El Ponte Curto

- Monade! Per mi xe tute monade!

- Ma cossa Enio? Cossa xe monade?

- Come cossa? Quele che i fa qua a Trieste, pò.. Sto Ponte Curto per esempio.. Passaggio Joyce.. ma cossa vol dir, cossa ghe entra Joyce col ponte? Capisso che i ghe vol ben, ma xe un limite, no? Mi no me quadra, e per ste robe go ocio, sa?

- Aaaah el ponte curto? Spieghite, no? Cossa te vol che capisso, con tute quele che i fà, go voia mi de imbrocar quela che te parli tì!

- Beh si, qua te dago ragion, mea culpa, dovevo specificar quala, i fa tante de quele..

- Ma pò se ga savesto perchè sto nome? Te sa ti, Enio?

- No.. me ga spiegà Fedi, ma no go capì ben. Una roba xe sicura, el nome de "Ponte Curto" no ghe lo cavava più nissun oramai, dopo tuto quel casin che i ga combinà! E pò i gaveva fato anche el sondagio no? Quei del Piccolo me par.. ma forsi me sconfondo, forsi iera su Facebuc.

- No, no, te ga ragion, anche mi me par che i gaveva fato lori. Ma coss te vol, indiferente insoma, quel che conta xe che ala fine tuti voleva che i lo ciami cussì, e cussì i ga dovesto far, voia o no voia! El sindaco no iera sai contento, perchè se ricorderà tuti de lù come quel del ponte curto.

- Se vedi che per no darghe tropo valor i ga zontà anche Passaggio Joyce, sperando che la gente col tempo lo ciami cussì.. e inveze no, cari, sarà sempre "curto" quel ponte. Con quel che ne xe costà.. cussì tante altre robe più sgaie i podeva far con quei schei, e inveze cossa? un ponte che propio no serviva, per sparagnar 30 metri de far a pìe, ma dei, dei.. Ben ghe stà! I voleva far bela figura e inveze i ga fato un bel figurin de merda!

- Te ga visto el filmato che i gaveva fato per riderghe sora? Forti i muli, quei de Robe Fatte Cacao. Tropo de rider, co me lo ga mostrà Lina me ga ciapà una ridariola tale, che robe che moro!

- Si, ah, che go visto! Chi te vol che no lo gabi visto? Te perdi colpi? Gavemo anche vardà insieme un fraco de volte.. ogni volta più de rider el fà, apuntamento te devi cior, che no te sia vignù l'alzaimer.

- Cossa mai! L'alzaimer te gaverà ti! Indiferente insoma.. Comunque co go leto sul giornal che i lo ga batezà, col cartel e tuto el resto, no podevo far a meno de pensar a sta sceneta e rider. Ma chi che xe andà come ga fato a star serio?

- Xe andà el mulo, a veder, quel che ga l'oficina vicin el giardin publico. Propio ieri el me ga contà, de matina, in bar.

- Ah si? Conta alora, coss te speti.

- Desso ghe rivo, speta, sempre furia te ga, ciò. Calmite, una calmada te devi darte, te son come un'anima in pena, ciò! Bon, insoma, el xe andà per veder, za che el iera là de drìo pei ufici, e el ga dito che propio serio no iera nissun, tuti che sorideva, alegri e felici. Per mi i rideva per la monada. E forsi anche perchè ghe vigniva in mente el filmatin, te dago ragion. I ga propio camufà ben sti furbi, i ga organizà el festin, perciò che tuti credi che i ridi de quel inveze che de la cazada! Sai furbi, darghe ato bisogna.

- Ah pol esser, sa che per ste robe i sa una più del diavolo..

- Pò anche el Piccolo ga capelà, el ga scrito "passeggio".. gnanca i cartei no i sa leger, varda, legi qua, chi sarà el pampel che ga scrito?

- Eh, cossa te vol, se vedi che el giorno prima el iera in osmiza! Ara, per mi, forsi anche che i fa aposta a sbaiar, el bugiardelo ga una certa tradizion de portar vanti!

