domani ciamo", "Domani fazo".. Fin che un giorno, appunto sto giorno famoso che el xe andà in città a no so far cossa, ela se ga stufà e lo ga ciamà ela, el falegname. Tutto ciaro, no, fin qua?

- Si, si, va avanti.

- Bon, insomma, riva sto toco de omo de falegname, e la ghe conta "Scolti sior falegname, qua mi no posso più.. ogni volta che passa sto benedettissimo tram, sto armeron comincia a ballar e me trema tutto, fina i bicieri in cusina. La fazi qualcossa per favor!" Sto povero omo comincia a vardar prima le gambe, de sto catafalco de armeron, per veder che no fossi una più longa e una più curta e dopo eventualmente livellar.. insomma, come che ghe sembrassi ovvio a tutti de dover controllar. El varda de qua, el varda de là, el varda de sotto, de sora, de drìo.. sembra tutto a posto.. Allora el ghe disi "Siora, mi me par che qua xe tutto dritto, no se pol far sai, secondo mi no xe l'armeron che balla", ma ela insisti "La vardi sior mio, son sicura, xe sai tempo che qua ogni volta che passa el tram me balla tutto, go vardà ben e xe proprio sto armeron qua, che scantina e se movi. Cossa la vol dirme, che xe tutto normale? Che me invento? Alora vol dir che no la capissi un ostia del suo mestier!" Ciò, el falegname no ghe andava de passar per mona e, ciapà de l'orgoglio, el varda de novo tutto, ben e meio. Pò, a un certo punto, visto che de fora iera tutto perfetto e nol rivava a trovar gnente che no ndassi, el ghe disi a Uccia "Qua me sembra tutto a posto, dovessimo veder de dentro, che no sia qualcosa che vibra o qualche vida mola". "Bon la vardi ah, qua bisogna trovar cossa che xe!" ghe rispondi ela. "La fazi una roba, la vadi dentro e la scolti ben co passa sto tram, cussì se cavemo sto mistero! Desso a momenti dovessi passar el tram e cussì la vedi e la senti anche lei".

- E si ah.. no xe che restava tanto de far.. e cossa el ga trovà?

- Spetaaa.. desso vien el bel. In quel torna a casa Berto, che gaveva inaspettatamente fatto presto quel che'l doveva far. Ovviamente nol saveva gnente del falegname e col riva el trova su moglie in camera de letto co sto toco de falegname in armeron. No te digo e no te conto.. "Cossa la fa lei qua, nel mio armeron?" el ghe domanda incazzà nero e verde de gelosia, e sto altro candidamente in bona fede "Mi? Mi speto el tram".

- Uuuuhhh me immagino el putiferio!

- Si perchè Berto xe bon ma xe testa calda, ma sto falegname iera un toco de omo e xe finì che Berto le ga anche ciapade e in più, co la baruffa, i ga anche disfà l'armeron!

- Desso capisso perchè no ghe va sai de ndar fora de casa..

Putin e Letta a Trieste (in TLT)

- Ma Fedi, dove te son sparido? Tre ore per 'ndar a cior quattro sardoni?

- Per forza! Xe tutto bloccà e ti te vol per forza che vado in pescheria in centro.. miracoli no fazo!

- Orca, xe vero! Me iero dimenticada che oggi vigniva Putin a Trieste.. E come iera? Sai casin?

- No te digo e no te conto! Iera più urbi e pugliotti che colombi! Tutto bloccà!

- Eh.. go letto si.. xe l'omo più a rischio del pianeta. Cussì i disi almeno! Mi no capisso..

- Cossa no te capissi, Lina?

- No capisso perchè i ga de far tutto sta ambaradan, proprio qua, in zentro, con tuto el casin che i crea..

- E dove te vol che i vadi? In piazza grande i devi andar, ah.. I ghe devi far veder pò, che bela che xe Trieste, no? Pò el sindaco voleva farghe veder anche el Ponte Curto forsi.. chissà!

- Mah, per mi i podessi andar a parlar su qualche barca e pò bon, cussì no i gavessi gnanche el problema della sicurezza.. cossa xe ste storie? Ogni volta i devi bloccar una città intiera! E gente che lavora ga de aver la vita incasinada per quelle due monade che i ga de dirse!

- Beh si, anche questo xe vero.. pò, se i vol, i podessi anche parlarse su skype, no? senza mover eserciti! Xe che i vol apparir, farse veder.. e pò, scolta, perchè te credi che i xe vignui propio qua, a Trieste? Enrico Letta e Vladimir Putin qua a Trieste..

- E cossa so mi! Perchè xe bela!

- Sicuro, ara.. Te digo mi, che go tutta una teoria.. I xe vignui qua perchè cussì quei mone de triestini che vol ancora Italia al posto de TLT, no se lassi convinzer de i altri e pensi robe tipo "Ara che bel! semo importanti sotto l'Italia!" oppur "Quando mai gaveremo sta importanza se no semo più Italia?"

- Te disi?

- Si, ah.. xe tutto un complotto, te digo mi che me intendo! Invece no i se rendi conto che se fossimo liberi de l'Italia e internazionai, fossi tanti de sti incontri, e no ste paiazade.. incontri veri, importanti per bon! Fossimo la terra de tutti dove incontrarse, in vera neutralità!

- Si, Fedi, forsi che te ga ragion.

- Sicuro che go ragion.. a mi no i me la caza!