- Magari che fossi per la tradizion! Ciapemola in rider ah, che sinò xe ciodi! Ma tuti insempiarne i vol, sempre, ma mi no i me la caza più! Monade, pò, Bruna, te digo mi, solo monade!

In gita a Vienna

- Cossa te disi Bruna, andemo?

- Dove? In gita a Vienna col MTL?

- Si ah, dove senò!

- Si, si andemo, no te vedi che stago fazendo la jota, che dopo iazo in congelator, cussì gavemo qualcossa de meter soto i denti in tante ore de pulman.

- Ah, orca, mi pensavo che iera desso, per pranzo.. che pecà, gavevo propio voia.

- Xe anche per desso, sta bon e no frizer, go fato in più.

- Bon, alora cossa fazo, prenoto, la gita coi muli intendo, in pulman coi triestini del Movimento?

- Te go dito de si, no voio che te guidi. Te son vecio, orbo e sordo, cossa te se sogni de guidar fin là. Andemo co i altri, col pulman, senza ris'ci, cussì se divertimo anca, no?

- Bon si, te ga ragion, xe solo che.. te sa che go la susta mola, no? e se no i se ferma spesso.. per quel volevo andar pei fati miei. Ma bon, dai, cussì bateremo carte e canteremo. Speremo che sia altri veci, che sicuro sarà, cussì no sarò solo mi a dirghe de fermarse spesso.. Scolta, go ciolto anche un dò fiasche de quel bon, de portarse drìo, no se sa mai.

- Bravo, anche se là i ga bona birra, forsi che no coreva. Pò vin e birra insieme.. te podevi anche far a meno. Vaben, dai, indiferente, mal no farà.

- Anzi, me ga chiesto tu fio, che no pol vignir, se ghe portemo un poche de botiglie de birra indrìo co tornemo. El ne ga dito de andar alla  7 Stern Bräu, una birreria artigianale che dovemo provar, cussì el ga dito almeno, e dovemo portarghe una botiglia per tipo. El ne ga fato la lista, vara qua:

• Hanf (la famosa birra alla canapa del 7 Stern), sai delicata
• Wiener Helles (birra bionda con aroma de luppolo)
• Prager Dunkles (birra scura, quasi nera, col sapor de malto tostado, caramello e aroma de vaniglia), sai, sai bona
• Märzen (birra rossa/ambrada al sapor de noci e pan de spagna)
• Chilli (piccante), de provar..
• Bangerberg Rauchbier (birra rossa, ideale per compagnar ai magnari fumigai e ala griglia)

- Bon ah, porteremo.. ma no so se le riverà piene, sa come che xe!

- Te farà in modo che rivi, orpo! Le tegno mi e pò bon!

- Ma si, scherzavo dei, tanto ciogheremo anche per noi, no? Portemo un dò valigie svode, cossa te disi?

- Esagerado! Basta una.

- Mah, no so, sa? Meti che, dopo che tornemo, tuti ne domandi de sagiar.. no resta un boro!

- E bon, porteremo due trolei, che ga le riodele, e via! Sarà quel che sarà!

- Ricordite la bandiera, me racomando!

Ein Prosit TeleQuattro

- Rudi, porta un litro che dovemo festegiar.
- Me racomando, quel bon, che te tien sconto! Xe importante, e vien anche ti a beverte un bicer con noi!
- Ecolo, signori, el meio dela casa, ma no ve meto in conto, sto qua lo ofro mi e guai a chi fiata!
- Urca, grazie ciò, se vedi che te ghe vol propio ben a Trieste..
- Giorgeto, ara che no son cussì caìa come se disi in giro, xe solo che se no stago tento va tuto in malora, e l'osteria devi ndar vanti, chi la senti dopo mia moglie!
- Ma si, scherzemo, dei, no statela ciapar, savemo, savemo come xe Maria.
- Ciò Fedi, ara che el cambia idea, sta bon, dei. Casomai dopo che gavemo bevù..
- Bon stapa dei, Rudi cossa te speti, qua se brinda per giuste cause.
- Eco si, deme i biceri che verso, passime, Giro, ti che te son vicin.
- Al TLT!
- Al Territorio Libero de Trieste, cin!
- E anche a quei che se ga da de far, specialmente ogi brindemo a Tele4 che ga trasmeso finalmente qualcosa de TLT e a quei del Movimento Libero de Trieste, che xe andai là!
- Iera ora che se parli un poco per tivù, manca ancora quel klinz de giornal però, ma bon, intanto brindemo a sto sucesso, cin!
- Che pò gave visto Giurastante? Tropa roba, el ghe le ga sonade! Una spana sora i altri.
- Enio, ara che anche i politici no scherzava.. el problema iera propio quel, no i scherzava!
- Giorgeto, batudoni ogi, ah?
- Certo che me spetavo un poca de preparazion, i ghe gaverà pur dito de cossa che iera l'argomento, no?
- Ahh, secondo mi, la mancata preparazion i la ga usada come scusa per poder sorvolar e no esprimer un parer. Cossa te vol che i disi, povereti? Xe evidente a tuti, niente pol scavalcar un tratato internazional, no? anche i fioi, orco can, ghe riva! Ma se i diseva qualcossa, dopo ghe tocava far i conti coi capi de partito taliani, e quindi i se gavessi dà de soli la zapa sui pìe!
- Giusto, caro Enio, anche secondo mi xe andà cussì.. impreparati! ma come se pol? i xe là per qualcossa no? come i pol esser impreparati! Bociadi, i dovessi bociarli, come a scola, e no farli tornar più! I se ga fato un bel figurin! Pezo che dir contro.
- No, no, Giro. Pezo che dar contro no, però uguale dirìa mi. Capisso che no i podeva dir gnente, ma dir castronade come ga dito qualchidun..
- Però bravo el nostro Roberto, ghe ga dito ciaro e pulito, senza lassarse infervorar del'idiozia generale che regnava. Mi no so se fossi rivà a star cussì sereno. Anche se un poco se vedeva che dentro el s'ciopava..
- Cossa te vol? Davanti al'ignoranza xe dificile resister.. bravo el xe stà, sai, sai bravo!
- Speremo che i rifazi, ara! Co i stessi! cussì sta volta no i gaverà scuse.. impreparati! ancora me ciapa el nervo, ma come se pol? e xe gente che li ga votai! per esser impreparai! Ridicolo, se no assurdo!
- Bon, bon calmite Giro, speremo che no i te ciami a ti, che sinò te ghe mandi per aria el studio!
- Si, Fedi, te se lo vedi a lui là? Meo de no, dai.
- Bon Rudi, sa cossa te digo, qua sto litro xe za finì. Va a cior un'altra che la situazion merita. Robe grandi ste qua, altrochè.
- Come no? Anche due! Qua se fa el TLT, robe grandissime!
- Che Tele4 parli avanti e che Dio te scolti!
- Rete nazional diventerà, del TLT!
- Prosit! Viva! Cin!
- ♫ ♪ ♩  Ein Prosit, ein Prosit, der Gemuetlichkeit, ♬ ♩ ♫ ♭ Ein Prosit, ein Prosit, der Gemuetlichkeit, ♫ ♭ ♪ ♬ ♩ Ein.. Zwei.. Trei Gsuffer!  ♫ ♭ ♪ ♬ ♩ ♫ ♭ ..

Tram in lavor

- Fedi, studime el fogo che se brusa.

- Orca, no son gnanche entrà e za te dà i ordini..

- Se te legi el giornal e no te fa gnente.. almeno iuta!

- Legevo del tram.. che tristeza, ancora fermo el xe, dopo i ga voia de dir che Trieste torna granda!

- E cossa i scrivi?

- Gnente.. el sindaco ga dito che i sta individuando le risorse, e tra un poco i comincerà i lavori.

- Sarìa ora! Vederemo.

- Si ma.. speremo che no i sbai de novo le misure, come col ponte curto! ..e se propio i ga de sbaiar, che i sbai in più, sto giro, almeno no se starà tuti strucai!

El tempo missia

- Lina, varda in pergolo e dime come xe el tempo, per favor.

- Cossa no te son bon de vardar ti?

- No rivo, son sul compiuter in ciat con Enio, xe urgente, el me ga chiesto de dirghe, za che del nostro pergolo se vedi tuto el golfo.

- Bon speta.. Eco, gnente de novo, tuto missià, nuvoloni e sol.

- Che nuvoli el domanda.

- Come che nuvoli? Nuvoli pò ah..

- Ma bassi, alti, bianchi, neri, a pecorelle? Xe tanti tipi.. sa che el se ga insempià co la meterologia desso, no?

- Si che so, cossa te vol che no sapio? Me conta, sa, Bruna, che el ghe frizi tuto el giorno col baromentro e tuto l'ambaradan che el ga ciolto. Che pò el ga speso un mucio de bori, par.

- Eh.. quela roba costa, se te ciol bona. Bon, sti nuvoli come xe? dime dai.

- Bon, xe neri e densi, però drìo xe sol, pò de una parte verso la jugo, sul mar, sembra bel ciaro, inveze de Monfalcon sembra rivar temporal, forsi piovi. Te capissi ti qualcossa?

- No che no capisso, nissun capissi qua, una volta iera fazile, ma desso, in giugno che te neviga e in dicembre che xe giornade che te va in maieta.. cossa te vol capir?

- Xe una loteria co te va fora de casa! Comunque se el te domanda dighe che missia e pò bon!

La firma benedeta

Driiiin.. Driiiin..

- Pronto, si? Chi xe?

- Ciau Lina, son mi, Germana, te gavevi de far?

- No, no, che piazer.. dime tuto. In verità si però, un poco ocupada son, fazevo el strucolo pei fioi, sa come che xe? ghe piasi..

- Bon, bon, alora taio curto, casomai te ciamerò doman per ciacolar ben. Volevo solo saver cossa che xe sta roba de sto benedeto governator.. quela che te me contavi l'altro giorno in Cremcafè. Sa, go trovà pien de volantini in giro e tuti che parla.. ma no xe una roba politica, no? E pò, sopratuto, no ghe xe imbroi drìo, o robe che dopo i te segna el nome e qualchidun te vien a casa a far la sorpresa?

- Nooo, tranquila Germana, sempre cussì prudente te son! E te fa anca ben! Ma sta qua xe una roba sicura, no xe robe politiche drìo, e no te vien nissun a casa, credime. Per una petizion pò! Chiunque pol chieder, xe sempre stà! "Chiedere est lecitum", a meno che no ghe sia ditature, certo, se ghe fossi ancora la Gestapo.. ma andevo vanti dei, semo nel XXI secolo, ara che xe finida la guera!

- Eh ma sa come xe? No se sa mai! Fidarsi è bene.. te sa no?

- Si si, xe anca giusto, ma una petizion sarìa che ti te chiedi qualcossa e pò bon, no xe niente de grave. Va tranquila!

- Bon te scolto, si, perchè mi anche me intereserìa sta roba, credo che sia importante.

- Orca se xe importante! Per tuti, anche per quei che ancora no credi che sia possibile, per quei che i ghe ga fato el lavagio del cervel e i xe ancora convinti de esser taliani. In pratica co sta petizion se domanda ale Nazioni Unite de rimeter all'ordine del giorno la nomina del Governator. Bon, chi che xe convinto de esser talian dovessi firmar de corsa, cussì veramente se savessi cossa che semo, finalmente e chi che ga ragion. Solo lore, le Nazioni Unite, pol dirne, no te par?

- E si, te ga ragion, bon, bon, andarò prima possibile adesso che te me ga rassicurà.

- Va si, che te fa ben. Bon te saludo che devo meter in forno, stame ben.

- Va ben, te ciamo doman con calma. Saluda Fedi!

Povero Michelin

- Fedi, cossa te me ga portado? Te go dito che volevo bianco crema.. orca, ma no te capissi un boro!

- E quel cossa xe secondo ti? No xe forsi bianco crema?

- No ah. No te vedi? Cossa ga de crema? Sto qua xe bianco sporco. Insoma, no posso fidarme.. tre volte te son zà andà a cambiar. Crema te go dito, bianco crema! Ma te ghe ga dito pò, bianco crema, al banconier?

- Cossa te vol che ghe domando, cossa no son bon forsi? Pò xe za quatro volte che son andà, te vol che me fazo mandar in mona dal comeso? Va ti ah, za che te son esperta! Cossa te vol che te digo? Inveze de ringraziar.. Bona te son, a dar comissioni.. va ti e pò bon!

- Eh si ah? Me manca quel, come se no gavessi robe de far qua a casa.. te stiri ti le camise dopo? te fa ti de magnar, che no te sarìa bon de far gnanca un oveto?

- Cossa te parli? So cusinar e anca ben, se voio! Comunque, quel xe bianco crema, te son ti che no te distingui i colori, cossa te credi? Go oci boni, sa?

- E se vedi! Bon, bon, no stemo bazilar, faremo andar ben e basta!

- Scolta inveze, piutosto che parlar de colori a vanvera, te vol saver l'ultima? Xe de morir de rider..

- Conta, si.

- Sa Michelin? El mulo biondo che gira con quel motorin che fa un scandal compagno, el cugin de Piston e Loli?

- Quel che xe anca lù triestilian? quel alto?

- No, quel se su fradel picio, no me ricordo el nome, mi parlo del fradel grando, Michelin se ciama, Michele in realtà, ma i lo ciama Michelin perchè el xe picio de statura, altro che alto!

- Go capì, si, alora de chi che te parli, si.. però el se ciama Michelin perchè col xe nato, sicome el iera ciccetto come l'omin della Miscelen i lo ga ciamà uguale, però nissun saveva pronunciar e tutti lo ciamava Michelin, dopo xe sta un caso che el xe rimasto picio. Bon, indiferente, contime, contime, cossa xe nato?

- Sa che iera de quando che el iera picio che el voleva far el soldà, no?

- E chi no sa? Però me par che no i lo ga mai ciolto, almeno me sembra.

- Infati, tululù come che el xe, chi te vol che lo cioghi, e pò, darghe un'arma in man.. semo mati?

- Si, si, go ben presente desso. Povero picio, no xe gnanche colpa sua, povereto, co i te insempia cussì de una vita, de co te son picio.. che speranze te pol aver?

- Bon, insoma, indiferente.. el ga provà a far domanda per entrar nei elecoteristi dei carabinieri!

- Cossa? Ma te sta scherzando? Lù? E lora? I lo ga ciolto? Facile anche de si.. i caramba forsi che no i se acorzi che pampel che el xe, forsi che i se ga trovado..

- No, no, figurite.. i conta barzelete su de lori, ma ala fine xe gente normal, una volta forsi.. ma desso xe bravi muli. E infati gnanca là no i lo ga volesto!

- E bon, meno mal, sa che danni dopo! Ma, scolta, tuto qua? E cossa ghe xe de tanto divertente, fa tristezza, ara, inveze!

- Nooo, speta, desso riva el bel. El bel xe la storia de come che xe andada. In pratica, el ga fato i esami medici, tuti, e quei, bon, xe andai ben. Pò el ga fato quei test de ingresso, quei che ga tute quele domande, che te devi scriver la risposta bona co una ics, e quei, nissun sa come, xe andai anche ben, apena suficenti in realtà, ma sicome un pochi de quei che gaveva fato meio de lui, dopo, se ga ritirà, alora i lo ga ripescà.

- Sa che pesca!

- Si, anche mi go dito propio cussì! Bon, insoma, ala fine el iera in zogo, e robe quindi che se lo trovemo che el svola qua intorno.. robe de tocarse ogni volta che te va fora de casa, sperando che nol te caschi in testa! Comunque, insoma, iera quasi sicuro oramai che i lo cioghi.. pensite che el xe andà anche in bar de Rudi e el ga butà giro a chi che iera, tanto felice che el iera.

- E quindi el xe un elicoterista ormai? Santa Madona, ma come se pol? Xe longhi desso alora, maledeta barca e chi che li ga portai, se iera Franz Josef, col klinz che i lo cioleva!

- Nooo, sta bona, te go dito che no i lo ga ciolto, speta, gabi pazienza che finisso. Insoma, passa una setimana che el ga festegià de qua e de là, fin che toca el giorno de l'esame pratico, che per inciso, in teoria, uno se aspetasi che xe più facile de quel teorico, almeno per lui che no xe propio una zima.. No te crederà, come no credù mi, che lo ga fato quasi ben. Insoma, no iera propio perfeto, ma sicome iera pochi de lori che podeva farlo i ga serà un ocio e sicome no iera ala fine tanto tanto mal, i lo gavessi anca fato passar.

- Ma alora el xe passà, no te ga dito de no? No stame far bazilar, dime dei, Fedi.

- No, nol xe passà, te go dito, orca! Lori iera un pocheto in dubio perchè bravo nol iera stado, tanto, ma gnanche propio scarso, e come te go za dito, i gaveva bisogno de nove leve. Sa, lori devi cior ogni ano un pochi, se no i fa bruta figura perchè dopo tuti pensa che nissun vol far, e inveze lori, ambìti, ga de esser! Forsi quindi se pol presumer che i gavessi anche serà un ocio. Ma propio col ga finì tuto, sul più bel, el ga dà prova de lù!
El capo esaminator, quel che comandava tuto l'esame, ghe ga chiesto, propio prima de esprimerse, credo con parer favorevole, con far scherzoso, quasi per dirghe "se propio te piasi, visto che te son sai motivà, te ciolemo lo stesso".. bon, el ghe ga domandà, testuali parole: "Allora ci dica, caro il nostro aspirante elicotterista, le piace proprio volare, vero?" e propio se capiva che oramai la iera fata!

- Si ah, mi capirìa cussì, che iera propio fatta oramai..

- Tuti capirìa cussì e salterìa de gioia, ma lù.. lù invece ga risposto serio "Sior capitano, se propio devo essere sincero, e devo rispondergli ciò io ciò lei come stanno le robe, alora le dirò che invece di "Volare"preferisco "Vita Spericola" di Vasco rossi, è il mio idolo". E el ghe conza quel suo soriso ebete.

- No stame dir, mama che figura! El ga capì "Volare" la canzon de Modugno? Mama mia, no poso creder!

- Fortuna gavemo, Lina, fortuna! Xe un Dio lassù, te se imagini se quel podeva guidar un elicotero?

- Meno mal, varda. Za el xe un pericolo con quela motozapa de motorin, te se imagini in aria.. Se vedi che gnanca Cristo no lo voleva in ciel che el svoli!

Nissuna sovranità italiana

Driiiin.. Driiiiin..

- Chi xe? Pronto?

- Ciao, Bruna, son mi, Lina, come te sta?

- Ben, grazie, a parte sta schena che me diol sempre. Ma fin che xe sto tempo cossa te vol, umido ah, e i ossi no suga.

- Eh, no dirme mi che me ciapa i genoci ogni volta che piovi, vece semo, ale terme dovessimo andar, ara, altrochè!

- Contime tuto, cossa nassi?

-Bruna, te devo contar una che gnanca no te se imagini. Sa che Fedi ga quel suo amico che lavora in biblioteca, là in piaza Hortis? Bon, xe de un poco che el va trovarlo, sa, per zercar material sula "Questione Trieste". El xe tuto impizà che el zerca e el se documenta de tuto, mai visto cussì, el se legi giornai veci, libri, el fotocopia, el scrivi, mah, contento lù, contenti tuti, e anca mi, però xe de dir che el fà robe bone almeno, e mi son sai contenta perchè me interesa sai, trovo giusto, ah.

- Giustissimo Lina! Anche Enio, spudà uguale, almeno nol sta tra i pìe co disbrato, che Dio dassi che duri!

- Bon, insoma, indiferente.. el va sai spesso, disevo, in biblioteca, quela civica, e là el se pasa giornade a studiar ste robe del TLT. E ieri el me torna a casa co un soriso che ndava de un'orecia al'altra! Cossa nassi Fedi, cossa te ga trovà el tesoro? Ghe digo mi, per modo de dir, perchè se vedeva che el iera propio sodisfato.

- No stame dir! E cossa el ga trovà?

- Ah.. magari che el gavessi trovà un tesoro! No, nol ga trovà gnente del genere, però legendo de qua e de là, el ga trovà una roba sai interesante, sempre riguardo ala question del TLT. 

- E bon, conta dai, cossa te speti, le calende?

- Ecco, ecco, cara mia! El ga trovà le parole esate che Manlio Brosio ga dito subito dopo el maledeto Memorandum d'Intesa di Londra, la prima dichiarazion ai giornai, quel famoso 5 ottobre del 1954. Enrico Serra, che iera un famoso giornalista del'ANSA, corispondente de Londra, iera l'unico giornalista italian che gaveva partecipà ala parafatura del Memorandum d'Intesa, e gaveva scrito oviamente un articolo, riportando tuto per fil e per segno. 

- Orca! E cossa disi sto articolo? Te lo ga leto?

- Si si, lo go qua in man, te go dito che oramai casa nostra xe diventada un archivio de stato, Fedi no fa altro che fotocopiar e portar a casa libri e carte.. Bon, insoma, nol ga trovà diretamente l'articolo, lo ga trovà riportado in un libro, "La Questione di Trieste" de Diego de Castro, un professoron de Pirano, che ga insegnà in tuta Italia e xe stà a Trieste dal 1952 al 1954 come rappresentante diplomatico presso el GMA, el Governo Militare Alleato, e consiglier politico del Comandante della Zona A angloamericana, tale generale Winterton. Insoma, la bibbia de Trieste xe sto libro, tante le robe che xe scrite, almeno per quel periodo. Comunque, Fedi zercava documenti e robe perse nel tempo, e ala fine el ga trovà, iera cussì facile, in sto libro che gavemo anca noi a casa. E chi no lo ga qua a Trieste? Pochi lo legi forsi, ma tanti lo ga! Triestini pò, de Trieste bisogna aver tuto, no solo le Maldobrìe!

- Bon Lina, ma contime dai, cossa xe scrito? Doman te me porti subito una copia che ghe devo dar a Enio, che sicuro ghe interesa, ma desso legime, te prego..

- Si si vaben. Insoma, sto Enrico Serra ghe ga dà pò l'articolo intiero a de Castro e lù lo ga messo oviamente int'el libro. Alora, recita cussì, xe Manlio Brosio che ghe parla ai giornalisti, pena finì la parafatura del Memorandum d'Intesa a Londra: "Possiamo dire che, con la soluzione odierna, noi non abbiamo rinunciato a nulla. Si tratta soltanto di una formula di passaggio di amministrazione e non di sovranità.." Bon xe altre robe dopo, ma ste parole xe sai ciare e nete! 

- Ciaro come el sol! Iera ora, ma chissà quanto material che xe de tirar fora, speta che ghe conto a Enio, ara, el salterà de gioia!

- Material ghe ne xe si, ma noi pension gavemo, tempo anca.. zercheremo ah!

- Bon te saludo bela, stame ben, e grazie! Che Dio dassi, ara!